الحلقة الثالثة عشرة


الموقف الأول

مره من المرات كنت موصل حرمه مع ولدها لسوق الديره اللي قريب من امارة الرياض ولما نزلتهم جتني حرمتين من الباب الثاني وركبو بدون ما يكاسروني بالسعر وبعدين
قالت لي وحده فيهم : ابيك توصلنا لشارع السويلم حق العطورات
قلت لهم : ان شاء الله
وحنّا وسط الزحمة كانت وحده فيهم تسألني
وتقول لي : توصل مدرسات وطالبات للمدارس والجامعات
قلت لهم : ايه
قالت لي : طيب بكم توصلنا
قلت لهم : بصراحه انا الحين عندي ناس اوصلهم ولا عندي وقت اقدر اوصلكم فيه
قالت لي : طيب تعرف احد يوصلنا عن طريقك
قلت لهم : اعرف واحد بس انه جديد على الشغله ولا اقدر اضمنه لكم
قالت لي : لا نبي واحد عنده خبره في الشوارع

المهم

بعد ما وصلنا لشارع السويلم عند محلات العطور
قالو لي : خلاص وقفنا هنا

ولما نزلو قالو لي : ها كم حسابك ؟
قلت لهم : عشره ريال
ولما عطتني وحده فيهم العشره
قالت لي وهي تدخل السوق بسرعه : هيه شف وش مكتوب بالعشره

ولما قرأت المكتوب بالعشره بصراحه ندمت اني وصلتهم
الحيوانه كانت كاتبه
( بنت ابوها اتصل نصل = ؟؟؟؟؟؟؟؟0555)
حسبي الله ونعم الوكيل


الموقف الثاني

مره من المرات كنت امشي من عند سوق المعيقلية وأشر لي هذا الرجال المطوع وكان من اهل حائل وكان عنده شغل بالرياض وبيرجع بعد كم يوم


المهم

قال لي : بكم توصلني حي الخليج
قلت له : بـ 20 ريال
قال لي : ياحيي مدامك سعودي ابشر بعزك
وبعد ما ركب معي بدأت سواليف الطريق
وقال لي : ها كيف الليموزين معك عسا ان شاء الله به ربح
قلت له : الحمد لله به خير بس بنفس الوقلت فيه فتن عظيمة والعياذ بالله لو الواحد ما يخاف الله قسماً بالله يروح فيها ويضيع مستقبله بس ما اقول الا الله يصبرنا
قال لي : شكلك تشوف بلاوي به الليموزين ؟
قلت له : والله اشوف العجب العجاب
قال لي : وش اخر البلاوي اللي صارت لك
قلت له : عن الموقف الاول اللي ذكرته في بداية الحلقه حق العشره ريال
وبعدها قال لي عن موقف صار لواحد من اخوياه بس موقف فيه حركه ذكيه
قال لي : هذا واحد من اخوياي مطوع وملتزم ورجال يخاف الله وكان الرجال مرررره وسيم وكان عنده مشكله وهي ان وجهه ما يطلع فيه شعر الا قليل جداً
قلت له : وشلون ما يطلع فيه شعر ؟
قال لي : يعني ما يطلع له شنب ولا دقن الا دقن خفيفه جداً ما ينشاف الا اذا قربت له وكان ما شاء الله عليه جميل
المهم
مره من المرات راح يوصل امه واخوه واخته للسوق وكان جالس بالسياره ينتظرهم
وهو جالس ينتظر
جته بنت جريئة جداً وفتحت عليه الباب وركبت بدون أي مقدمات
وقالت له : يلا امش شف لك أي مكان بسرعه
وهو بعدها انفجع وانبهر من الموقف اللي صار له
وقال لها : يا اختي انا ماني راعي الحركات هذي اتقي الله وانزلي الله يهديك
قالت له : والله اذا ما مشيت بشقق هدومي وقول انك خاطفني
وبعدها الذكي جلس يفكر عن حيله يبي يصرف فيها البنت
ما شاء الله عليه
تدرون وش سوى ؟

نزل وفتح الباب حق البنت وجلس يصرخ
ويقول : اقول انزلي حسبي الله عليك انتي طالق طالق طالق وخلي اهلك ينفعونك يلا انزلي انا ما ابيك انتي طالق اقول انتي طااااالق
وبعدها جلس يسحبها مع الباب والبنت انصدمت من الحركه اللي سواها فيها وماتت من القهر
وبعدها هو ركب سيارته ومشى من عندها والظاهر غير موقفه اللي كان واقف فيه عشان ينتظر اهله
ههههههههههههههههه
من جد عجبني
أسأل الله القدير رب العرش العظيم بأن يحفظ أبناء المسلمين من شر الفتن وشر المعاصي
انه سميع مجيب


معليش اكمل معكم باقي المواقف في الحلقه القادمة لأني بصراحه مررره تعبان

وانتظروني في الحلقة القادمة مع موقف توصيلي للجثة من مخرج 15 إلى نهاية مخرج 16 بحي السلي

قبل ما أنهي الحلقة أحب اوصيكم بقراءة سورة الكهف يوم الجمعه ترا فيها اجر عظيم وتحفظ الواحد من المشاكل وترا وقتها من بعد شروق شمس الجمعه إلى وقت غروبها لا تفوتكم تكفون

للحديث بقية

محبكم في الله وسائق الليموزين / عبرود

الحلقة الرابعة عشرة


قبل ما أبدأ بالمواقف اللي تصير لي مع الزبائن بقول لكم عن حي من احياء الرياض اسمه على ما اعتقد حي الواحه ويقع خلف قصور العويضه اللي على طريق الملك عبدالله

المهم

قبل أجازة الحج خذيت لي طالب من جامعة الامير سلطان بن عبدالعزيز اللي على طريق الملك عبدالله وبصراحه الولد ما شاء الله عليه شكله ولد نعمه باين من ريحته ولبسه المرتب

المهم

قال لي : ابيك توصلني قدام على طريقك
قلت له : أبشر
وكان موقع بيته في حي الواحه على ما اضن وبصراحه نزلته عند بيت ما شاء الله تبارك الله مرررره روعه وبصراحه المشوار قيمته خمسة ريال وعطاني عشرة ريال من قوة الكاش اللي معه الله لا يضرّه
وبعدها جلست ادور في الحارة واتفرج على البيوت اللي هناك قسماً بالله ثم قسماً بالله ثم قسماً بالله لو معي مثل ثروة الوليد بن طلال وخيروني بقصر أو ببيت مثل هذي البيوت والله ما اشتري الا مثل هذي البيوت اللي هناك وابي مثل مساحتها وهي على ما اعتقد مساحتها على 900 متر أو 1000 متر والله العظيم في بيوت في هذا الحي عليها تصاميم تخليك غصب تجلس تتفرج عليها من روعة التصميم وبصراحه احس اللي مصمم البيوت هذي واحد راعي مزاج رايق مررره لذا انصحكم تاخذون جولة في هذاك الحي وبعدها ما تلوموني اذا شفتو تصاميم البيوت ما شاء الله تبارك الله

أللهم أرزقنا الجنه


نرجع لمواقفنا مع الكستمر اقصد الزبائن اللي اوصلهم

الموقف الأول

كنت امشي عند سوق الزل اللي في شارع الثميري واشر لي رجال كبير في السن على ما اعتقد عمره 60 سنه بس مواصفاته ما شاء الله عليه 40 من قوة الصحه اللي هو فيها ما شاء الله عليه

المهم

قال لي : ابيك توصلني حي النظيم
قلت له : ابشر
قال لي : بكم ؟
قلت له : بـ 30 ريال
قال لي : تستاهل
وبعدها ركب معي وكان معه كيس فيه 7 عقل (جمع عقال) وسبع طواقي (جمع طاقية) وسبع علب شماغ بروجيه بس مدري كم مقاساتها وبعدين سألته
قلت له : ماشاء الله شكلك تبيع شمغ وعقل وطواقي
وبعدها جلس يضحك علي
وقال لي : انت متزوج ؟
قلت له : لا والله باقي ما تزوجت
قال لي : اهااا اجل اذا تزوجت بقول لك وش اسوي بالعقل والشمغ والطواقي
ههههههههههههههه
قلت له : افااا ليش ؟
قال لي : هذي العقل والشمغ والطواقي شاريها لعيالي عشان عندنا عرس بعد أسبوع وابيهم يلبسونها
قلت له : ما شاء الله كم عندك ولد ؟
قال لي : عندي 12 ولد
قلت له : طيب معقوله ما يقدرون يشترون لهم شمغ وطواقي وعقل بنفسهم
قال لي : لا انا ما خلي احد يطلع برا البيت ولا يروح محل الا وانا معه
قلت له : ليش كم اعمارهم ؟
قال لي : اصغر واحد فيهم عمره 4 سنوات والأوسط عمره 16 سنه
قلت له : ما شاء الله تبارك الله طيب اللي عمره 16 سنه ليش ما يشتري بنفسه شماغ وطاقية
قال لي : برضو ما اخليه يطلع برا البيت ياويل اللي ما القاه في البيت
قلت له : حتى الحاره ما يطلع لها ؟
قال لي : ايه حتى الحاره ما يطلع لها بس وقت الصلاة يمشون قدامي ويرجعون قدامي

المهم

لما وصلنا عند حارتهم
ههههههههههههههههههههههههههههههههههههههه
كانو عياله واقفين ومجتمعين عند باب البيت وسبحان الله كأنهم حاسين ان اللي راكب الليموزين ابوهم والله في خلال جزء من الثانيه تشوفهم يدخلون البيت بسرعه كانهم جرابيع يبون يدخلون الجحر
هههههههههههههههههههههههه
وبعدها جلس يقول : اوريك فيهم الحيوانات
قلت له : ليش ياخالي مافيها شي اذا جلسو عند باب البيت
قال لي : انا ماعندي بزارين يجلسون عند البيبان
قلت له : ترا ياخالي كذا بتخليهم يتعقدون منك
قال لي : طز فيهم
بصراحه بعدها انا سكت قلت في خاطري هو حر في عياله
بس تبون الصراحه الشيء هذا غلط

لأن المثل يقول
الشيء إذا زاد عن حده ينقلب ضده
يعني لما الواحد يشد على عياله بزياده على اللزوم بعدها لما يكبرون والله العظيم أي شي تافه قدامهم يشوفونه يجلسون يناظرون فيه ببجاحه ويمكن يوصل الأمر إلى تكسيره وتخريبه
لذى نصيحه لكل أب أسره بأن يربي عياله مثل صيد السمك بالسناره
وهو بأن يرخي الحبل شوي ويشد عليه شوي ولا يشده مررره ولا بعدين بينقطع الحبل في اخر المطاف

الموقف الثاني

طبعاً هذا الموقف صار في يوم عرفه أي قبل العيد
كنت ماشي من عند سوق الرياض مول وأشر لي واحد من أهل الجنوب وكان معه شنطه وأكياس فيها ملابس جديده وكيس فيه حلاوة سنيكرز وكيكه وعلبة لبن وقارورة ماء
وكان الوقت قبل صلاة المغرب بـ عشر دقايق لانه كان صايم صيام يوم عرفه

المهم

قال لي : ابيك توصلني حي الروضه عند خياط ناخذ ملابسي من هناك وبعدين تطلعني المطار
قلت له : أبشر
قال لي : بكم ؟
قلت له : الروضه بـ 15 ريال والمطار بـ 50 ريال
بعدها ركب معي
وقال لي : الللله ياخرجنا
قلت له : عسى ما شر وش فيك ؟
قال لي : ياخي انا اسافر للخارج بعض الاوقات وأروح للبنان ومصر وماليزيا والمغرب وأشوف حريم بدون عبايات ومع هذا محترمات اما هنا في هذا السوق تشوفهم لابسين عبايات ومتغطيات ولكن للأسف لبسهم ضيق ومخصر ويجلسون يطالعون في الشباب ويتحارشون معهم والله شي يقهر يارجل
قلت له : يارجال وما خفي فهو أعظم الله يستر على محارمنا بس
وبعدها دق جواله ورد عليه
وجلس يقول : هلا بعمري هلا بقلبي انا افدى هالصوت ياروحي ياشيخه

بعدها انا ضاق صدري قلت في خاطري هذا ما يستحي على وجهه وكان على بالي انه يكلم خويته او صديقته
وبعدين لما قفل الخط
قلت له : ما شاء الله شكلك راعي غزل وكنت ابي اشوف ردت فعله
قال لي : لا يارجل عيب عليك
قلت له : اجل جالس تكلم مين قبل شوي
قال لي : هذي عمري وقلبي ونور عيوني زوجتي اللللله يحفظها
هههههههههههههههههههههههههههه
قلت له : الله يخليها لك ان شا ءالله
وبعدين قلت له : ياخي شكلك عزوبي مو باين عليك انك متزوج
قال لي : ياخي انا موظف في شركة الاتصالات ومتزوج قبل شهرين وزوجتي عايشه في الجنوب وتشتغل مدرسه ولا لقيت لها نقل للرياض وبصراحه فقدت زوجتي ولي عنها الحين شهر بالضبط وابي اروح للمطار عشان اسافر لخميس مشيط واشوفها هناك
قلت له : اجل متحمس على الاجازه
قال لي : استناها بفارغ الصبر بس الله يخارجنا
وبعدين جلسنا نسولف عن حياته في الرياض
فقلت له : طيب انت عايش مع مين هنا ؟
قال لي : انا عايش لوحدي
قلت له : اجل تجتمع مع اخوياك في الليل
قال لي : تبي الصراحه بس ما ابيك تزعل
قلت له : لا عادي خذ راحتك
قال لي : بصراحه انا اكثر اخوياي من اهل الرياض وبصراحه شباب الرياض مع احترامي لك فيهم شوي غرور وفيهم شوي تكبر ياخي اذا طلعنا مع بعض لازم تلبس رسمي وتشخص كأنك بتروح لعرس او عزيمه مهمه وبعدين اذا جلست معهم يجلسو يترقون علي كاني مو سعودي
وبصراحه صرت اجلس مع اليماني والهندي حق المغسله واجلس اسولف معهم كل يوم ونشتري غدا وعشى مع بعض وبصراحه جلستي معهم احسن من ان اجلس مع اخوياي حقين الرياض والعمل
قلت له : الله يعينك
وبعدين سكت شوي
وقال لي : ياخي والله العظيم عندنا في الجنوب تجار ما شاء الله عليهم الواحد يملك ثروه بستطاعته يشتري نص الرياض ومع هذا تشوفه متواضع جداً ويلبس لبس عادي وعياله تشوفهم محترمين واخلاقهم عاليه اما انتم ياحقين الرياض للاسف ولا تزعل مني مغرورين شوي
على إيش مدري
هههههههههههههههههههههههههههه
وبعدين وحنا في الطريق للمطار جلس يرقص
ويقول : ياخي انا اليوم مبسوط مررره
قلت له : جعله دوم ان شاء الله
قال لي : اخ خ خ خ والله مشتاق للأهل ولزوجتي
وبعدها نزلته المطار

المهم

تبون الصراحه كلامه عن بعض اهل الرياض صحيح الا من رحم الله وهو ان فيهم شوي غرور وتكبر على بعض الناس وهذا الشيء للأسف اشوفه في بعض أقاربي
بس ما اقول الا الله يهدي الجميع



الموقف الثالث
وهو اغرب مشوار واغرب موقف صار لي من يوم اشتريت الليموزين

وهو موقف الجثه اللي وصلتها من مخرج 15 إلى نهاية مخرج 16 بحي السلي وبالقرب من عند بوابة سكن الحرس الوطني

المهم

وانا ماشي في طريق الـ 100 من عند مخرج 15 أشر لي هذا الرجال اللي لابس ثوب كله بقع دم وكان واقف في الشارع الثاني بحي السلام ولفيت له وفتحت الدريشه وكان ثوبه مثل ماقلت لكم فيه بقع دم
وقال لي : معي جثه ابيك توصلها لي نهاية طريق مخرج 16 بحي السلي عند سوبرماركت روم
وانا بصراحه كنت خايف شوي
قلت له : ابشر
قال لي : بكم ؟
قلت له : بـ 15 ريال
قال لي : انا بعطيك 20 ريال بس ابيك توصلها بسرعه
قلت له : ابشر
وبعدين جاب الجثه وكان حاطها في كيس زباله كبير اسود وهو شايلها كانت ثقيله شوي وكانت فيه نقط دم تنقط من الكيس
قلت له : لحضه الله يخليك خلني اجيب شي افرش فيه الشنطه عشان ما تبقع الشنطه لي تكفى
وبعدين شفت لي كرتونين فاضيات وشقيتهم من النصف وفرشت فيهم الشنطه وبعدها شلنا انا والرجال الجثه وركبناها وكانت ثقيله مرره وكان وزنها على ما اعتقد 120
وانا بصراحه كنت خايف شوي
وبعدين وصف لي الرجال العنوان وعطاني رقم جوال الرجال اللي بياخذ مني الجثه عشان اسلمها له اذا وصلت هناك طبعاً الرجال ما ركب معي بس عطانياها وقال لي وصلها هناك
قلت له : طيب ليش ما تركب معي
قال لي : انت شكلك ثقه ومنت مسوي فيها شي وانا بصراحه مشغول شوي

المهم

وانا في الطريق جلست افكر وش اسوي في الجثه هل اخذ الجثه وأسلمها للجهات المختصه ولا لا وبعدين قلت في خاطري يارجال المره هذي مشيها
وبعدين لما وصلت للعنوان اللي وصفه لي الرجال دقيت على الرجال اللي بيستلم الجثه مني وسلمته الجثه وبعدها مشيت من عندهم بسرعه عشان ما احد يشوفني
بس تدرون وش هي الجثه
÷
÷
÷
÷
÷
÷
÷
÷
÷
÷
÷



الجثه عباره عن ذبيحة حاشي كامله مع راسها
هههههههههههههههههههه
بس الغريب انه ما كان معي راكب فقط الذبيحه اوصلها من فرع لملمحة لحوم إلى فرع ثاني في حي السلي
والجهه المختصه اللي كنت ابي ابلغ عن الذبيحه عندها هي البلديه
بس قلت يارجال والله محد مسوي لك شي في البلديه
لانه بصراحه نقل الذبيحه بدون ثلاجه شي مقرف بس الشكوه لله


قبل ما أختم الحلقة أحب انصحكم بزيارة الأقارب ترا والله العظيم فيها خير وفيها اجر عظيم واللي زعلان من احد من أقاربه يروح يتصالح معه ترا الدنيا ما تدوم لأحد تسامح مع اللي زعلان معه قبل ما يموت أو تموت انت

والرسول صلى الله عليه وسلم يقول
لا يدخل الجنه قاطع رحم

لذا نصيحه بادر بزيارة الأقارب قبل فوات الأوان


وللحديث بقيه مع زبائن الليموزين



محبكم في الله وسائق الليموزين / عبرود

الحلقه الخامسة عشرة


الموقف الأول


بصراحه فيه بعض الحريم هداهم الله يقهرونك في بعض الحركات والطامّة الكبرى واللي تفقع مرارتي إذا قالت ياخزيااااه سعودي

اخ خ خ خ خ خ
بس

المهم

كلعادة إذا جيت اصلي لازم قبل ما ادخل أي مسجد احب دايماً اتطيب لأنه بصراحه لما تصلي وريحتك طيب تحس بخشوع وانت تصلي
وانا دايماً احط دهن عود معتق هندي مع ورد طائفي بصراحه الخلطه هذي إذا حطيتها تخلي كل من مر من جنبي يسألني وش الطيب اللي انت حاطه لذى نصيحه انكم تجربونها وهي تباع عند الشركه العربيه للعود ربع توله دهن عود هندي معتق مع ربع توله ورد طائفي قطفه أولى قيمتها 570 ريال بس والله خياليه

المهم

مره من المرات وقفت أصلي العشاء في جامع الامام تركي بن عبدالله اللي يصلي فيه مفتى المملكه الشيخ عبدالعزيز آل الشيخ حفظه الله
ومثل ماقلتلكم قبل ما ادخل المسجد لازم اتطيب

المهم

بعد ما طلعت من المسجد دخلت لشارع سوق الديره وأشرو لي ثلاث حريم ولما وقفت عندهم
قالت لي وحده فيهم : حي الملز شارع الظهران بـ 15 أوكيه

قلت لها : ان شاء الله

وبعدها ركبو معي ولما ركبو معي

الحرمه اللي كانت راكبه في الوسط
قالت : يعنبو ذا الهندي ريحته زينه

وانا ساكت ماقلت شي لأني عندي نظام اتبعه دايماً
إذا ركبت معي أي حرمه ما احب اسولف معها مهما صار الا اذا كانت حرمه عجوز ممكن اتكلم معها

اما الحريم اللي من الأربعين ونازل بس اقول لهم يمين ولا يسار ولا طوالي أو اوقف هنا فقط

لأنه بصراحه لو فتحت باب معها بالسواليف بعدها يجلس الشيطان بيننا وتصير سالفه مالها داعي

المهم

نرجع للموقف

وحنا في الطريق
قالت لي الحرمه اللي راكبه في الوسط : صدق أيش هذا طيب انت في حطي

وانا ساكت ما ابي اجاوب على سؤالها

وكررت السؤال مره ثانيه وقالت لي : هيه صديق ايش هذا طيب انت حطي

وانا ساكت ما ودي اعطيها وجه بالسواليف

وبعدها سوت حركه معي وقهرتني
مسكت كتفي وهزتني
وقالت : انت صديق ما اسمع وش انا اقول
وبعدها انفجرت عليها
وقلت لها : يا خاله الله يجزاك خير ما يجوز تتكلمين مع رجال مو محرم لك

وبعدها انحرجت وقالت : يؤه ياخزيااااه سعودي وبعدها سكتت لين وصلنا لمشوارهم

معنا كلامها يعني لو اجنبي عادي تتكلم معه
من جد شي يقهر


ما اقول الا الله يهدي ظال المسلمين



الموقف الثاني

مره من المرات كنت اوصل واحد بشارع الستين بالقرب من عند مستشفى قوى الأمن وكانت الساعه 1 ونصف الظهر وشفت لي شاب واقف على الرصيف ويطالع على جهة الغرب وبعدين مشيت ورحت اخذت لي زبون ثاني ولما مريت من عند نفس الشاب لقيته واقف مثل وقفته الاولى
وبعد نصف ساعه مريت من عنده ولقيته واقف نفس الوقفه ولا تغيرت وبعدها شكيت في الوضع وقلت ليش هذا ما يأشر لاحد وليش واقف كل هذا الوقت ولا ركب سياره
وبعدين وقفت عنده وتفاجأت بأنه شاب عمره في العشرين ولكن سبحان الله عيونه مختفيه من مكانها وكان أعمى الله يشفيه
وبعدين نزلت له وقلت له : يابو الشباب تبي اوصلك مكان
قال لي : لا بس ابيك توقف لي سيارة لليموزين
قلت له : ابشر انا سواق لليموزين
قال لي : لا والله ما توصلني بس ابيك تفزع لي بسيارة لليموزين لان مشواري بعيد
قلت له : والله العظيم انا سواق لليموزين عشان تصدق تعال قرب وامسك المصباح اللي فوق السياره
قال لي : لا مصدقك اجل تكفى قربني عند السياره
ولما ركب
قلت له : وين تبي اوصلك
قال : ابي عند نادي النصر
قلت له : اهم شي تدل ياخالي
قال لي : ايه ماعليك بس ودني مع طريق خريص بأتجاه طريق الحجاز
قلت له : ابشر

المهم

وحنا في الطريق طلعت من الطريق العام ودخلت مع الفرعي عشان اعبي بنزين ولما طلعت من الطريق العام للفرعي
قال لي : شكلك غيرت الطريق
سبحان الله بالرغم انه اعمى لكن حس اني طلعت عن مسار الطريق
قلت له : عن اذنك شوي بعبي بنزين عشان السياره فاضيه
قال لي : خذ راحتك

المهم

لما وصلت عند مخرج عريجاء
قلت له : هذا مخرج عريجاء
قال لي : ايه تكفى اطلع من فوق الكوبري ولف يسار
وبعدين لما لفيت يسار
قال لي : فيه صراف بنك حق بنك البلاد صح على يمينك
قلت له : ايه
قال لي : لف من عنده يمين
ولما دخلت الشارع
قال لي : الحين بتجيك ثلاث مطبات بعد ثالث مطب وقف عند البيت اللي عليه رقم 33

وسبحان الله بعد ثالث مطب شفت البيت بس تعديته شوي تقريباً 3 متر
قال لي : احس انك تعديت البيت شوي صح

والله بعدها حسيت اني سويت جريمه

قلت له : ما شاء الله عليك وشلون عرفت
قال لي : خلاص تعودت على كذا

أسأل الله القدير رب العرش العظيم بأن يشفيه ويفرج همه
إنه سميع مجيب



الموقف الثالث

بصراحه الموقف هذا شوي محزن


مره من المرات طلعت من بيتنا الساعه 12 ونصف في الليل وكنت ابي اروح لمطعم ماما نوره اللي في شارع الضباب وأنا في الطريق قبل ما اطلع لكبوبري الخليج شفت لي ولد لابس ثوب صوف لونه بني وكان واقف تحت كوبري الخليج وكان يأشر لي من بعيد وبعدين انا وقفت عنده وكان الولد عمره تقريباً 18 سنه وشكله ولد نعمه ووسيم وشعره منتفش مثل القصات اللي طايحين فيها الشباب وكان الولد عيونه فيها شوي دموع

المهم

كان يكلمني وهو يرتجف وجالس يحكحك في جسمه ويمسح في خشمه وعيونه وبعدين
قال لي : تكفى ابيك توصلني لمستشفى الامل
قلت له : ابشر
قال لي : بس ما معي فلوس الله يخليك تكفى وصلني
قلت له : يارجال اركب مابي منك شي بس اركب
وبعدها انا شغلت الفلشر ومشيت مع طريق خريص متجه لجهة الغرب وكنت مسرع
وحنّا في الطريق
جلس الولد يبكي
ويقول : الله يلعن عيال الكلب اللي طيحوني فيه الله لا يوفقهم عيال الحرام

وانا ساكت ماقلت شي بس جالس اتسمع عليه وهو جالس يطلع كلام من قلبه المقهور وبصراحه حسيت من كلامه ان الولد طاح في مقلب ابن كلب الله يكرمك
وبعدين جلس يبكي ويصيح ويقول
الحين وش اقول لابوي وش اقول لأمي
وبصراحه انا ودي اسأله بس خفت يصرخ علي وبعدين يجلس يكسر لي القزاز اللي في السياره

المهم
وحنا في الطريق كان يمشي وراي البوليس السري وكان يأشر لي بالانوار ويبيني اوقف له وانا امشي بسرعه وقول في خاطري
والله ما اوقف الا في المستشفى اخاف اوقف وبعدها يصير للولد شي
وبعدها جلست أأشر للعسكري بأن معي حاله طارئه
وبعدها جلس يمشي وراي العسكري لين دخلنا المستشفى الامل اللي في حي عرقه وبعدها نزل الولد ودخل مع باب الطواريء

المهم

قال لي العسكري : وش السالفه
قلت له : ياخي هذا واحد مريض مسكين الظاهر مفعول المخدرات اللي يستخدمها بدت تأثر عليه
قال لي : طيب ليش كل هذي السرعه
قلت له : ياخي حاله طارئه وشفيك انت
قال لي : خير ان شاء الله
وبعدها راح وفكني من شره

المهم بصراحه وضع الولد اللي وصلته كان مررره صعب احس والله اعلم انه طاح بشباب كانو ناوين عليه بنيّة خبيثه

بس ما اقول الا الله يستر على عيالنا ويحفظهم من كل مكروه


قبل ما اخلص الحلقه
انصحكم تجربون حنيني تمور الصالحيه
والله طعمه خالي وينفع مع هذا البرد
خذولكم صحنين وحطوها في الميكرويف عشان تسخن وبعدها كلوها مع كاس لبن اكتيفيا
قسماً بالله في الصميم

واخيراً خلصت


انتظروني في مواقف ثانية في الحلقه رقم 16 من يومياتي في شوارع الرياض


محبكم في الله وسائق الليموزين / عبرود

نبدأ بالحلقة


الحلقة السادسة عشرة


الموقف الأول

طبعاً احداث الموقف هذا صارت في شهر رمضان وفي الساعه 9 صباحاً

مره من المرات كنت امشي في شارع التخصصي وكان مطعم برج أم الحمام على يميني وكنت متجه لجهة الشمال ولما تعديت الاشارة الخاصة بمستشفى التخصصي الا وأشوف لكم هذاك الشايب اللي لابس لبس محترم ومتشخص وماسك عصاة يمشي عليها وكان طالع من المبنى الخاص بالمرضى اللي يقضون فترة النقاها بعد العملية وكان شكله وهو طالع من المبنى تقول طالب مدرسه منحاش من المدرسه
هههههههههههههههه

المهم

لما مريت من عنده اشر لي
وقال لي : رح وقف قدام انتظرني ابجيك
وبعدها جلس يمشي وهو يتلفت يمين ويسار ومثل ماقلت لكم كأنه منحاش من مدرسه أو من سجن

المهم

بعدها ركب معي
وقال لي : ابيك توصلني لمخرج 17 في حي السلي وبعدين ترجعني لنفس المكان في اسرع وقت بكم ؟

قلت له : رايح بـ 20 وراجع بـ 20 يعني المجموع 40

قال لي : انا بعطيك 100 ريال بس اهم شي تسرع عشان ما احد يدري اني طلعت من المستشفى

قلت له : افاااا ليش ياخلي عسى ما شر وش فيك ؟

قال لي : مو شغلك بس اهم شي تحرك بسرعه

هههههههههههههههههههههههه

المهم

وحنا في الطريق

قال لي : ياولدي انا مسوي عملية زراعة كلى والحمد لله تبرع لي واحد من عيالي الله يوفقه والحين انا جالس فترة نقاها في المستشفى لين اتعود على الكليه اللي زارعينها لي وبصراحه انا طلعت عشان اشوف اشغالي وش صار فيها

قلت له : ياخالي الله يهديك ياخي صحتك اهم من اشغالك

قال لي : اقول اص بس مو شغلك امش بس

هههههههههههه
من جد عصبي

المهم

وحنا في الطريق

قال لي : ما شاء الله سعودي وصاحي في هذا الوقت تشتغل
قلت له : ايه تعرف ياخالي هذا الوقت وقت الذروه ويكون الشارع مليان زباين
قال لي : عسى السيارة ملك لك
قلت له : ايه ولله الحمد
قال لي : اهم شي لا تستحي من احد ولا يهمك احد شف انا لما كنت في عمرك كنت من سكان محافظة سدير وكنت أوصل ناس على عربيه يسحبها حمار واشتغل مثلك والحمد لله هذا انا الحين رجال متقاعد ووصلت المرتبه 13 في وزارة الزراعه وعندي بيوت ومزارع وخير كثير بفضل الله ثم بفضل الحمار والعربيه اللي كنت اشتغل عليها

بعدين
قلت له : طيب الحين ياخالي ليش ما تخلي واحد من عيالك يشوف لك اشغالك بدال ما تطلع وتتعب عمرك
قال لي : اقول لك مو شغلك اها بس
قلت له : ابشر ماني مكلمك في الموضوع هذا

وبعدها وصلنا للمشوار اللي كان يبيه ما شاء الله كان يبي يشوف وش صار على سياراته وهي عباره عن ونشات وشيولات وقلابيات عددها ما شاء الله اكثر من 30 سياره وجلس يتناقش مع المهندسين والميكانيكيه ويعلمهم وش يحطون في السيارات ويش يصلحون
وانا نازل من السياره انادي له المهندسين

المهم

وحنا في الطريق للعوده للمستشفى جلس يسولف لي عن اخوياه وعن حياته القديمه وعن الأوضاع في الماضي والحاضر وبعدين فجأه طلع قارورة ماء صحه
وقال لي : عن اذنك انا الدكتور قال لي اشرب ماء لا تصوم عشان الكليه ما تتعب معك
قلت له : خذ راحتك ياخالي
وبعدها رجعته للمكان اللي اخذته منه والحمد لله رجع سالم وغانم

بس تبون الصراحه الشياب هذا وضعه صعب تدرون ليش لأن المفروض الواحد يهتم في صحته وينتبه لصحته أما هذا مهتم بسياراته والمشكله عنده عيال بأمكانهم يشوفون له حلاله بس هذا دقه قديمه ما يحب يرتاح الا اذا شاف شغله بنفسه
أسأل الله القدير رب العرش العظيم بأن يشفيه ويحفظ له عياله ويوفق له ولده اللي تبرع له بالكليه
أنه سميع مجيب


الموقف الثاني

كنت ماشي وسط حواري الملز وبالقرب من اسواق المتنبي وفجأه وأشوف لكم هذاك الهندي اللي لابس بدله سوداء وكانت متقطعه شوي وكان المسكين يأشر لي وهو يبكي ووجه مورم من الضرب وبعدين فتحت الدريشه
وقلت له : عسى ما شر وشفيك
قال لي وهو يبكي : أنا سواق لليموزين هزا نفر حيوان شيل فلوس وشيل سياره حق انا
يقصد بأنه فيه شباب سرقو منه الفلوس وسرقو منه سيارة الليموزين
قلت له : وينهم فيه ؟
قال لي : خلاص روه (راحو) من زمان
وبعدين
قال لي : انا ابغا روه (اروح) للشركه حق انا في شارع خزان
قلت له : اركب اركب
وحنا في الطريق جلس يبكي ويشاهق من الصياح من قوة القهر اللي صار له وبصراحه قال لي كلام يعور القلب
قال لي : ليش هزا نفر سوي كذا حرام والله انا مافي صدق انا في سعوديه ولا في امريكا
قلت له : كيف اشكال اللي سرقو منك السياره
قال لي : هزا نفر سوا سوا (؟؟؟؟؟؟)
للأسف نفس الاشكال اللي صار لي معم الموقف اللي ذكرتهم في الحلقه السابعة

وتبون الصراحه الوضع وكل ماله يزداد
وانا مره من المرات شفت برنامج اسمه شبابx شباب كان يقدمه مذيع خلوق اسمه مهدي بخاري على القناة الأولى وكانت فيه حلقه من ضمن الحلقات يتقابل مع مجموعه من سجناء سجن بريمان في جدة
المهم

من ضمن السجناء كان فيه واحد عمره على ما اعتقد 18 سنه وكان يقول انه طلعت ودخلت للسجن اكثر من 5 أو6 مرات وكلها قضية سرقه

لاحضو اكثر من 5 أو 6 مرات
يعني الولد شاف الوضع عادي ولا فيه قطع يد ولا فيه تطبيق للحد من السرقه وبصراحه ما الومه يسوي كذا
لأن المثل يقول
من أمن العقوبة أساء الأدب

لذا انا انصح الجهات المختصة بالأهتمام بالموضوع هذا لأن المثل يقول
الضغط يولد الأنفجار
لأنه بكره بيجي واحد من قوة القهر بدال ما يمسك الحرامي بيطلق عليه نار عشان يرتاح منه

وانا عندي طريقه لعلاج هذي المشكله واتمنا من الجهات المختصة تطبيقها وهي

بأن يحضر من كل سجن من سجون المملكه اشهر حرامي ويقطع يده أمام باقي السجناء لكي يكون عبره لهم وبعدها يشهر أسمه في الأخبار والله بعدها تقل نسبة السرقات في المملكه

أ خ خ خ خ خ خ خ خ
والله شي يقهر من قلب



عن اذنكم بروح اصلي الفجر في المسجد لأني أسمعه أقام وبصراحه إذا صليت الفجر في المسجد مع الجماعه تصير في ذمة الله حتى وقت صلاة الفجر في اليوم الثاني



واللحديث بقية


محبكم في الله وسائق الليموزين / عبرود

نبدأ بالحلقة


الحلقة السابعة عشرة



الليموزين وما أدراك ما الليموزين

طبعاً في الحلقه هذي بقول لكم عن إجابيات وسلبيات الليموزين

نبدأ بإجابيات الليموزين

بصراحه احسن شي استفدت منه في سواقة الليموزين انه كل يوم اكتشف مساجد جديده وجميله على حسب وقت الصلاة اللي اكون فيها فمثلاً اكون في حي الشفا وقت المغرب وفي وقت العشاء اكون في حي العقيق وفي وقت الظهر اكون في حي المرسلات اما وقت الفجر والعصر اكثر الاوقات اكون في البيت وبصراحه من اجمل المساجد اللي صليت فيها إلى الأن هو مسجد الامير فيصل بن فهد في حي العقيق مقابل نادي الشباب على طريق القصيم وجامع الشيخ عبدالله اللحيدان رحمه الله خلف شركة الجفالي مرسيدس بصراحه المسجدين هذي لما تدخلها ترتاح نفسياً ويشرح الصدر عشان تصميمها مررره رايق وخفيف ومافيه زخارف كثيره

ومن الإيجابيات ايضاً اكتشاف طرق مختصره من بعض الزبائن لانه بصراحه مره من المرات ركبت لي ثلاث بنغلاديشيه من مخرج 15 بحي السلام إلى حي الشميسي في وقت الزحمه بصراحه علموني على طرق مختصره مررره قويه بس للاسف نسيتها
ههههههههههههههههههههههههههه

ومن الإيجابيات ايضاً توصيلك لبعض الفقراء وبالذات إذا خصمت لهم من قيمت المشوار والله تسمع دعواتهم وهم يدعون لك قسماً بالله ترتاح نفسياً

ومن الإيجابيات أيضاً ممارسة اللغة الأنجليزيه مع بعض الزبائن الأروبيين والأمريكان بصراحه تتعلم معاني كلمات جديده وتتعلم اللغة عن طريق السواليف معهم وتكسب خبره في اللغة وأنا اول كنت اسمع أن راعين الجمال والخيول اللي عند الأهرامات في مصر يعرفون يتكلمون عدة لغات ومن ضمنها الفرنسيه والإيطاليه والأسبانيه والألمانيه بطلاقه والسبب كثرة احتكاكهم بالسياح الأجانب

لذى اقول اللي يبي يتعلم اللغة الانجليزيه بدون ما يدخل معهد للغة يشتغل على الليموزين احسن له
هههههههههههههههههههه
لا احد يصدق تراني امزح


ومن الإجابيات ايضاً تتعلم فن التعامل مع الاخرين وكيف تقدر تبسطهم إذا كانو حزينين وكيف تقدر تمتص الغضب منهم إذا كانو معصبين وكيف تقدر تطفشهم إذا كانو مزعجين هههههههههههه
لانه بصراحه بعض الاوقات يركبون معي زباين الله لا يوريكم عليهم ازعاج بالسواليف قسماً بالله ودي انزلهم واعطيهم قيمة المشوار عشان ينزلون


وبصراحه احسن شي إذا دخلت البيت بعد عناء وتعب دام لمدة 16ساعة من الدوران في شوراع الرياض اجلس ارتب الفلوس حقت شغل اليوم وفرقها عن بعض واحط الخمسات بلحال واحط العشرات بلحال واحط الخمسينات بلحال واحط الميئات بالحال وبصراحه إذا جلست ارتب الفلوس اجلس اتذكر المواقف اصحاب الفلوس واتذكر مواقفهم معي وسواليفهم معي
ومن المضحك في ترتيب الفلوس اقرأ بعض العبارات المكتوبه على الفلوس والله فيه عبارات تموت من الضحك وفيه عبارات تفشل من العبارات اللي تفشل
واحد كاتب على ورقه نقديه فئة خمسة ريالات إلى اللقاء يا احسن خمسه ريال ملكتها في حياتي
ههههههههههههههههه
وواحد ثاني كاتب حاط رقم جواله وكاتب ( من يحصل على هذه العشره فليتصل على هذا الرقم مباشرةً)


أما بنسبة للسلبيات في الليموزين


فحدث ولا حرج والله العظيم اللي إيمانه بالله ضعيف ورايح في خرايطها انه يخسر كل شي بسبب الفتن اللي تصير له من بعض زبائن الليموزين
وبصراحه في اشياء تصير معي في الليموزين ما اقدر اكتبها من وقاحتها والله لو اكتبها يمكن يحذف معرفي من المنتدى بس الحمد لله بسبب خوفي من الله وكثرة الاستغفار ودعاء الوالده لي ربك مصبرني على مبتلاها

ومن السلبيات في الليموزين انك تنقطع عن العالم وتنقطع عن اخوياك وتنقطع عن اهلك ولا تشوفهم الا مره في الاسبوع طبعاً هذا السواق المجتهد والمحافظ على مواعيد شغله اما اللي يجلس كثير في اليبت او عند اخوياه في الاستراحات والله ما يكسب شي بالعكس بيخسر ويطفش وبعدها يبطل شغل في الليموزين

ومن السلبيات ايضاً تتعرض لبعض الذل والأهانه من بعض الناس وبعض الزباين ومع هذا الواحد مجبور انه يسكت عشان يحافظ على رزقه


أسأل الله القدير رب العرش العظيم بأن يحميني من شر الفتن ما ظهر منها وما بطن ويحفظني ويحفظ جميع عباده الصالحين إنه سميع مجيب


معليش بصراحه احس اني نعست بروح اخذ لي شوي غفوه قبل صلاة الفجر وانتظروني في الحلقه القادمه مع قصة الهواش الي صار لي مع عائله في سوق الديره



وللحديث بقيه


محبكم في الله وسائق الليموزين / عبرود