السلام عليكم <---وعليكم السلام
تحـــذير
من زمان ماكتبت موضوع فأكيد راح يكون ماصل ...ادري مهب غريبة بس هالمره بزود
يعني اللي فيهم ضغط أو سكر أو مالهم خلق يستحسن يطلعون علشان ماأستاثم بأحد
تعرفون المصاله راح تدخلكم في دوامات مالها نهاية من صداع وحومة تسبد وما إلى ذلك
اللهم هل بلغت اللهم فاشهد
تمهيـــــــــد
دحدروا إلى موضوعي الماصل<---ابو من علمك التمهيد
الموضــــــــــــوع
أنا ماوس انولدت في مصنع كبير صحيح انه فيه شرق أسيا
بس وش ذاك المصنع بلاط يلمع وناس نظيفة وتعامل راقي ومكان مريح
وكل وحده لها مكان لحالها تنام فيه وكل يوم يجون المهندسين يشيكون علينا ياما شالونا ياما حطونا..
الين كبرت وصرت ماوس كاملة..
جا يوم التعيين وهو اليوم اللي انفصلت فيه عن أمي وأبوي حالي حال الكل

شالوني أنا والمجموعة اللي معي وحطونا في كرتون كبير وركبونا في سيارة وسمعت إنهم بيودونا للرياض..
وحنا في الطريق قامت وحده عجوز ومن زمان مصنوعه قعدت تميلح علينا قالت: أصلا الناس في الرياض مايستعملون إلا الماوس أبو كوره..
.يعني أكيد أنا أول وحده بيشتروني أما انتم بتخيسون على الرفوف!!
ياربيييييه متى ناصل الرياض وافتك من ذا القراوى اللي معي!!
ياشين التميلح والشعور بالنقص

أنا طبعاً ماعطيتها وجه لأني اوبتكل ووايرلس يعني من شيوخ الماوسات وشي أكيد إني أول وحده بطلع من المحل!!
بس ماادري منهو الشخص اللي بأكمل معه حياتي!!
أتمنى يكون مراقب عام على موقع مشهور علشان اشرف على مشاركات الأعضاء واحذف وافعل وأصير أنا الآمرة الناهية!!
أو عضو مهم له قدره بين الأعضاء..
قطع حبل أفكاري صوت الرجل جاي ينزلنا..قاموا يمشوونا من سيارة لسيارة ومن مخزن لمخزن ..
إلى ان استقرينا...
فتحت عيوني لقيت نفسي في محل اكسترا..حليو ماعليه أهم شي فيه مكيف ذبحنا الحر في السياير..
قعدوا يصففوننا على الرفوف ويرتبونا وطبعا يترفقون علينا ويشلون كل وحده لحالها..
بعد مارتبونا قعدها على الرفوف ننتظر احد يجي يشترينا...
ملنا من الإحتراء!! ماادري وش بلاهم الناس في هالديره مايشترون!!
بعــــد كم شهــــر
وحنا في المحل وأنا نايمه على الرف مر من جنبي ذاك الدب وتلني مع راسي و وداني للمحاسب وحطوني في
كيسه وجدعني في السيارة حتى ماامداني ولا أناظر شكله

بس سيارته نظيفة وزينه..
قلت بس هذا المشرف اللي باتوظف عنده

قعدي يبرم بي في هالسياره لين دار راسي مابقى مطعم في الرياض ماسير عليه!! نعنبو غيرك ارحم بطنك لاينشق!!
وصلنا بيتهم متأخرين جدعني على كرسي في الصالة وراح ينام!!وقعدت على هالحال ثلاث أيام!!
ثلاث أيام محجوره في كيس لا أكل ولاشرب ولا هوا

عقبها جا وطلعني من كرتوني ورحنا لم جهازه..
وقعد يحبرش في الجهاز وسافهني!! ياربيه وبعدين معه ذا البزر متى بيخليني اشتغل!!
الظاهر يتعلم وشلون يفتح الجهاز!!
فتح الجهاز وبدى يتصفح المواقع أثره لاهب مراقب ولاحتى فراش!! ماعنده إلا الدجه
وكل مواقعه مثل وجهه ماهنا شي سنع لاثقافه ولادين!!
ماغير أغاني وشات

قلت اصبري يابنت يمكن انه داخل هالمواقع بالغلط!!
بس مابها غلط كل يوم على ذا الحال!! وأنا بنت حمايل ماارضى بهالشي يصير قدامي وأساعد عليه!!
مافيه قدامي إلا إني اهج وافتك من هالداشر!!
يوم ليل الليل ونام الدب قمت اتسحب أدوور كرتوني أبلبسه علشان اهج ..تعرفون الكرتون عندنا زي العباية عندكم
مالقيت كرتوني شكله جادعه بالزبالة الله يجدع راسه..
قلت الشكوى لله باطلع مفرعه..
واطلع اركض في شوارع الرياض والظلام يغطيني والخوف يحاصرني

حتى بساستهم مشافيح!!
قعدت اركض واركض لين تعبت ونمت في مكاني ..
قمت الصبح لقيت نفسي في بسطه في حراج بن قاسم!!
انـــا أخر مالي حراج بن قاسم!! بس ميخالف أهون من الزبالة<---تنرحم وقسم
قعدت في ذا البسطه الخايسه لامكيف ولاهوا نظيف ولاحتى رفوف انقص ظهري من النومه على الأرض
حتى الأكل أول كنت أكل أرقى البطاريات الحين يوكلني بطارية ابوبس الحمرا!!
وصرت احتري الفرج من رب العالمين..
بعد كم يــــــــــــوم
وأنا منبطحة في هالبسطه احتري منيتي جا واحد رفعني ويناظرني بنص عين تمنيت ذيك الساعة يكون لي اصبع
بس علشان اخفس عينه..
قال:بكم ذي يالحبيب
رد عليه راعي البسطه:بعشره ريال
قال:مامعي إلا سته تبيع؟؟
ردعليه:تطلع علي بدون مكسب!! بس ميخالف نكسب زبون<---يانصبه!!
وشالني وقعد يدور بي بين شوي البسطات بس ماطول..
قلت في نفسي ورا شكله ملحط ووجه كله مخوش<---وش عليك من وجهه
يمكن انه صاحب موقع كبير وطفر من فواتير النت!!
طيب ليش ريحته خايسه مايعرف يتروش

رحت لبيتهم وفتح جهازه قلت بس الحين بيفتح موقعه..
وقعدت أحتريه ماشفت شي!!
ماهنا فرق عن راعيي الأول بس هذا أشوى مهب راعي أغاني ولا شات
حوم كبدي بالمواقع اللي يدخلها ماغير يتصفح حتى مهب ولاعضو..
وليت اللي يقراها مواضيع زينه قسم إنها تجيب المغص من نمونة جح مربعات وهل تعلم واذاعة خامس/ج
وفي ذا اليوم وهو يبربس في هالمنتديات ضغط على تسجيل ومير استانس وانبسط
الحمد لله أخر الصبر الفرج واخيراً بيصير عضو في منتدى
وقعدت ساعة فاتح الصفحة احتريه يعبيها ماكتب ولا حرف!!ماادري وش يحتري!!
قام رجع لمنتدى ثاني ونسخ اسم عضو وحطه!!
وكلمة السر نسخ نفس الاسم وحطه!!
شكله مهبول أو مااردي وش سالفته!! معقوله كل ذا عجز!!
راح لإضافة موضوع جديد..قلت زين بدا الرجل يتطور ويكتب مواضيع
فتح صفحة إضافة الموضوع ورجع للمنتدى الأول ونسخ موضوع وحطه!!
قللت اصبري يابنت بكرا يتعلم!!
رحبوا فيه الأعضاء وجا بيكتب لهم رد..
قام نسخ كلمة اشكر كم على المرور وحطها!!
وقعدت أنا معه على هالحال ماغير نسخ ولصق..
ينسخ مواضيع قديمه ومغبره ومواضيع القروبات جابلي ربو حسبي الله عليه
ولاهب يسمع الحكي دايم اقوله يابن الحلال خل عنك البربسه والنسخ ترى كل الناس تدخل منتديات
ومشتركه في قروبات بس شكله مايسمعني!!
شكيت بوضع الولد ماعمري سمعت تكة كيبورد قمت رفعت راسي ...ياربيييييييييييييييييه وش شفت!!
اثره محول الكيبورد زباله مغطيه بقشور الفصفص والقراطيس!!
شكله مايدري وشوله محطوط اصلاً..
عاد الزم ماعلى الوحده صحتها وأنا مااتحمل كل هالغبار وحتى الفنتولين ماصار ينفع معي.
قررت إني اهج بس هالمره مانب قاعده اراكض بالشوارع مهب كل مره تسلم الجره اخاف ياكلني بس ولاشي..
قمت طلعت للحوش وطبيت على بيت جيرانهم بانام عندهم الليله وبكر يسهل الله امري..
قمت الصبح
سمعت صورت رجول قريبه مني..
رفعت راسي لقيت رجل كبير وشكله عاقل وراعي صلاح..بس ماادري ليش مكشر!!
يوم شافني فرح تقل نازلتن عليه من السماء..
اخذني بسرعه وركض لجهازه وكان مشغل وبداء يضغط!!
بس غريب هالرجل بتله مكشر!!
مع إني اللي مريت عليهم قبله كانوا يضحكون ومبسوطين!! صدق ماتعرف قديري لين تجرب غيري
وش سالفة أمه ذا الشايب حوم كبدي بتكشيرته وزود ينافخ علي!! ياخي وش أنا مسويه!!
وبالكليك يطلع روحي من قوة الضغط!!
وتعالوا شوفوا اذا علق الاتصال يصبخ بي الأرض ويكفخني
حتى انه مره صفقني بالجدار وصاربي كسر بالعامود الفقري!!
وقبل يصارخ ويهاوش وهو لحاله!! شكله مهب صويحي<---كلن عندها مهبول
وعنده شنطه حديد مليانه علاجات وماغير بلع من هالحبوب!! الصراحه مادري وشهي حبوبه بس اشوفه يجرع..
و يردد نقطه ومؤشر وكم النقطه
جاني انهيار عصبي من القعده معه ماغير يدعي تقل عجوز مخرفه!!
قررت اتركه وخل المؤشر لو فيه خير يشتغل عنده ماوس

وطلعت من بيته وكملت حياتي متنقله بين الناس
طحت بيدين راعين السياسة والكوره والكمبيوتر والبرامج والطب والبيئة والخربطه والمطرسه والبربسه....
كلهم بينهم عامل مشترك ياكثر مايتهاوشون!!
لين حامت كبدي وقررت إني ارجع لوطني!!لو إن شاء الله أصير عند واحد مايفتح غير السولتير..
ميخالف ارحم من ذولا..
لكن لأني ماوس اوبتكل وايرلس يعني هاي كلاس<--- فيها موقه
مالقيت وسيلة تناسبني ارجع فيها..
قولولي شلون ارجع!!
THE END
على الهـــــــــــامش
- للكمبيوتر عدة طرق للإستخدام فاحـرصوا على أن يكـون استخدامـكم له في مـا يرضى الله
- يجب أن نشغل عقولنا و لا ندعها تمضي مع مضي الزمان وجودها كعدمها,, يجب أن نضيف أي شيء ولو كان بسيط
- الماوس أمانه فلا تُطلعوا حرتكم فيها
- السالفه مهي صدق يعني لاتصدقون إني ماوس تراي أدميه مثلكم<---لاتعليق
.
.
.
سبحانك اللهم وبحمدك ,,اشهد أن لا اله إلا أنت,, أستغفرك وأتوب إليك
.
.
.
خلاص قضينا وش تدورون <---تسمع بالاسلوب
بس تصدقين ياني مشتاقة لك بالحيل >>>>>صدقت عمرها
هذه أنا ياطويلة العمر ماوس جديد مهب مثلك مستعمل وودي لو نصير أنا وأنت صديقات
بما أني دخلت هالواحة ولا أحد عطاني وجه لدرجة أني إذا نزلت موزوع ما يتغير فيه شي غير الماوسات الي دخلو يقرون وبس يعني الله يصلحهن يدخلن ويوسعن صدورهن (واثقة الأخت) ويظهرن ما كتبن ولا شي كني طالبتن رووس أمهاتهن>>>>>>>>قوية
لدرجة أني توني منزلة موضوع( يعني أفهميها وروحي ردي) وطلبت الرد بالهداوة وما فاد آخر شي قلبتها هوشه>>>>>>أنا إذا عصبت ما أرحم
عاد أنا شفت أسمك متكرر واجد قلت أكيد مشهورة تصيرين صديقتي:hahaha: ياشين التلزق
الموهيم الصداقة مهب لعب يعني ما أنزل موزوع إلى أنت أول من يرد ولا ترى فيها قبايل:30:
عاد ما أبغا أدخل في صلب موزوعك لأن صديقتك ما هيب حريفة في الكمفيوتر مغير بالقوة تعلمت أدخل على هالمأخوذ اللي ذبحني من زينه
لدرجة أن عيوني رايحه خطيطات من السهر ومصرة أكمل:hahaha: عنز بدو وطاحت في مريسة
لا وأزيدك ترى أنا أشطر وحده في البيت فيه >>>>> عايشين في العصر الحجري
الموووووهيييييييم أدري أن هذرتي واجد:09: هذا بلا أبوك ياعقاب
بس ترى أن ما رديتي أبا أنزلع على قول أم تأبط شراً صديقتي ( تسذبها واجد)
وأباأحرم أدخل المنتدى:hahaha: نصابه قويه