وانا طولت الغيبة ..وجيتكم بمسلسل رمضاني من تأليفي ..ان شاء الله مايطول مسلسلي .. ويكون مسلي وتعريف ببعض تراث اهل الجحاز..
تابعو معانا يوميات ربيعة..:21:
الله اكبر الله اكبر..
_ اصبحنا واصبح الملك لله ..
يوم جديد ..بدأنا على بركة الله .. كل يوم تمر علي الافكار والخواطر سبحان الله كيف
ننام وكيف نقوم !!..الحمد لله على الصحة .
ناديت (حسن) جوزي عشان يصحى لصلاة الصبح: _(حسن) قوم صلي ادن الصبح.
_طيب ..طيب.
_دايما تقول طيب وبعدين تستنى الاقامة ..قوم الله يهديك.
قام يفرك عيونه .
كملت لفتي على البيت اصحي البزورة ..الله يهديهم متعبين مرة.
_(رنا )..(رنيم)..قومو _الله يصلحكم _صلو…..
رحت اصلي انا كمان ..وارجع اشيك عليهم ..صحيو والا لا؟!
_صليت وخلصت صلاة وهدول لِساع نايمين..قومو يابنات ماتجو بالطيب..لازم من
المُناحلة ..قومو هيا بلا مجغنة.
اخيرا قامو ..الحمد لله اليوم ربوع يعني بكرة مافي نكد الصبح حق المدارس اليي راح يبدأ بعد شوية.
جاتني(رنا) في المطبخ وانا بأعبي الفطور : (ماما) ..ابغى بيض مطجن في السندوتش اليوم.
فرصعت عيني فيها استناها..!!
_:لو سمحت يا (امي).

_ طيب من عيوني ياقمر.
_ (ماما) وانا ابغى جبنة بيضا ..لو سمحت.
_طيب (يارنيم) ..ياقمر.
رجع (حسن) من الصلاة ..جا من ورايا وسلم ..
_ ايش بها عيونك منفخة كدا

_ مدري عنها ..(ياربيعة) شكلها الحساسية.
_لاتكون مسكت البسة مرة تانية

ضحك وراح يلبس.
_ايش دا (ياحسن) بالله ؟

_اقول الله لايجعلهم زي عندهم حساسية .
_ ايش تبغى تفطر؟
_شابورة وشاهي.
_وجبنة صفرا؟
_وجبنة كاسات كمان.
حطيت تبسي الفطور في الصالة ورحت بسرعة اساعد البنات في اللبس..وعبيت
الفسح واخيرا وبعد ما انقطع صوتي قعدوا على الفطور.
_(مــــــــــامــــــــا) صحي (احمد) .

_الله يصلحك يابنتي.. ليش صحيتيه ..انا مو قلت لا تروحي غرفة اخوانك.
_انا مارحت ..(رنيم) اليي راحت ولعبت بالسيارة اليي تطلع صوت..
_ وانتي خاتم بفصه وكل شي نرصه..كم مرة قلت لك بطلي لقلقة روحي افطري الله يهديك.
_تعال يا (احمد) روح الحمام ..وبعدين تبغى حليب وشابورة.؟
_ابغــــــــى عصيــــــر ..اهئ

_تعال ياولدي اصبح..

_ يابنات هيا ..بسم الله خرجنا…وردو الاتنين بصوت واحد ..
_وعلى ربنا توكلنا.

_ في امان الله ..
درت وجهي على (احمد) اليي كان ماسك وصلة الشابورة ويزن ..
_متى تروح المدرسة انت كمان؟
ايش يا حركات ..
كملي كملي ..
وش سويتو عالغدا ..