نكمل سوا

الله يسلمكم جا ابونا من الصلاه وحطينا العشا وتعشينا ياربي لك الحمد والشكر


بعد ماخلصنا اخذت الشاي لزوجي وكان قاعد على التليفزيون قلت خلني اجلس معاه لان هذه الفرصه الوحيده اننا نجلس مع بعض خلال اليوم غير اني كنت تعبانه وظهري يعورني قلت ارتاح وبعدين اكمل شغل
جلسنا نتفرج على التلفزون
اقولكم الصراحه انا مو راعيه مسلسلات لا برمضان ولا غير رمضان ياربي لك الحمد قنواتي المفضله الي دايم احط عليها يالمجد او فتافيت اشوف لي طبخه جديده واصلا برمضان ماعندي وقت فما افتح التليفزيون ابد الا نادرا
للاسف عندي دش وياما طلبت من زوجي نتخلص منه خصوصا قبل رمضان الح عليه بس ما بعد فتح ربي على قلبه ادعوا له تكفون يوافق ويشيله ويحط لنا المجد اصرف
هو فعلا الحمد لله حاذفين اغلب القنوات من ام بي سي وغيرها تاركين بس قنوات الاخبار وقطر والكويت ودبي وبدايه والمجد وفتافيت بس حتى ودي اتخلص من الدش كله وارتاح
المهم اكمل لكم سالفتي جلسنا بعد المغرب نقلب بهالقنوات والا الله لايوريكم مسلسل ورا الثاني وبرامج سخيفه من كاميرا خفيه واشكالها ترجيت زوجي يفكني من كل هالغثا ويحط على المجد والحمد لله جلسنا نتفرج على برنامج اسره واحده مع الشيخ الماجد

اذن العشا وطلع زوجي للصلاه
قمت انا طبعا اكمل شغلي من تنظيف المطبخ وباقي البيت واسمع صوت المسجد وهو يصللي التراويح
آآآآآآآآآآآآآآآآآآآآآآآآه والله ماتتخيلون وش كثر اتمنى اصللي التراويح بالمسجد
والله لها طعم ثاني
بس الشكوى لله ما اقدر اطلع بعيالي حتى لو كان المصلى فيه قسم خاص للاطفال لانهم اسم الله عليهم حركين واخاف يطلعون للشارع فماراح ارتاح بصلاتي ابد ....بس ربي يشهد علي واعلم بنيتي سبحانه
صح اصللي بالبيت بس صلاه الله اعلم بها كلها اصللي وانا اتصدد واسد اذاني لااسمع هوشه والا صيحه يعورني قلبي واتلخبط بصلاتي
كملت شغلي كالمعتاد وكل تفكيري وش اسوي لهم عشان يلهون شوي عني وقت صلاه التراويح

خلصت شغلي روشت عيالي ولبستهم واخذت لي انا بعد دش وجيت ابشغل الفواحه الا اشم ريحه هاك البخور الي تهبل صارت سلفتي الي ساكنه تحتنا مبخره بيتهم وواصلتنا الريحه الصراحه اشتهيت ريحه البخور الله لايحرمنا من فضله والله مامثلها
واجيكم واحط بخور وابخر البيت وشرشفي وسجاده صلاتي


توضيت وصلليت العشا والسنه
جيت ابصللي التراويح يوم بدو عيالي يحنون وجاهم الملل ولازم اشوف لهم شي يسليهم << الله يعظم اجري
الصراحه مالقيت شي طلعت لهم العابهم بس ماطالعوا فيها حتى قلت يابنت الحلال توكلي على ربك وكبري وصللي وخليهم وفعلا كبرت وصلليت تسليمتين الله اعلم بهم بدوا من الطفش يتهاوشون قدامي على السجاده
بغيت اوقف صلاتي بس قلت وشوله خلني اكمل بكيفهم وصلليت تسليمتين ثانيات وسبحان الله دخلوا خلالها لغرفتهم ولا لهم حس
ياربي لك الحمد والمنه

بعد الصلاه جهزت سحورنا وكان مكرونه

جا زوجي من برا وقالي بكرا بيطلع للاستراحه عندهم فطور جماعي وكل من بيجيب معه طبق فكرت وش اسوي له وقررت اسوي مطبق قلنا نطلع للسوبر ماركت نجيب اغراض كانت ناقصتنا

رجعنا طبعا ومعروف الروتين
سحور ثم معركه النوم اليوميه مع عيالي
انهاء بعض اعمال البيت الخفيفه
وجلسه بعدها على النت اكتشفت خلالها ان الشبكه عندنا فيها مشكله ان شاء الله تنحل بكرا

هذه كانت يومياتي
يمكن تشوفونها روتينيه وممله لكن هذه حياتي .....كوني اعيش بعيد عن اهلي فطلعاتي قليله حتى اهل زوجي مسافرين وانا بطبعي انطوائيه ومالي صديقات وزوجي ايضا مايحب اني اطلع من البيت مع اني احب اروح دورات ومحاضرات لكن والله تركت كل شي وجلست مقابله بيتي وعيالي مثل مايبي
عيالي هم محور حياتي وشاغلين معظم وقتي يروح يومي وانا افكر واخطط لهم ونلعب شوي ونتهاوش كثير خخخخخخ بس الحمد لله الله يعينني على تربيتهم واشوف برهم ونفعهم قولوا امين
متعتي الوحيده هي هذا العالم الجميل معكم خواتي
والمسنجر اتواصل به مع اهلي واسولف معهم واخذ اخبارهم واعرف وش صاير بالدنيا

وهالحين ياحلوات اسمحوا لي بروح اصللي وتري واقرأ الي يكتب لي ربي وانتظر صلاه الفجر

الف شكر يالغلا والله يجعله بميزان حسناتك واسفه اني رديت قبل تكملي :35:

بس حبيت اشجعك وادعوا لك على عملك الطيب والمفيد لا حرمك الله الاجر :26:

السلام عليكم ورحمة الله وبركاته
حياكم خواتي في يومياتي




كالعاده استيقظنا اليوم على صلاه الظهر وراح زوجي للصلاه
صلليت الظهر وقرأت ماتيسر لي من القران ...رتبت البيت على السريع
قاموا عيالي وافطروا وبدلوا ثيابهم
دخلت المطبخ عشان اجهز مكرونه بالبشاميل عشان ياخذه زوجي معه للاستراحه << كنت ناويه مطبق بس مالقيت كراث
طبعا اهم شي طول ما انا اشتغل فاتحه على اذاعه القرآن وغالبا يوافق وقت شغلي في المطبخ وقت برنامج للشيخ سلمان العوده عن تفسير القرأن مره حلو
حبيت اذكركم واذكر نفسي خواتي باهميه احتساب اجر تفطير صائم وانتي تجهزين سفرتك او تجهزين طبق لزوجك ياخذه معه
انا كان ممكن اقوله يجيب اي شي من برا وماراح يقولي لا لانه الله يجزاه غير يراعي ضروفي وان ماعندي شغاله بس انا والله قلت خلني احتسب اجر اني ارضي زوجي وافطر الصائمين الي بالاستراحه بيفطر معهم ....
الحمد لله كالعاده شطبت شغلي ونظفت المطبخ على وقت صلاه العصر ...
طبعا كالعاده لازم اشغل الحلوين الي عندي لانهم صايرين مثل البطه وعيالها بس يمشون وراي
قلت يابنت الحلال خذيها من قاصرها وهاتي المصحف واجلسي عندهم بالغرفه
جبت مصحفي وجلست اقرأ قراءه الله اعلمها استغفر الله بس من كثر مايتهاوشون واصلح بينهم:angry2:
المهم اني ما اضيع ساعات نهاري سدى

قرب وقت المغرب وخرج زوجي للاستراحه اليوم ابفطر لحالي:(

على فكره الاستراحه الي راح لها زوجي يجتمع فيها اقاربه رجال ونساء يفطرون المغرب ويطلعون يصلون التراويح في مسجد امام الاستراحه ويرجعون يجلسون بالاستراحه حتى الساعه 12
انا الصراحه ما احب افطر برا البيت لاني زي ماقلت لكم وقت المغرب عندي وقت مقدس احب الهدوء اجلس مع مصحفي واسمع الدعاء الي بقناه المجد بصوت هاني مقبل
قلت لزوجي يرجع لي بعد صلاه التراويح عشان نروح للاستراحه اسلم على قرايبه

المهم يوم قرب الاذان جيت اطلع الشوكولاته لعيالي مثل ماتعودت بس تذكرت ان زوجي غير موجود من غير شر
قلت خلهم يجلسون معي يونسوني
جبت صينيتي وقعدت معهم



طبعا ضيعوا علي صفاء وسكون هذه اللحظات بس معليش بكرا يكبرون ويعقلون

صللينا المغرب وسخنت باقي الشوربه والمكرونه من امس وتعشيت انا وعيالي

الحمد لله ماكان عندي شغل كثير في المطبخ شطبت بسرعه وطلعت

فكرت وش اخذ معي للاستراحه لاني الصراحه ما امداني اجهز شي


فكرت اجمع بعض اشرطه الكاسيت الي عندي الي سبق وسمعتها وبعضها مكرره عندي مع بعض الكتيبات الي قرأتها وخلصت منها قلت اخذها واخليهم يطلعون عليها والي تحب تاخذ منها شي تاخذ
رتبتهم وحطيتهم بكيس

اقولكم الصراحه انا ماعندي جرأه اني اتكلم في مجلس او القي كلمه او اقرأ من كتاب مثلا ...ومو قصدي الجرأه ولكن قصدي اني ماعندي العلم الشرعي الكافي الي يؤهلني لهالشي
لكني دايم كل ماقرات موضوع جديد في النت سواء ديني او اجتماعي احتفظ فيه وممكن اطبعه واجيبه معي لجلستنا ونتحدث ونناقش الموضوع بشكل عام كل من يدلي بدلوه
المره هذه تذكرت قصه وفاة اختنا الداعيه ام وليد الناجم الله يرحمها ماشاء الله تبارك الله والله اني اغبطها على حسن الخاتمه الله يرزقني واياكم مثل خاتمتها ماشاء الله
فحطيت هالموضوع في بالي وقلت اشوف وقت مناسب افتحه خلال الجلسه عشان نتناقش عن حسن الخاتمه ..

حبيت اجهز طبق حلو اخذه معي بس ماكان فيه وقت لاني كنت ابصلي التراويح قبل لايجي زوجي

جهزت غيارات عيالي وشنطتهم لبستهم وخليتهم جاهزين ومسكت مصحفي وتوجهت لسجادتي لاصلي العشاء والتراويح وقلت لهم خلكم هادئين والا ماراح نروح الاستراحه ...ولكن لاحياه لمن تنادي:icon33:

الله يصلحهم والله انهم يتسلطون وقت الصلاه لدرجه اني وانا اصللي من كثر مايزودونها بالشقاوه والتخريب ابدا اضرب بايدي على فخذي عشان يهجدون حتى هم باسم الله عليهم من يسمعون هالصوت يتناحشون
والله ماخلصت صلاه الافخذي ورم من كثر ما اضرب عليه :09:
المهم حبيباتي لبسنا ورحنا للاستراحه ورجعنا على الساعه 12 ونص
الصراحه اني ما احب اطلع من البيت من الغثا وقت الطلعه ووقت الرجوع للبيت ...من دخلنا على طول تكرمون للحمام اروشهم والبسهم بيجاماتهم ...وبس ركضه وحوسه وراسي منقلب ما ادري وش الحق عليه على الابو والا عياله :06:
حطينا السحور وتسحرنا زوجي نام وعيالي مانامو
قلت خلني اقعد على النت وهم سدحتهم على الارض عندي

سبحان الله اليوم كنت ناويه اقعد على النت ابدور افكار للعيد عشان ازينها قبل دخول العشر بس ماكان معي وقت ان شاء الله بكرا احاول القى فرصه
حتى زوجي مضيق صدري اغلب وقته على التلفزون لازم القى له فكره او طريقه احرك فيها همته ....لكني الان تعباااااااااانه وفيني النوم طلعه الاستراحه هدت حيلي ....

وين عيالي مالهم حس !!!!!!!!























هذاهم ناموا



اسمحوا لي بروح اوديهم كل واحد لسريره
واصلي الوتر وانتظر اذان الفجر

اشوفكم بكرا ان شاء الله

تصبحون على خير

السلام عليكم جميعا اخواتي

حياكم الله مع يومياتي



كالعاده استيقظنا لصلاه الظهر

بعد الصلاه قال لي زوجي انه بيسافر لمدينه برا الرياض عشان يسلم على امه ويبارك لها بالشهر وراح ينام هناك ويرجع بكرا
قلت تروح وترجع بالسلامه ...طلع زوجي
قررت بما انه ماعندي طبخ اليوم راح يكون اليوم يوم الغسيل العالمي



عندي غسالتين شغلتهم الثنتين ويادوب الحق ودي اخلص قبل العصر لان اخوي بيجي ياخذنا نفطر معهم في بيته - مع اني ما احب افطر برا بيتي مثل ماقلت لكم بس للضروره -وبننام الليله عندهم فقلت ادخل الان اعلمكم وش صار معي قبل لااطلع لاني الليله ماراح اكون موجوده
للاسف اليوم لم اقرأ الكثير لاني انشغلت بس ان شاء الله اباخذ مصحفي معي واعوض في بيت اخوي وراح تكون فرصه اصلي التراويح وانا مرتاحه لان عيالي بيصيرون لاهين مع عيال اخوي
والله ماودي بالروحه لاني اكيد بيروح وقتي سواليف مع مرت اخوي ياحبي لها بس الشكوى لله يوم دروا ان زوجي مسافر اصروا اجي عندهم وقالو مايصير تنامين بالبيت لحالك مع اني متعوده وعادي عندي بس ماحبيت ازعلهم

هذا هي اغراضنا عند الباب


8
8
8
الي في الكرتون تمر برحي من مزرعه حمولتي

الان اسمحوا لي بروح اصلي والبس والبس عيالي لان اخوي جاي في الطريق اشوفكم بكرا ان شاء الله

مثل ماقلت لكم امس الخميس طلعنا لبيت اخوي افطرنا معهم وقضينا اليوم كله هناك للاسف ماقرأت وصلليت التراويح مثل ماكنت ابي
ضاع وقتنا بين العيال وحوستهم وشوي سواليف من هنا وهنا مع مرت اخوي ياحبي لها غير انه بعد التراويح جت مرت اخوي الثانيه وكملت الجلسه وانبسطنا مره الحمد لله والله يتوب علينا ويعيننا على طاعته يارب

اليوم كان اول جمعه في هالشهر الفضيل
صحيت على الساعه 1 ونص <<<< مبسوطه ماوراها مسئوليه
لاتحسبوني احب النوم بس والله كانت نومتي الله اعلم بها
تخيلو نومنا عيالنا الساعه 3 الفجر انا ومرت اخوي بالحسره
متى تتخيلون قاموا ؟؟؟؟


الساعه 8 الصباح
صحيت من ازعجهم كانوا نايمين في الغرفه الي جمبي ونكدوا علي الله يصلحهم
المهم صلليت الظهر وجلست اقرا الي فاتني ابي الحق اختم قبل نص الشهر بس شكلي ماراح اقدر:06:

نزلت اشوف مرت اخوي وش محتاجه مساعده في المطبخ لقيتها مخلصه شغل وعندها خدامه كملت الباقي رجعت كملت قراءه الى العصر

بعد العصر جا اخوي واستحيت ما اقعد معه قضينا العصريه اغلبها في سواليف وانشغلنا مع الاطفال نغديهم وبعد ماخلصنا من سفرتهم جهزنا لسفره فطورنا وافطرنا ولله الحمد

وش تتخيلون سويت بعد الفطور ؟؟؟؟؟؟
رحت حطيت راسي ونمتتتتتت<<<<<:hahaha:
الصراحه ان الحريه لها طعم ....حلو تجين تلقين سفره اشكال والوان ياربي يديمها من نعمه تاكلين وتقومين تغسلين ايدك بدون مايكون كل تفكيرك من الي بيغسل الصحون ومين الي بينظف وماتشيلين هم عيالك يزعجونك والا يخربون والا يكسرون بس معليش كل شي باجره
اخذت لي غفوه تقريبا نص ساعه وقمت والمسجد يصلون التراويح
صلليت العشا والي كتب لي ربي من التراويح
اتصل زوجي وقال انه وصل للرياض بالسلامه وقال امر اخذكم قلت لا بنروح نزور بيت عمي تعال خذنا بعدين
بعد الصلاه لبسنا ولبسنا عيالنا ورحنا لاجتماع اعمامي
كان اجتماع بسيط وخفيف
جا زوجي بعدها اخذنا ورجعت لبيتي وعشي وجنتي
يالله وش كثر احب بيتي
ماتتخيلون وش كثر فرحت وانا داخله
على طول رتبت اغراضنا وخلصت كم شغله وقلت ابلحق اسلم على خواتي في الله وحبيباتي بنات حواء واعلمهم وش صار معي
كان ودي حبيباتي يكون معي كم صوره لتقرير اليوم بس للاسف ماصار نصيب اعوضكم بكرا ان شاء الله



نقطه حبيت اضيفها على كلام اختي نوني ياحبي لها والله انها تكلمت عن شي كان بخاطري من زمان
وهي ان الاعمال الصالحه يفسدها الرياء وفعلا هالشي كان مضيق صدري واحاول قد ما اقدر اتلافى هالموضوع قدر الامكان وما اتكلم عنه
اذا كان الصدقه كما سمعت عن الرسول صلى الله عليه وسلم انه الرجل ينفق ما تدري يسراه ماذا انفقت يمينه من كثر مايحرص على اخفائها فموضوع الصدقه واعمال اخرى كثيره الافضل مانتطرق اليها الا بالحث والتذكير ويكون تركيزنا على اعمال ووسائل يوميه تعين الزوجه على تنظيم جدولها اليومي في ظل تراكم الاعمال المنزليه ورغبه الزوجه في انها توفق بين الطاعات والعبادات وشئون المنزل بحيث نعطي بعض افكار حلوه تضفي روح جديده على بيوتنا في هالشهر الكريم
هذه وجهة نظري واترك الرأي للمشرفات على المسابقه جزاهن الله خيرا

حبيباتي رغم غيبتي القصيره عن بيتي الا اني قصرت في شئون عبادتي الكثير وهالشي خلاني اقطع وعد على نفسي اني احاول قد مااقدر اني اختصر خروجي للاجتماعات النسائيه قدر الامكان واغتنم وقتي في طاعة ربي احسن لي حتى الاقرباء راح تكون زياراتي قصيره ومختصره لاداء حق صله الرحم فقط

اذكركم ونفسي بهالدعاء

اللهم طهر قلبي من النفاق وعملي من الرياء

آمين يارب

اترككم في حفظ الرحمن واشوفكم بكرا ان شاء الله