يوسوس لي الشيطان ان اللي سويته بيوقف نصيبي "فضفضه"

السلام عليكم

انا يا بنات ابي افضفض ، مو لاقيه احد اتكلم معه
و لا ابي احد يدري عن اللي بداخلي ..
انا قبل فترة كنت عند جدي مريض و جدتي ما كانت تقدر تقوم فيه
فأرسلتني امي بموافقه ابوي اعتني فيهم لان مالهم الا بنت وحده اللي هم امي
و امي حرمه كبيره ما تقدر تترك بيتها و لا تقدر تشيل نفسها
فأرسلتني اكون بمكانها
مع ان خوالي متزوجين وواحد منهم بنفس البيت و حرمتة تصير لنا من الجماعه وقريبه حيل يعني مو غريبه
بس قالت بلسانها انا ما اقدر اعتني لا بالشايب و لا بالعجوز ..
المهم ..
كنت اعتني فيهم و اهتم و اغسل و اطبخ لهم
و مع ذلك ما اسلم من لسان زوجة اخوي
كان تدعي علي عيني عينك
لو تلقى ورقة طايحه بالمطبخ و الا ملعقه مو مغسوله سبتني و دعت علي بصوت عالي تبي تسمعني و تسمع اجدادي
كانت مع كل هذا تجي بعد ساعه و الا ساعتين و تسولف و لا كأن شيء صار
كانت تترك عيالها بدون غداء و تامرني جدتي اسويلهم غداء
كانت كثير ايام ما تسوي لنا عشاء و اضطر اقوم اسوي
ما كان عندي مانع ..
انا اصلا وجودي كان لخدمة جدي وجدتي
بس كان مليان قلبي منها لظلمها و تعاملها مع اجدادي و كرهها لهم و دعواتها علي و سبها
انا اعترف اني بعض الاحيان اغلط و اترك ملعقه و الا سكينه
بس ما كانت تعذرني و تقول حرام هالبنيه مسكينه و لا كان يشفع لي اهتمامي بأكل عيالها و لا على الاقل كانت تجي تقول لي فلانه ترى نسيتي سكينه غسليها مع ان عادي عندها لو تقول لانها تعتبرني بنتها !
ما كانت تتجرأ تدعي وتسب قدامي اول كم شهر
بس بعدين صار عيني عينك و لا يهمها
كنت ادرس و بنفس الوقت اهتم بجدي و جدتي بنفس الوقت و لا عمري تأففت و لا عمري قلت تعبت و الا خلاص برجع لأهلي
كنت اتألم بداخلي و اسكت ..
كنت اسكت كثير لدرجه ما صرت اقدر افضفض لأحد باللي قاعد يصير
و بحكم كبر سن اجدادي فكان الحديث اكثر شي لهم و انا فقط مستمعه
مرت علي فترة نسيت كيف اربط كلمتين على بعض
ظليت عندهم 8 شهور
في آخر شهر و صل بي الحال الى اقصاه
كنت اسمعها تكلم حرمه و تشتكي لها مني و تسبني قدامها و تدعي علشانها لقت المطبخ وصخ و انا مالي ذنب فيه و لا دخلته
ظلت تشكي و تدعي ، و في يوم زارونا اهلي و هي تكره وجودهم
كنت كل مره اذا شفتها ما تبي تسوي اقوم اسوي العشاء لهم من طيب خاطر
لكن هالمره قامت وسوت
و بدل ما تقول حياكم الله على العشاء
قالت اقعدوا لا تستحون انتم لو تستحون ما تجون كل اسبوع !
عورتني هالكلمه و آلمتني و قهرتني
قررت اني اعلم زوجها بكل شيء سوته خلال فترة جلوسي عندهم
انقهرت على اهلي و سوء ادبها معهم و انقهرت على سمعتي اللي صارت تلعب فيها من مكالمه فلانه و علانه ..
جاء خالي من سفرتة و علمته كل شيء و بكيت عنده و فضفضت ، حاول يهديني و يجبر بخاطري
و راح لها و هاوشها و هزئها حيل و جت و هاوشتني بدون ما يدري و تهاوشت معها مع ان ما ودي بس كنت عارفه لو ما رديت عليها بتحط السالفه على جدي و جدتي و تحملهم هالشي
سوت نفسها مظلومه و حاولت تقلب السالفه علي لكن وقفتها عند حدها
جدتي خاصمتني و قالت خلاص روحي لأهلك مع اني ادري انها بداخلها فرحت اني خذيت حقها بس خافت من المشاكل ..
بعد فترة اضطر جدي يسافر للعلاج و سافرت جدتي معه
و انا رجعت للبيت ..
هي و لأننا اقرباء اغلب الجماعه عرفوا بالسالفه خاصه النساء و كانت تدعي انها مظلومه
اصبحت بنظر العائله امرأه قويه ظالمه تخرب بين المرء وزوجه ..
و هالفترة و لاني على وجه زواج صار يوسوس لي الشيطان .. اني ظلمتها ؟ ان كلامها بيوقف نصيبي ؟
محد يبي زوجه بمثل المواصفات اللي قيلت عني ..
احيانا انفض هالافكار من راسي و اقول لأ ..
انا كنت مظلومه و دافعت عن ظلم واقع علي و على اجدادي ..
انا مؤمنه قويه ..
لكن لما اتذكر كلامها و اسلوبها معاي و كيف بينت لي اني ظلمتها يعورني قلبي خصوصا انهم مبينه للناس انها مظلومه و حنا الظالمين
اللي يوجع اكثر بعد السالفه جت اتصالات تقول اني تسرعت و المفروض ما اتسبب بمشكله بين الرجال وزوجته ..
ما تتخيلون كمية الالم و اللخبطه اللي صايره بداخلي
يا رب يسر امري و طيب قلبي و ارزقني من خيرك في الدنيا و الآخره و اكفني شر ابليس و من عاونه
اللهم ان كنت ظلمت نفسي فأغفر لي فأنه لا يغفر الذنوب الا انت
لا اله الا انت وحدك لا شريك لك
من لي غيرك ، انتي ربي حسبي و نعم الوكيل
سبحانك الواحد الاحد الفرد الصمد الذي لم يلد و ليس له ولد





---


لا تدعون عليها بنات
هالفتره احسها تغيرت شوي و تغيرت معاملتها مع اجدادي ، لعل ربي هداها و عرفت غلطاتها
انا بس ابي افضفض و لو تعطوني نصيحه ما راح انساكم ♥