آآآآآآآآآآآآآآآآآآآآآآآآآآآآآآآآآه ياقلبي أخيرا مابغوا أهلي الله يصلح قلبهم
((عذرا خشيت عرض)) بس مانلام مريت بأيام الله لايذوقكن إياه
جايتكم بالسالفة لاتستعجلون وش ورانا عاد معلمة أجيال عطلت ومبطية مادخلت النت وتبونه تسكت مـــــــــــافيه أمل
إلا على الطاري مافقدتون؟؟؟؟؟
عموما فقدتون والا مافقدتون جايتكم وبجعبتي قرق مايقضي وراعَيْتكن كثير بمواضيعي السابقة والحين بعطي نفسي حقه
مير اللي مصدعة الله لايهينه تروح تزرط له كم حبة بندول ولا اشوا راسه ترجع تقرأ
واللي طفشانه وماله خلق قراية تقيل شوي وتنكس لنا
واللي مشغوله تترك الشغل ماظن أهون عليتس واتـْـبَدِّين((تبدين: تقدمين)) شغلتس علي<<<< شكل عقب ذا الجملة محد مكمل ذا الموضوع
واللي بزرانه مطفشينه ومايدعونه تقرأ زين قومي نوميهم ونومي بعد أبوهم معهم ترى أحيانا الرَّجال أبزر من البزران<<<<وانتي الصادقة دايم
واللي أهله مجتمعين ويبونه تجلس معهم مالتس إلا تقرين سورة الزلزلة غديهم يتفرقون وكل يروح لشغله وتعالي أنتي بذا <<<<تقل إني قلت بدعة
واللي معه وحدة بالماسنجر بحرج إن ماصكيتيه قولي للي معتس {{{برب}}} وإذا خلصتي من موضوعي (((ردي عليه)))) همن ارجعي له وقولي {{{باك}}} تراه ميب طايرة ولاحقتن عليه <<<والله موضوعتس اللي لاصق ومب طاير <<<بس اعناد لكن بخلي الحكومة يحذفونه قبل تقرونه
واللي قدره على النار تطبخ لأبو الشباب ترى غداتس مدري عشاتس عز الله احترق مير روحي صكي عنه وازهمي عليه وقولي له جب أكل من برا منيب فاضية معلمة أجيال مبطية عنا ومنزلتن موضوع وأنت أبخص به.. قرقه موب يقضي ومامدان أطبخ وكانتس مستحيتن منه كزي لي رقمه أنا أزهم عليه وان بغيتي أخليه يتغدى أو يتعشى عندنا مايخالف ماعندي مانع بس ترى اللي ياكل عندنا يحصل على ليلة مجانا ...<<<<< لاتفهمون خطأ بينام بالمجلس
واللي واللي واللي ......الخ
الزبدة تفضوا لموضوعي وترى ما عطيتكم ذا النصايح إلا من خوفي عليكن ومن غلاكن
واللي ماله إلا اللي براسه وتعاند بكيفه هي الخسرانة بس لحد يجي يقولي ترى صارت مشاكل بيني وبين رجلي ولا اهلي والا مديرتي تراي مالي شغل بحد اللهم إني بلغت اللهم فاشهد
نجي للموضوع
بس قبل ندخل بقصة(( الفطمة ))نبي نفسر الموضوع
الكـــلــــمــــة مــــــعـــنــــاهـــا
يوم: اليوم هو الذي يحوي على 24 ساعة وهو نفس اليوم الذي يحوي على 1440 دقيقة <<<تصدقون أول مرة أدري أنه كل هالدقايق باليوم الواحد مير الله يجزان خير على هالموضوع دريت عن معلومة ماكنت أعرفه اضطريت اضرب (24X 60 )عشان أطلع كم بوه<<<عاد قولن الصدق كنتن تعرفن كم باليوم من دقيقة!!!!!!!!!؟؟؟؟؟؟
افطمون: فعل ماضي من كلمة فطم والفطام هو إيقاف الرضاعة أي منع الطفل من رضاعة ديد أمه ********** أو الديد(( الرضعه))
في وقت محدد وذلك لأن الطفل صار جحش((كبير)) وصارت أمه تستحي تسدحه وترضعه ومير فشيله من الله وخلقهوالسن الشرعي للفطام سنتان لقوله تعلى{{وحمله وفصاله ثلاثون شهرا}} والفصال هنا هو الفطام
مير حريم هالحين يصير ولده عمره خمس سنين والديد مايطيح من إيده حنا مانقول لايشرب حليب بس يختي علميه يمسك الكاس ويشرب والا جيبي له حليب السعودية ابو شفاط ( مزاز- مصاص) وعلميه وشلون يشفط موب الواحد يعرس وهو ديده معه<<<<كني بديت اخور
المهم نرجع --->افطمون طبعا الواو واو الجماعة كنت احسبه راجعة علي لأني دبااااااا بس اشوا طلعت راجعة على اهلي والنون :نون المتكلم ضمير متصل في محل نصب مفعول به وترى أنا هي اللي مفعولن به فعل الفطام يابعد عمري<<<<معلمات العربي ممكن ماتدققن وعدن لو سمحتن
أهلي: هما الناس اللي من طلعتي على الدنيا وانتي عندهم وشلون !!وكيف؟؟ مافيه جواب هم جابوك وبس حتى لو ماجازولك والا افكارهم غير افكارك مالك إلا هم وغالبا يقصد بهم الأب والأم الله يرزقنا برهم
المهم ياطويلات العمر قبل أسبوع عدت من مدرستي وكنت قبلها بيوم فاتحة النت وأرسلت رسالة خاصة لوحدة عزييييييييزة علي بالمنتدى الله يحفظه ولايحرمني منه فطبعا أول ماجيت من الدوام وقبل أفصخ عباتي انبطحت على سريري( الإنبطاح غير الإنسداح وهو النوم على البطن وقيل انه مكروه والله أعلم<<<<ياشيختس هذا وأنتي داريه أنه مكروه
المهم انبطحت وتنيوطت لاب توبي(( تنيوطت: إذا كنتي قاعدة أو منسدحة وتبين شي قريب منك وبنفس الوقت بعيد وتمصعتي وانتي تجيبينه لأنك ماتطولينه فإنك تتناوطينه وأحيانا تصابين بملع جراء التنيوط ، ويقال تناوط المناديل أي حاول الوصول إليه دون أن يقوم أو يتحرك من مكانه)) <<<<والله محناب سهلين يالقصمان اختصارات رهيييبة عموما أتمنى وصل المعنى واللي مافهمت تقول لاتستحي
المهم يوم تنيوطته واضغط على المفضلة واختار عالم حواء لكن.....!!!!
وش صار؟؟؟
آآآآآآآآآآآآآآه ياقلبي الملتاع
اضغط على عالمي الحبيب ويقول لايمكن الوصول لهذه الصفحة وأنا اللي أقول موب على كيفك غصب عنك وكانك حملت حملك إني لاتقبع عباتي وروح لهم روحه<<<فاهمه النت خطأ
وارجع وحاول مرة مرتين وثلاث وش بلاو مايفتح
وأنا اللي أقوم من (بطحتي) <<<سبق شرحها
واطلع من غرفتي وروح لختي اللي قاعدتن بالدار لاشغل ولا مشغله .. تخرجت واقعدت مير كان عندكن له رجل ترى بابنا مفتوح وكانكم تبون باب الكراج عادي نفتحه المهم رجلن يشغله موب ماغير أكل ومرعه وقلة صنعه ..الله يخلف هالنت مايدعيه تسوي شي ماغير مقابلته صار هو أمه وابوه واخته((اللي هي أنا)) ماعاد نشوفه ياكافي ومايقهرن شي إلا لاسمعت كهكهته بانصاص الليالي والله محد مخلين افصل وترك شغلي إلا هي لاهم ولا شقى ماغير موسعتن صدره
كني شطحت وش كنا نقول!!!؟؟<<<< من جد الله ياجركم علي
إيه كنا نقول طلعت له قلت ورا النت عيا يفتح قالت ......وليته ماقالت
قالت قضى اشتراكنا
قلت وش تقولين؟؟ لا اكيد تمزحين!!!
قالت لو اني امزح ماشفتين مقابلتن خشتس ((سبب وجيه ومقنع))
إيه والله قــُــبل لاجيت من المدرسة ولاه مرتزه والالب توب قدامه وماتدري عن أحد لو يجي صدام بكبره لبيتنا مادرت عنه
إلا على طاري صدام وش احكموا عليه صار بيشنق ولا بيقتل والا وش صار؟؟<<<الشرهه ميب عليك على اللي تاركن اشغاله ومقابلك
عاد أقولكم وارجع لغرفتي وانا مكسورة الخاطر كني عصفور منتف<<<وانتي الصادقه كنك بقرة مرفوسة والرافس الثور
عاد تراي اقدس شي اسمه بقرة
يعني لاتحسبونن بزعل لاقلتوا عني بقرة تراي أعده(( اعتبره)) مدحه يابعد عمري يالبقرة مايعرف قدرك إلا اللي يعرفك زين
صحيح ماعاشرتك وآخر خبري فيك يوم إني بزر بس وما الحب إلا للحبيب الأول <<< ماعقب ذي شي صكوا الجهاز وقوما أحسن لكم
كنت أروح مع مرت عمي للحايط(( الحايط مكان فيه نخل وساقي وزرع ومطق )) <<<الشاطرة اللي تجيب لي معنى المطق <<<هذا الواجب واللي ماتحله بتاقف ورا
اقولكم كنت أروح مع مرت عمي وحلب معه البقرة آآآآآآآآه ياذيك الأيام يازينه والله إنه منيتي هالحين أحلبه ماخليت أحد ماقلت له هالأمنية غديه يحقق لي إياه ويجيب لي بقرة مير مالت عليهم محد ينفع وعلى قولة نجوى كرم (( محدا لحدا )) استغفر الله شكل الأرشيف انفتح بقووووه
بس من جد اللي عنده بقرة تتصدق علي به بس لين أحقق أمنيتي همن أرجعه له وترى ماقبل بغير البقرة يعني عنز والا ناقه ماتطيب خاطري
قد مره أبوي الله يحفظه وقفنا عند بعارين وجاب لي ناقة قال تعالي احلبيه وعييت قلت له ماقدر يابيي أحس إني أخون البقرة قال مير الله يخلف عليتس يابنيتي الناس تمنى تجوب العالم والا تخترع شي وانتي تحلبين بقرة!!!!!
ماش ابوي موب حاس بقدر البقرة
عندي يكفيك يابيي إنه ماشاء الله عليه ماخلت شي ماطلعته لنا هو حليب هو لبن هي أجبان أشكال وألوان جبن سايل ومربعات ومثلثات وأبيض واصفر غير عن اللبنة والقشطة والحليب المركز وحليب البودرة حتى الزبدة ماقصرت أخذناه منه يعني بيني وبينك يابيي تستحق اسم سوبر ماركت متحرك<<عساكم اقتنعتوانرجع للموضوع الله يصبركم
اقولكم ورجع لغريفتي وانا متحطمة وقلت لنفسي يابنت الحلال أحسن لك هالأيام وقتك ضيق ويالله تلقين وقت تحضرين فرصة تاخذين فترة نقاهه وراس ماله باتسر والا عقبه أهلتس مجددين الإشتراك
واشوا اقتنعت نفسي بالكلام اللي قلته له ولهيت بالتدريس **************** وعالمه بس ماش مر يوم يومين ثلاثة وعقبه حسيت إني تقل بزر فاطمينه عن ديد أمه ياهلي مايصلح كذا مره وحدة الأم لابغت تفطم ولده عن المصاصة على شوي شوي موب مرتن وحدة والله اذكر أمي يوم بغت تفطم أختي عن المصاصة
صارت ماطلعه له إلا بالليل والا لاصخنت((يعني مرضت)) وعقب كم يوم تقوله ضاعت ويوم تقوله لحسه الصارور ويوم تقوله يع به كِـكـَّـا<<<الله يعز الجميعويوم تقطع راس المصاصة وتقوله اكله بع همن تنفطم وتدلي ماتبيه
لكن كذا فجاه من غير سابق انذار يعيون أهلي يجددون الاشتراك ماينفع قال إيش قال لازم نعالجكم من الإدمان
ياهلي حتى المدمنين مايقطعونهم فجأة عن المخدرات على شوي شوي يخففون الجرعات بس ماش أهلي ثقافتهم محدودة ومايفهون كيفية التعامل مع الناس المدمنين
قلت مابدهاش يابنت روحي واهرجي عليهم
وأنا اللي أروح بكل ثقة..... يبه .... يمه ... متى بتجددون الإشتراك؟؟
امي: ماهناش مير حططي عن زملتس <<<<المعنى في بطن امي
أنا: ترى عادي أنا أدفع إذا يكلف عليكم<<<مسوية غنية وكريمة عساي اقدر اسدد جوالي
ابوي: ماهمتنا القروش بس خواتس يبي لهن يتأدبن
انا : وش دعوى عاد ياهلي ترانا مقبلين على عطله وهالهرج ماينفع
أمي: احسن خلكن كانك غربلتنن ولهدتنن وانا ماغير اصاليكن أنتن وهالزفت(( الزفت هو النت)) <<<معليش يانت امسحها بوجهي تعرف حرمة كبيرة وماتعرفك واللي مايعرفك مايثمنك
أنا: يمه عاد مايصلح كذا تعذيب<<<طلع الجد
أمي: ماورا ماعذبتنن ذوقن اللي اذوقه <<<حشا مجرمين في بيت واحد
انا : طيب وش الحل؟؟<<<برضخ لكل الحلول بس يرجعون لي مصاصتي
أمي : خواتس يجددن العهد والوعد
انا: ( أقول بخاطري عز الله مافيه اشتراك) دام ذيك شروطكم.. وخواتي كل وحده أعند من الثانية
وماضاع فيها إلا أنا الضعيفه
تصدقون كنت من بعد صلاة العشا أبدا بشغل المدرسة عشان أتفضى بالليل للنت ولافتحته ألقى أهلي متهاوشين مع خواتي وماكعين الفيش ( ماكعين يعني فاصلين) يعني لاحصلته لا بلليل ولا بالنهار
مرت عدة أيام ونحن في حال يرثى لها
أول كنا كل وحدة بغرفه عشان كل وحدة تاخذ راحته واليوم صرنا كل وحدة معه جهازة ولاصقين ابعض ونعبر انفسنا بالفتو شوب بس والله طلعت مواهب مدفونه
المهم هذي صور لاب تباتنا وحنا ملتمين مع بعض على سريري
صدق إن النت داء<<<<موب من قلبي بس أقلد أمي
يمكن تقولون وشوله عاد كلكن فوق السرير بس انا أقولكم لأن ودنا نجلس على السرير<<<مبطيه ماتبيزرت
المهم صرنا شوي على الفتوشوب وشوي نناقش مواضيع قدييييييييييييييمة سبق أن قرأناها بالنت ولم يتسنى لنا نقاشها وذلك لأن خششنا ماتقابلت من أشهر فهذي فرصه جت لحد عندنا
لاتفرحون مابعد خلصت واللي أنا كاتبتن الموضوع عشانه مابعد قلته
المهم بعد عدة أيام صار البيت كئيييييييييييييب والحزن مخيم علينا صرنا مثل المره لاراح رجله انتداب وهي توه طافتن به يعني مابعد بدا بينهم الهواش والمخانق والتنعفق والحوقنه
أو كننا مثل الرجل لاضنت امرته (بكرهم) خاصة المره اللي حملت على طول <<<<منيب قايلة من أول ليلة عيييييب
أو كننا مثل ماقلت لكم قبل البزر اللي افطموه عن ديد أمه وزياده يشوف بزارين أكبر منه ولاهوب حوله ماغير يتسدحون بحجر أمهاتهم والديد منسدل 24 ساعة <<<لاتستحون هذا الواقع
المهم طبعا لازم أنا وخواتي نشوف لنا حل ياترى وش الحل؟؟؟؟
قمنا نفكر ونفكر ونفكر ونفكر ونفكر ونفكر ونفكر ونفكر ونفكرلين داخت روسنا وبعد هالتفكير العميق ماطلعنا بشي<<<< شكل العايلة كله بقر <<<طبعا الإناث والذكور ثيران
استسلمنا للأمر الواقع وصرنا نتسدح عند أمي بهالصالة ومن تالي أمي صايرة مدمنه شعر ماغير مقابلتن التلفزيون وحاطتن قنوات الشعر من شعر لشعر ومن شاعر لشاعر ومن بدوي لحضري وحنا روسنا غدت كبر كورة الفيصلية من الصجه لا ومطول على آخر شي<<< الله يصلحتس يا ميمتي كنتس راجعتن تراهقين
وكله كوم لا جاء شاعر ملحن شعره وبدا يترنم ماتشوفين إلا كتوف أمي تهز ..ياميمتي الثقل زين ويالله حسن الخاتمة واركدي لايجيتس ملع نبحل بتس
ومايقهرني إلا إن القصيدة كل شوي تنعاد وكنه أول مره تسمعه
ياعمري اميمتي مأمله تصير مثل النابغة الذبياني هماه مابدا يكتب الشعر إلا يوم كبر فهي آخذته مثله الأعلى تقول يمكن ابدأ أكتب شعر
عاد كني اشوف قصايد أمي كله هجـــــــــــاء ابناته مير الله عارفن لك يمه ومخليك ماتعرفين تكتبين
واللي يقهرني أكثر لاصارت تكلم ولفزت الريموت تحته(( لفزت يعني أدخلت))
طيب وش ذا يمه نبي نغير لين تخلصين وتأشر بيده لا لا لا
والا احيانا تقول بروح اتروش لاتغيرون القناة!!!!!
يمه وش هالحالة يعني زود عن إننا مفطومين عن رضاعتنا نشوف شي مانحبه
المهم قلت مابدهاش لقيت الحل وصرت لاشفت أمي منسجمة مع الشعر غيرت قلت خله تذوق الفطام زي ماذوقتنا إياه لكن فيه مشكله عويصة أول ماغير القناة دوووووووف القى صعرور براسي((الصعرور هو انتفاخ يظهر بالراس من جراء صقعة او فلقة أو أي شيء من هذا القبيل))
وصرت على هالحال لين انتلى راسي صعارير
قلت ماش الخطه فاشلة وماكسبت من وراه شي لازم أندور حل جديد وأخيرا بعد معاناة لقينا الحل وصدق اللي قال((...................................................)) <<< عجزت ألقى لا أول المثل ولا أخره إذا لقيتوه اكتبوه
قبل أقولكم وش الحل لازم اقولكم كيف توصلنا للحل
طبعا بعد مرور أسبوع من مقابل الشعر والشعراء وفغية الراس
بدينا ننسجم شوي وصرنا من أشد المتابعين للشعر يعني لاراحت أمي لمكان ومرينا من وحدة من قنواتها نوقف شوي نكمل القصيدة مدري بدينا ننسجم ولا ولاءً لأمي والا خوفا منه <<<الله العالم الأخيرة
ففي يوما من الأيام وأمي متحضنة الدفاية (( متحضنه يعني شوي وتصير الدفاية بحضنه من زود ماهي لازته)) (( لازته يعني لاصقتن به))
أقولكم كانت أمي متحضنة الدفاية وأنا وخواتي الثنتين جالسين على كنبة وحدة<<<<شفتوا فراق النت صار له جانب إيجابي صرنا مانتفارق ومن زود ماحناب لازقين ببعض نقعد على كنبه وحدة وسرير واحد لو طالت الفطمة كان دخلنا الحمام سوا بس اشوا
المهم وحنا قاعدين كان التلفزيون فيه شاعر يقول:
لولا غيابك ياهوى النفس ماضاق ....صدري ولابانت بنظراتي الشوق
وتقل بيت الشعر ذاك حرك بي شي قمت أقلب بعض الأفكار براسي :
بما إن أمي طايحة بالشعر وبوي يحبه قلت لازم ننزل لمستواهم قصدي نرقى لمستواهم <<<عذرا متعودة على البزران بالمدرسة دايم نازلة لمستواهم لين صار مستواي زي مستواهم
المهم قمت قربت راسي من راس خواتي وقلت وش رايكم نتقاط(( انتقاط يعني كل وحدة تقط وغالبا ماتكون في الإستراحات يعني يتقاطون عشان يستاجرون استراحة او يتقاطون ويشترون عشاء وبالنسبة لنا مجتمع المدرسات نتقاط نشتري اغراض للثلاجة كالعصير والماء والببسي وغيره أو نتقاط نشتري هدية لوحدة مضنية والا معرسة)
سؤال يطرح نفسه وش اقصد يوم قلت لخواتي خل نتقاط!!!؟؟؟
لاهوب وقت عشا ولاهوب وقت شي نتقاط عليه بس جايتكم بالعلم
قلت لخواتي وش رايكم نتقاط بقصيدة كل وحدة تكتب بيت نحكي لأهلي عن معاناتنا بفقدان النت عن طريق الشعر يعني نحاكيهم على نفس ميولهم يمكن تلامس إحساسهم ويرحمونا
وفعلا تمت القطه وكل وحدة منا قامت تجدع بيت وأحيانا نتقاط كلنا في بيت واحد حتى الكلمة الوحدة تقاطينا فيها وحدة جابت الحروف والثانية النقط والثالثة الحركات
لين ألفنا لنا قصيدة إنما إيه على قولة المصارية<<<<صراحة اسلوب المصارية ينقذ الواحد
وكانت القصيدة من قلب وما أخفي عليكم خنقتنا العبرة كم مرة وحنا نألف تعرفون هالموضوع حساس وأصلا الشاعر خلقه حساس فما بالكم قاعد يكتب عن معاناة مرة به
عاد أنا جايبتن لكم القصيدة وأبي رايكم به <<<<ترى كل ذاك القرق عشان احط لكم هالقصيدة
بس قبل لو سمحتوا اللي فاهمات بالشعر لاتقعدن تقولن ميب موزونه أو ركيكة أو به بلا ترى أهم شي الأخلاق هاكم القصيدة وبعده بقولكم وش صار!!!؟؟؟؟
بــيـت بلا نت والله مــوب بــيــت ..وبــلا اشتراكه حـــالتي مــاهي حالــه ..
اشتــقـت للمنتدى وللمواضيع حنـيت ..وحتى الماسنجر شــاقــني في هباله ..
ضــاقت بي الدنيا وعن الناس صديت ..واشغلني الهوجاس بعالمه وأحواله ..
كـل من سألني قلت أنا بخير وأقـفيت ..والـناس تسأل ياترى وش جرى له ..
أظــهــر بــرودي وداخلي نار شبيت ..مـن حر مابي واشـتـياقي لـوصـاله ..
يـــابـــوي ارحم حالتي كم تعنيت ..وحـزنـي بــقــلبي فــايحــة به دلالــه ..
لا تـغـرك الضحكه تراني ماسليت ..ماغـير أداري عبرتي والعين هماله ..
كــني يتيم فـــاقــد الحي والميت ..وهــمه وحزنه أبــد ماغـتاب عن باله ..
يــاكرت ويــنـك وش بلا عني أبطيت ..حــتى الــمــودم فــاقـــدن اتـــصاله ..
روفـــوا بحالي ياأهلي يوم ونيت ..والله مـــاأحــلى مــن جـــلوسي قـــبالــه ..
ســطـرت حـالي بالقصيده وكم بيت ..وحــنا جــميع أنــا وخــواتي بالصاله ..
الجمعة ٢ - ١٢ – ١٤٢٧
الساعة 8ونص بداية التأليف
الساعة 9 تم التنقيح
نجي للزبدة جا ابوي وجاب لنا معه عشا الله لايحرمنا منه ويكثر خيره وبدينا نتعشى والتلفزيون يرمعل ( يرمعل يعني يشتغل )
والصوت عالي ونبدأ أنا وخواتي نتغامز تقل نلعب غمزة <<<<ياقدمي على ذا اللعبة بس والله أثرنا قليلين أدب يوم حنا صغار
****وقــــفـــه*****
بشرح اللعبة عشان فيه بنات مايعرفونه
طبعا يوم حنا بزران والله نصنا موب بزران بعضنا بالمتوسط والثنوي كنا نلعب عيال وبنات طبعا العيال يصيرون خوالي يعني محارم
فكنا نلعب سوا موب مثل هالحين أحزاب
المهم كنا نجلس حلقة و نصفط أوراق صغيرة وكلهن فاضيات ماعدا وحدة مرسوم عليه عين
طبعا قبل اللعبة نسوي بروفات للغمز نشوف نعرف نغمز والا لا والفنان اللي غمزته ميب واضحة عاد يجيس ناس العيون كله تغمز تقل جادعين عليه حصات ويغمض خايف تفلق عينه المهم هالأوراق نجدعهن بالوسط وكلن يسحب ورقه ويشوفه لحاله واللي يطلع له صورة العين هذا هو اللي يغمز على الأعضاء المتحلقين بس بدون محد يحس به يعني يغمز لشخص واحد فقط
فكلنا مركزين على عيون بعض وإذا طاحت عينك على صاحب الغمزة وغمز لك تجدعين ورقتك وتقولين أنا مت <<<<<(( شكل الغمزة دوختنا وخقينا وبما إننا مانعرف نعبر نقول مت لأنه هو إحساس قريب من الموت الله لايبلانا))
وطبعا اللي يكتشف الغامز يعني لمحتي فلانه تغمز لفلانة تقولين اكتشفت وتوقفين اللعبة وتقولين شفت فلان يغمز لفلان يقوم يوريكم ورقته كان هي صح يصير المكتشف هو الفايز وكان هي خطا يطرد من اللعبة وهكذا <<<< شكل روسكم صدعت مير خلاص مابقى شي وأخلص الفرج جايكم
اقولكم بدينا نتغامز أنا وخواتي كل وحدة تقول للثانية أنتي اقريه وبعد عدة غمزات طاح الإختيار علي بما إني كبيرة المهابيل على قولة أمي(( كبيرهم الذي علمهم السحر)) دايم تقوله لي
مسكت القصيدة وقلت لأهلي اقصروا التلفزيون بقرا عليكم قصيدة وعلى طول استجابوا لطلبي
وأنا اللي بديت القي قصيدة باسلوب مؤثر <<<الله من قله
وبيت ورا بيت وبيت ورا بيت<<<ماذكرتكم بــــ ليرة ورا ليره <<<اللي تقوله خمس مرات بصفق له
يوم خلصت حزروا وش قالوا؟؟؟؟
قال أبوي الله لايخلينا منه ابشرن يابنياتي من باتسر الكرت عندكن
وفجأة تصرخ والدتي وتقول لااااااااااااااااااااااااااااااااااااااااااااااااااااااا <<<<ماذكرت إلا الأفلام المصرية
ليه يمه تصعبينه
قالت مافيه لين تلتزمن بالشروط
وصار جداااااااااااااال طوييييييييييييييييييل ونقاااااااااااااااااااااااش أطول لين قمت وجمعت ابيات الشعر ولملمت جروحي ورحت لغرفتي وتركتهم يتجادلون
وكانت النهاية مفتوحة مادرينا غإلا من باتسر أخوي جاي ومعه كرت الإشتراك
ورجعت لنا الروح ورجعت لمنتداي ورجعت لواحتي ورجعت لكم((نهاية سعيدة))<<<<<أكيد تقولون ليتك مارجعتي مير تمونون وعلى قلبي زي العسل
وترى بفترة الفطمة استغليت الفضاوة وجمعت لكن كم موضوع ترقبوهن بس عاد هالموضوع هذا بالذات عقب فطام يعني اعذرون على القرق والخشات والمداخلات والتعليقات والشطحات وزين بعد اللي ماجاكم إلا ذا
وأخيرا أبشركم انتهى موضوعي وأبشركم هالمرة أحس طلعت كل اللي بخاطري يعني مابقى شي إلا وقلته وأنا عارفه كثير منكم كان وده يشرطن افمي ((يشرطن مايحتاج أفسره الصورة مفسرته))
خلاص خلصت يالله كل وحدة تصك جهازه وتروح تريح شوي بعد هالقرق واتمنى تحتسبن الأجر بكل مواضعي على الاقل مير تطلعون بفايدة
عاد مع السلامة
اصبرن نسيت شي
كل عام وانتم بخير قبل تلهون بالذبايح والكبدة والبصل
وإلى اللقاء
وترقبوا مواضيعي القادمة<<<<هذا وجهي إن قرب من موضوعتس أحد