يوميات أخصائي التخسيس

علاج السمنة والنحافة

أيه اللي جابك هنا

من أهم الأسئلة التي يوجهها الطبيب الى زائر العيادة
أو ما اصطلح على تسميته بالمريض






من أهم هذه الأسئلة سؤال محدد يوضح كثير من الأمور / ما هو سبب تشريفك لعيادتنا ؟
أو بالعامية المصرية / أيه اللي جابك هنا ؟






و
الاجابة أمام الطبيب
هو ذكر السبب الذي قاده إلي العيادة .. السمنة .. الوزن الزائد .. النحافة .. وغيرها .....

لكني أسأل السؤال بطريقة أخري / أيه اللي جابك هنا ؟
ليس لمعرفة اسم الشكوى من سمنة ونحافة وغيرها
ولكن لمعرفة السبب وراء الشكوى .. السبب وراء السمنة والوزن الزائد ..






البعض يطرح السبب بوضوح ( من وجهة نظري كمتخصص ) ولكنه لا يكون واضحا أمامه كصاحب المشكلة
رغم أنه هو من يطرح السبب .. تريدون أن تعرفون أكثر؟

اليكم بعض الأمثلة


أنا بأعشق الجاتوه والشوكولاتة

تأتي الي عيادتي وهو حزينة
تتمنى أن تقطع من جسدها بالسكين لكي تخفض وزنها
وتبكي وهي تذكر معاناتها في بيتها ومع زوجها وأثناء شرائها الملابس
ثم بكل شجاعة تقول لي ما تحرمنيش يا دكتور من الجاتوه والشوكولاتة علشان أنا باعشقها .. طيب أيه اللي جابك هنا ؟

أصل أنا مش باحب السلطة

وأخرى ترجوني ألا أطلب منها أن تأكل السلطة الخضراء فهي تكرهها ولا تتناولها أبدا .. طيب أيه اللي جابك هنا ؟

مش بأحب أعمل دايت

طيب جاية العيادة ليه؟
وأيه اللي جابك هنا؟
زيارة الطبيب معناها الثقة في انه سوف يأخذ بيدك في خطوات مدروسة للحصول على الرشاقة
وأولها اتباع نظام غذائي صحي سليم ومؤثر
ولا يملك الطبيب أحجبة ولا سحرا لكي يحول الشخص من وزن زائد أو قليل الى شخص يتمتع بالصحة والرشاقة والجسد السليم
لكنه يملك العلم والطب

أصحابي قالولي على وصفة كذا وكذا

وتسأل عن مؤهلات هؤلاء الأصدقاء لتعرف
أنهم مؤهلون في كل التخصصات المرموقة
(تعليم اللغة الانجليزية، المحاسبة، امتلاك محل جزارة، أو منتجات ألبان.. مع كل الاحترام والتقدير لكل المهن)
لكنهم للأسف غير مؤهلين في مهنة الطب وتخصص علاج مشاكل سوء التغذية
ليس هذا فقط بل أن هؤلاء الأصدقاء يتدخلون في علاج الطبيب
فيخيفون الشخص مما أعطاه الطبيب
أو قد ينصحونه بالتوقف عن العلاج
(علشان وشك بقى وحش)
أو كفاية كده ها تروحي فين بعد كده؟
طيب ايه اللي جابك هنا؟
أعلن للجميع استعدادي للتعلم من أي شخص يفوقني علما
لكني لست على استعداد للتضحية بما تعلمته في الطب أمام شخص لم ينفق وقتا في تعلم الطب وعلومه

مدرب الرياضة قاللي آكل كذا

مدرب الرياضة يعرف في الرياضة أكثر مني
لكني أعرف أكثر من مدرب الرياضة في موضوع ناكل ايه وما ناكلش ايه . مش كده !!
اذا أخذت برأي المدرب في موضوع الأكل طيب .. طيب أيه اللي جابك هنا ؟
وكثير .. وكثير .. لكن هذه مجرد أمثلة ..
فتقبلوها منى عن طيب خاطر .. وأرجو ألا يسألني أحدكم .. ايه اللي جابك هنا ؟





إنتظرونا في يوميات
أخصائي التخسيس..
.
9
830

يلزم عليك تسجيل الدخول أولًا لكتابة تعليق.

تسجيل دخول

ثلج مشوي2007
ثلج مشوي2007
( 1 )
اليوم المفتوح





أنا / برافو عليكي نزلتي 4 كيلوجرام أول اسبوع .. عاوزين نفس الالتزام علشان نكمل لحد ما توصلي لوزنك المثالي

هي / البركة في ربنا وفيك يا دكتور
أنا / لولا التزامك مش ممكن نوصل لأي نتيجة


هي / طب ليا سؤال يا دكتور .. أنا صحابي قالولي إن فيه يوم مفتوح يعني يوم آكل كل اللي نفسي فيه
أنا / فكرة اليوم المفتوح فكرة مدمرة .. وفيه بحث للمركز القومي للبحوث أثبت أن اليوم المفتوح هو سبب فشل أي ريجيم


هي / (بحسرة) بس أنا معشمة نفسي خلاص يا دكتور على يوم مفتوح
أنا / ( وقد صعبت عليا ) يعني إنتي كان نفسك تاكلي ايه ؟


هي / مكرونة باشاميل.. و ..
أنا / (مخضوضا) وايه كمان ..


هي / وتلات حتت جاتوه..
أنا / (مفجوعا) وايه كمان ..


هي / و3 بولات آيس كريم..
أنا / (على وشك الاغماء) وايه كمان ..

هي / وقالب شوكولاتة..
أنا / (منتحرا أو على وشك) وايه كمان ..


هي / وحتة بسبوسة صغيرة.
أنا / ….......... !!

هي / مالك يا دكتور؟ .. فيه ايه؟ وشك اصفر كده ليه؟
أنا / (مستفيقا بصعوبة) انتي عارفة مجرد ذكر مجموعة الحاجات اللي عايزة تاكليها دي يمكن يتخنك الأربعة كيلو اللي نزلوا الاسبوع دا !


هي / يعني مش ها تسمحلي بيوم مفتوح؟
أنا / الحكاية مش اني أسمح أو ما أسمحش.. هي مش صك غفران أمنحه لك فتاكلي زي ما انتي عايزة وما تتخنيش

الحكاية منطق .. والمنطق بيقول ان الأكل دا بيتخن .. وعلشان كده مش غريبة ان وزنك زايد
لازم تغيري نظرتك للأكل وللحياة وللسلوك الغذائي بصفة عامة


هي / (على وشك البكاء) يا خسارة.
أنا / (محاولا استرداد معنوياتها الضائعة) ممكن أسمح لك بوجبة واحدة مفتوحة.. يعني مثلا ممكن تاخدي سندوتش أو شوية رز النهاردة
كنوع من كسر الريجيم يعني .. لكن الحلويات ممنوعة بتاتا..
هي / (باستخفاف) بس؟
أنا / انتي هدفك ايه ؟ الرشاقة ولا الأكل .. تلبسي هدوم شكلها حلو ولا تاكلي حاجات طعمها حلو ؟ حددي هدفك

ويا ريت يكون هدفك يتضمن كلمات عن الرشاقة مش عن الأكل .. يعني تقولي
نفسي أكون رشيقة و ألبس اللي نفسي فيه.. مش يا ترى آكل ايه علشان أخس ..


( يتبــع )

.
.
ثلج مشوي2007
ثلج مشوي2007
( 2 )
عشاء مع الباشمهندس




أنا / من المهم يا مدام انك تتناولي الوجبات في مواعيدها .. وآخر وجبة اللي هي العشاء تكون قبل الساعة عشرة مساء

هي / لا يا دكتور.. أنا العشا بتاعي بيكون الساعة 3 الفجر ..
أنا / (مندهشا) ليه التأخير دا ؟

هي / (منتشية) علشان الباشمهندس جوزي بيحبني اتعشى معاه علشان أفتح نفسه
أنا / (مستنكرا) وليه بتتعشوا متأخر كده ؟


هي / (بفرحة) الباشمهندس يا دوب بيخلص شغله الساعة 3 الفجر
أنا / (بفضول) ليه كده؟ هو الباشمهندس بيشتغل ايه ؟

هي / (بفخر) في المقاولات
أنا / بس أنا اتعاملت مع مقاولين كتير وعمري مارحت لمقاول الساعة 3 الفجر

هي / آه.. هو بيخلص شغله قبل كده وبيروح يسهر له شوية
أنا / (وقد اكتشفت اني دخلت بين البصلة وقشرتها) هو الباشمهندس ها يعمل معاكي ريجيم ؟

هي / لا
أنا / يبقى لازم يكون لك نظام مختلف عن نظامه.. هو يسهر زي ما هو عاوز وانتي تاكلي في مواعيد منتظمة علشان تحافظي على دقة الريجيم

هي / لا مش ممكن يا دكتور
أنا / وبعدين اللي عاوزة تخس لازم تنام بدري علشان انتظام هورمونات الليل اللي لازم تكوني نايمة علشان تشتغل صح .. ومنها هورمون النمو اللي بيخلي جسمك رشيق

هي / ما أنا بأعوض في نوم النهار.. بأصحى من النوم الساعة خمسة بعد الضهر
أنا / ودي مصيبة أكبر .. علشان هورمونات النهار لازم تشتغل في ضوء النهار
وانتي طبعا ها تكوني نايمة وعيونك مغمضة وبالتالي هورمونات النهار مش ها تشتغل
وها تدخلي كده في حالة ارتباك هورموني. . و يمكن دا السر في وزنك الزائد

هي / لأ أنا وزني زائد علشان الحاجات اللي بأكلها مع الباشمهندس في العشا
أنا / (وقد عاد لي فضولي السابق) ليه انتو بتاكلوا ايه في العشا ؟

هي / الباشمهندس بيحب ياكل اللحمة السمينة والمكرونة بالكريمة وبنحلي بصينية بسبوسة بالقشطة..
أنا /................... !!


هي / (منزعجة) الله .. مالك يا دكتور .. جرالك ايه؟
يا اخوانا الحقونا .. الدكتور وقع من طوله .. باينه أغمى عليه!!

( يتبــع )

.
.
ثلج مشوي2007
ثلج مشوي2007
( 3 )
في أسرع وقت





هي / (هلعة) أرجوك يا دكتور.. أنا ماليش أمل غيرك.. انقذني يا دكتور
أنا / (محاولا طمأنتها) طيب اهدي يا ستي.. خلي أملك في ربنا.. واللي في ايدي ها أعمله

هي / إنت الأمل الوحيد يا دكتور.. وأنا متأكدة انك مش ها تخذلني
أنا / (بهدوء) خلينا نشوف انتي عاوزة إيه وأنا أقدر أعمله ولا لأ

هي / خطوبتي بعد اسبوعين يا دكتور.. وأنا لازم أخس بسرعة
أنا / (مندهشا) تخسي بسرعة في اسبوعين؟ طب ازاي ؟

هي / أنا اللي ها أقولك برضه ازاي يا دكتور؟ أمال انت دكتور ليه ؟
أنا / مش معنى إني دكتور إني أكون ساحر أقول للشيء كن فيكون. خلينا الأول نشوف انتي لازم تنزلي كام كيلو
بعد قياس الطول والوزن..
دلوقتي مطلوب انك تخفضي وزنك 40 كيلو جرام

هي / ( بلهفة ) ممكن أنزلهم في اسبوعين يا دكتور ؟
أنا / انتي وزنك زايد من امتى ؟

هي / يوووووه.. من وأنا صغيرة خالص.. أنا أول ما انتبهت على نفسي وأنا كلبوظة
أنا / يعني بقالك بتاع حاجة وعشرين سنة وزنك زائد ؟

هي / (بحسرة) آآه
أنا / بصراحة مش ممكن خفض الوزن الزايد في اسبوعين

هي / الله !! أمال أنا جاية لك ليه ؟
أنا / يعني وزن زائد في حاجة وعشرين سنة ينزل في اسبوعين ؟

هي / ليه لآ ؟ أنا سمعت عن واحدة جارة واحدة صاحبة مامة ابن الحاج إسماعيل إن وزنها نزل 30 كيلو في اسبوع واحد
أنا / يا ستي دا مستحيل علمياً . إنتي شفتيها بنفسك ؟

هي / لآ أنا سمعت
أنا / فيه مبالغة شديدة في الموضوع دا. ممكن نساعدك على خفض وزنك 6-10 كيلوجرامات شهريا

هي / (بيأس) بس ؟
أنا / على شرط تلتزمي بالنظام الغذائي اللي ها اديهولك

هي / وكمان نظام غذائي ؟
أنا / الله.. هو انتي فاكرة اني ها اخسسك ازاي؟

هي / موافقة بس على شرط ..
أنا / إيه الشرط دا ؟

هي / انك ما تمنعنيش من الحلويات.. أنا بأعشق الحلويات!!
أنا / يبقى مش ها نتفق ..

هي / ليه ؟
أنا / لأن أول شرط لخفض وزنك هو الابتعاد عن السكريات والحلويات والتقليل من النشويات والدهون

هي / كمان ؟
أنا / مفيش طريقة غير دي. وبعدين انتي لازم تستني لحد اسبوعين قبل خطوبتك علشان تقرري تنزلي وزنك؟

هي / أنا كنت فاكرة ان اسبوعين فترة كافية جدا
أنا / فترة كافية؟ مين اللي قاللك كده؟

هي / واحدة جارة إبن خالة أمي إللي هوا ساكن فوق الحاج إسماعيل بتاع ...... مالك يا دكتور !!


( يتبــع )

.
ثلج مشوي2007
ثلج مشوي2007
( 4 )
قـالـولــــــي




هي / أنا خايفة قوي من الليزر دا يا دكتور
أنا / وخايفة منه ليه ؟

هي / علشان قالولي انه خطر على الصحة
أنا / مين اللي قال كده ؟

هي / مدرس الانجليزي بتاع بنتي

أنا / ومدرس الانجليزي بتاع بنتك دا دارس في علوم الليزر؟

هي / لأ
أنا / طب بيتكلم عن الليزر ليه ؟

هي / يعني ... !

أنا / أنا ممكن أقبل الكلام دا من أي حد يكون دارس لليزر وساعتها ها اناقشه
ويا إما يقنعني أو أقنعه.. خصوصا اني دارس أكاديمي لعلوم الليزر الطبية
ولي خبرة فيها عدت العشرين سنة

هي / يعني الليزر مش مضر ؟
أنا / ياستي هو فيه دكتور يحترم مهنته وعلمه ونفسه يستعمل حاجة تضر مريضه ؟

هي / أصل هم قالولي .....

أنا / تاني ؟



( يتبــع )

.
.
ثلج مشوي2007
ثلج مشوي2007
( 5 )
حتة صغيرة



هي / أنا عاوزة أخس يا دكتور.. بس من فضلك ما تحرمنيش من الرز والمكرونة والخبز والشوكولاتة والجاتوه
وبعدين أنا مش باحب الحركة.. وبأسهر للصبح وبأنام للساعة 4 بعد الظهر ..

أنا / (في حالة صدمة) يعني انتي بتعملي كل حاجة تزيد الوزن.. وبعدين في أول كلمة معايا بتفرضي شروطك؟

هي / أنا بأكلمك بكل صراحة
أنا / وأنا كمان ها أكلمك بكل صراحة .. انتي عشتي حياتك بطريقتك.. والنتيجة إنك وصلتي لعيادة طبيب بيعالج السمنة.. ليه ما تجربيش طريقتي أنا بأه ؟

هي / وهي إيه طريقتك يا دكتور ؟
أنا / إننا نتعامل مع جسمنا بالطريقة الصح .. الطريقة اللي مفروض نتعامل معاه بحيث نتمتع بالصحة ووزننا يفضل كويس

هي / أزاي ؟
أنا / لازم في الأول نصلح الاخطاء اللي قمنا بيها في حق جسمنا .. فيه خلل حصل في الهورمونات نتيجة الوزن الزائد
مثلا أنسجة الجسم بتقل حساسيتها للانسولين لما يكون فيه دهون زيادة
وبالتالي البنكرياس بيفرز انسولين أكثر علشان الانسجة تحس بيه
فيحصل جوع زيادة وأيضا تخزين لكل حاجة بتاكليها في الجسم فيزيد الوزن

هي / يا نهاري ......... طب ونصلح الخلل دا ازاي ؟
أنا / هنا بقي دوري أنا .. ها نقلل الأغذية اللي بتنشط افراز الانسولين في الجسم
وفي نفس الوقت بتقلل الوزن، فيرجع مستوى الانسولين للطبيعي ويقل تخزين الجسم للغذاء

هي / طيب الحقني يا دكتور بالعلاج دا ..
أنا / العلاج في طريقتنا بيكون بالالتزام بأنواع معينة من الأكل في أول اسبوعين ثم نتدرج لحد ما توصلي انك تقريبا تاكل كل حاجة بتفيد الجسم ومش ها تتحرمي من حاجة

هي / صحيح يا دكتور مش ها انحرم من حاجة ؟ يعني ها أكل تورتة وجاتوه وبسبوسة وكنافة ؟
أنا / لا .. الموضوع مش كده.. فيه أنواع طعام لازم تحترسي منها جدا علشان تحافظي على وزنك اللي ها توصليله

هي / يعني برضه حرمان ؟
أنا / مفيش حاجة غالية من غير ثمن .. ممكن تشتري جوهرة ثمينة ببلاش؟ ولا لازم تدفعي فلوس مقابلها ؟

هي / طبعا لازم الحاجة الغالية يندفع تمنها
أنا / الصحة والرشاقة حاجة غالية جدا وتستاهل تدفعي قدامها بعض الحرمان من الأغذية ذات التأثير السيء على الصحة

هي / طب ممكن يا دكتور طلب؟
أنا / اتفضلي

هي / يوم الجمعة الجاي عيد ميلاد ابني.. ممكن أكل حتة تورتة ؟
أنا / ( بيأس) الظاهر ان كلامي ما وصلش لحضرتك .. يا هانم انتي بتتعالجي من مرض اسمه السمنة.. ولازم تلتزمي وتقاومي

هي / طب حتة صغيرة بس
أنا / (محاولا التذرع بالصبر) حتة قد ايه يعني ؟

هي / يعني.. قد كده مثلاً ( وأعطت مثال في حجم رغيف العيش ) .......... الله...... دكتور .. مالك .. هو جراله ايه ؟
أنا / ................. !!



( يتبــع )