يلا نحب ..هههههههههه..بس من غير عصبية

...السلام عليكم ورحمة الله وبركاته ..

من زمان ماكتبت بالاسرية ...من يوم ماناشغلت بالحملة اللي بالمجلس العام..بس قلت لنفسي عقب ماشفتها (( اي نفسي منشحنة ..وطفشانة ..وماعاد تركز المسيكينة..)).
ليش مااكتب موضوع بالاسرية ..منه اروق شوي مع خواتي الونيسات واريح لين يتجمعون شلة المجلس العام مرة ثانية ..ومنه استفيد ..لأن اللي بكتبه يتعلق بموضوع حملتنا حاليا ..واللي هو عن الحب ..شكلنا غثيناكم بطاريه انا وام الخمائل ..خخخخ

المهم ياحلوات..

فيه شي ابي اسولف عنه وياكم ..بس من غير ماتعصبون وتكفخوني ..لأ..انتبهوا لكلامي زين ولا تحرفونه..


الموضوع هو : (( اظهار الحب امام الاولاد ))..


ماتشوفون وياي ..ان اظهار الحب امام الابناء ..بس بشكل محترم (( فيه حب محترم وفيه مصاخة وقلة حيا قدام البزارين وذي مانبيها ..))..ماتشوفون انه ضروري ..


يعني ايش فيها لو الرجال يضم زوجته بحناااااان (( بس بحنان ))..قدام عياله ..

ماهي مصخرة ..بالعكس ..مع التعود بيحسون ان هذا شي روتيني ..ومجرد اظهار يومي لحب ابونا لامنا ..وطبعا يضمضم عياله ماهوب بس المرة ..؟؟

تعودنا من يومنا صغار انه عيب ..كل شي عيب ..حتى لما يجي الرجال يسافر او جاي من السفر يسلم على عياله كلهم واخوانه وخواته وامه وابوه ..وكل جماعته عاااادي قدام الناس الا حرمته ..باليد بس ..!!..طيب لييييش ..

وش هالعقد ..يوم انه يبوس عياله واحد واحد على خدودهم ..وش فيها لا شافوه يبوس امهم على خدها بعد زيهم ..؟؟

لا تخلون عيالنا يصيرون مشافيح ...وبناتنا يدورون عن كلام الحب ولو سمعوه..ياربيييي تدوخ البنت وكانها سامعته من المريخ ..والله لو انها متعودة ابوها ماينادي امها الا حبيبتي _ عمري _يالعزيزة
ياعيال انا احب امكم _ امكم حبيبتي ((كني مصختها وشطحت بخيالي صح ..هههه))...
لو انها متعودة على هالكلام ..يقل تاثير كلام الحب من المصادر الغلط عليها ..لانها شبعانة منه ..

يعني بالاضافة الى انها شبعانة من الحب اللي يكيلونه لها امها وابوها ..دايم تشوفهم بحالة ود ..ويحبون ويحترمون بعض ..فالحب ماعاد يصير بالنسبة لها حلم بعيد ..لا هو واقع قدامها بعايلتها
ومابقى الا تعيشه مثل ماامها وابوها عايشينه ..


لا تقولون لي مصخرة ونلهب خيال البنت ..لأ..

المصخرة هي الزيادة باظهار الغزل السمج والاشياء اللي بس بين الزوجين ..

ولا حظوا انا قلت اظهار الحب ..ماهوب اظهار شي ثاني ..

خلوا عيالنا يتربون على ان الحب شي راقي نقدر نظهره للناس ..والحب اول مايعرفونه ..لربهم وبعدين من حب امهم ابوهم لهم ..وامهم وابوهم نفسهم نموذج للحب الراقي ..فلو جا بعدين الحب من مصدر غلط ومن وراء الكواليس ..صدقوني راح يقابل بالطرد ..لانه ارتبط عندهم بمعنى راقي يرادف احترام احبابنا وعدم خيانتهم بما يؤذي الثقة اللي اعطونا اياها ..يعني ماراح نخون امنا وابونا وهم اول من علمنا الحب ...


يلا نحب ((خخخخخخخخخخ...سبحت بعالم الحب الوردي..هههه))


عطوني رايكم ...وتذكروا ان النبي صلوات الله عليه ..كان كلما دخلت عليه فاطمة ابنته قام لها وقبلها بين عينيها ..حتى وهي امراءة فمن من رجالنا يعمل ذلك الان لابنته او زوجته ..دون ان يربط ذلك بالعب او الخجل ....؟؟