كوبونات الراقية تسجيل الدخول

محبوبه وعسل
محبوبه وعسل •
كيفكم بنات وحشتوووووووووووووووووووني كلكم من دون استثناء

أنا اليوم مرتاحة نفسيا رغم إن الحال ماتغير بس سبحان الله ربي منزل بقلبي
راحة عجيبة يارب لك الحمد
أكيد الراحة هذي من دعواتكم لي الله لايحرمني منكم

ماشاء الله عليك ينبوعة عيني عليك باردة
انا اسوي الشوربة ونوع واحد مالح ونوع حلى بس
وزوجي الله يخليه لي يقول لاتتعبي نفسك حتى لو حطيتي لي تمر مع قهوة يكفي وماقصرتي
بس الوحدة مننا ماتخليها نفسها ماتسوي شيء لازم نطبخ الله يعين

ام قشامة الله يعينك ياقلبي والله حاسة بمعاناتك مع الحديد
تصدقي ضحكت ضحك على اولادك الله يحفظهم لك

ام امين وييييين الغيبة
كيفك وكيف اولادك الله يعينك ويعيينا على الحمل

فواحة الريف
تصدقي كأنك تتكلمي عني أنا أتعبني البيبي بالحركة وناااااااااااااازل أسفل
بس أخاف يوم يطلع يده ولارجله من تحت
وبرضه زيك بألم الظهر ومع الدوام والوقفة وطلوع الدرج زاد علي الألم
الله يعينك ويعيننا جميعا

زبيرية وحشتييييييني ووحشتني سوالفك
يلا الليلة لازم اشوفك بسولف معك

كبووور حبيبتي كيف السكر معك وكيف الصيام ان شاء الله تصومي وماتتعبي ؟

الاماسية كيفك حبيبتي
اموسة فين تراجعي انتي
ومن فين راح تشتري أغراض البيبي
انا مثلك راح اشتريها لما ادخل بالتاسع ان شاء الله

ليدي كيفك عيوني
انا ان شاء الله اذا جبت بسميها لانا
واذا ولد مشكلة عندي اسم وعند زوجي اسم واللي الله كاتبه بيصير

البيالة وداريين كيفكم مع رمضان

جوجو كيفك حبيبتي
جوجو موقلتي ماتعرفي لادوية النفاس
كيف امك تعرف تجهزها لك ولالا ؟
اذا ماتعرف ترى عيوني لك اجهزها وارسلها لك
محبوبه وعسل
محبوبه وعسل •
بالله بنات شوفوا ولادة الأخت رسيل بمجرة الزمردة
لما قرأتها مرة أضحك ومرة ابكي أول مرة أقرأ قصة ولادة مثل قصتها



الجزء الأول: بداية الطلق


أول يوم في رمضان كان زوجي دوامه ظهري يطلع الساعة 2 الظهر.. ويرجع 11 بالليل.. يعني يفطر في العمل..
وفي اليوم الأول لما راح.. كان متوقع أنهم راح يطلبون فطور لكن لما راح لقاهم اللي جايب معه سمبوسة واللي جايب شوربة واللي جايب لقيمات ومن هالخفايف.. وهو ما معه شي فانحرررررج مرررة منهم..
وقال لي لازم بكرا أعوض وآخذ معي شي يواجه..
قلت له ابشر.. وش تبي؟ تبي شي دسم للعشاء.. وإلا خفايف للفطور؟
قال لا أبي خفايف لكن شي زين يعوض فشيلتي أمس.. قلت له خلاص بأسوي لك بيتزا وفطاير.. وبأسوي بف باستري..
تخيلوا وأنا في التاسع ومثقلة وحالتي حالة..
من الليل وأنا أحوس وأجهز في المطبخ..
وبعدين طول الليل التقلصات تجي وتروح كالعادة.. ما قدرت أرقد زين..

الساعة 8 ونص قمت وأنا أصيح من التعب الألم في ظهري وحوضي وكلللي.. لكن كان في حدود المعقول.. قمت أجهز بنتي للمدرسة ويوم راحت جلست أعجن عجينة الفطاير والبيتزا.. ومعي جودة..
وكنت أحس بألم قوي يجي ويروح وأنا أعجن.. لكن ما كان منتظم أبددداً كان يجي كل دقيقتين..
عجنت..
وتركت العجينة تخمر..
ونمت شوي (ولاااا كان على بالي أن هذي آلام ولادة حسبتها تقلصات مثل كل يوم لكن أشد شوي)..
قمت آذان الظهر الساعة 12.. وأسرررع أسوي البيتزا والفطاير وأدخلها الفرن على دفعات..
وزوجي قام الساعة 1 وكان مستعجل ويقول يا الله بسرعة تأخرت الطريق زحمة مرررة ولازم أطلع اليوم بدري..
أنا احتست..
أقول له اصبر ..
قال خلاص شكلي بأروح وأخلي فطايرك وحلاك !!
قلت له لا حرااااااام عليك تعبانة من الصبح وأنا أذّهر.. وتعبانة.. خذه معك.. اصبر شوي..
وكنت والله أتألم.. حتى أني أدخل الصينية الفرن.. وأجلس على ركبي في المطبخ من الألم.. ودموعي تصب..
وقال لي..
تبين أوديك المستشفى..؟
قلت له لا تو الناس.. الألم لا زال محتمل..
رح العمل وود الأكل واستأذن وتعال..

المهم..
أخذ الأكل.. وطلع..

وأنا أسررررررع أبي أرتب البيت قبل لا أطلع للولادة << توها تحس أن فيها ولادة..
بس ما قدرت..
الألم زاد..

وأنا أشوف المطبخ محيوووس ووسخ مع العجلة في الطبخ.. مع أني أمس في الليل غاسلته ومرتبته من أحسن ما يكون..
قمت أصيح من القهر.. أبي أرتب حجرتي.. ما قدرت من الألم..
كلما جتني طلقة.. تجمدت وأنا في مكاني مقدر أتحرك..
سبحان الله زاد الطلق علي بعد ما طلع زوجي بربع ساعة بس..

وأتصل عليه أبيه يستعجل.. قال خلاص بإذن الله خمس دقايق أوصل العمل أوقع وأجي..
دخلت الحمام أتروش بسرررعة..
وفي الحمام..

حسيت البيبي بيطلع!! ((يعني المسألة مش هزار!!))
وأمسك نفسي وأحاول آخذ نفس قوي علشان ما أدفع..
خلصت وطلعت بسرعة.. وأنا لافة علي بس الفوطة..
وأتذكر..
أقول لنجودة.. بسرعة افتحي الباب لأختك الحين تجي من المدرسة..
وراحت فتحت لها..
وأنا دخلت غرفتي..
يا ناس.. أبي ألبس ملابس..
مني قااادرة!!

الطلق حرقني سبحان الله.. وأنا ألهث أحاول أمسك نفسي..
وأتخيل أني أولد وأنا كذا بدون ملابس واخزياه! خخخخخخ
ما أدري كيف سحبت أقرب جلابية ولبستها..

وأجلس على السرير اتصل على زوجي بالجوال وأصييييح .. تعال بسرعة بأولد..
هو مسكين حاس ما عرف وش يسوي..
قال والله هذاني جاي.. لكن الطريق موقفففففففف تماماً من الزحمة (يقول أن طريق الروحة ماشي لكن طريق الرجعة كان مسكرررر من زحمة المدارس والجامعات.. وقت خروج الدوامات)..
قال لي.. اتصل على أبوي يوديك؟
قلت لاااااااااااااا أستحي.. ما أقدر..
قال أبوك؟
قلت لا.. أستحي .. ما أقدر.. أبيك أنت..!
وأصيح..

يوم سكرت الجوال..
وإلا بمممممممم..
انفجر كيس الموية!
ويصب على الأرض..
وأتصل على زوجي وأبكي (بسرررررررعة البيبي بيطلع الموية نزلت!!).. هو من الروعة قفل الخط بوجهي..!

وأصرخ أنادي هنودة.. (كانت توها جاية من المدرسة يا عمري)..
بسررررررررعة جيبي عباتي (استسلمت خلاص قلت بأتصل على أخوي أو أبوي)..
وتجيب عباتي وتلبسني على راسي وأنا ما أقدر أتحرك جالسة في مكاني..

وأقول لها جيبي نعالي أعزكم الله..
وتجيبهم تلبسني.. وإلاها جايبة كعب!!
وأصرخ لاااااااااااااااااااا.. جيبي النعال الواطية..
وتروح مسكينة تجيبها..

وأقول لها جيبي الموية المقرية (أبي شي يخفف عني)..
يوم جابتها بتشربني..
وإلا لطلقة تعصرني.. والموية انفجرت مرة ثانية على الأرض سبحان الله.. وصبت أكثر..
وأصرخ على بنتي مسكينة.. وخررررررررري عني..

ناظرتني.. وقالت.. يمه!! أنتي جالسة تولدين؟؟

وكانت صادقة.. كنت في اللحظات الحاسمة..

ونكمل في الجزء التالي بإذن الله..
محبوبه وعسل
محبوبه وعسل •
الجزء الثاني: ولااااااادة على الأرض


في هذي اللحظة.. لقيت أمي داخلة علي الغرفة هي وأخوي الصغير (في ثاني ثانوي).. وتقول يا الله بسرررعة امشي..(زوجي متصل عليهم وشرح لهم)
وأخوي يمسكني من تحت كتوفي ويشيلني وأنا أبكي.. أحس أني روعته فعلاً..
وأمي تسمي علي وتقرا علي..
يوم توي طالعة من غرفتي .. وأمشي في الممر..
وأصرررررررررخ..
حسيت الراس بيطلع قاعد يدفع بقوة .. والله أنا ما أدفع.. لكن غصب عني هو بيطلع سبحان الله..

وأصرخ وأقول وقففففففف.. بأولد..
وأمي يا عمري تمسكني.. تبي ترفعني من الأرض..
وانا أبي أجلس على الأرض (خايفة البيبي يطيح وأنا واقفة يموت)..
وأمي تسحبني ميب مصدقة أني بأولد..
تقول اصبررررري! الحين توصلين السيارة..
أقول لها لااااااااااااااااااا والله العظيم بأولد.. الراس بيطلع!!!!
وأضمها وأنزل على الأرض وأصيييييييييييييييييح..
وامي تصرخ على أخوي رح جب طبيييييييييييييييييييييييييييي ية بسرعة!!
قام طلع طيراااااااان مسكين..

وأنسدح.. وأحس أن شي يطلع مني..
قامت أمي قالت افتحي رجولك..
وافتح رجولي..
وأقول يمه طلللللللللللللللللللللع..
أمي من الروعة مسكينة تطل تحت ملابسي تقول ما فيه شي! (هههههههههه)
ما تشوف زين لأن العباة تحتي سوداء والبيبي راسه أسود مب باين..
وأنا أقول والله العظييييييييييم طلع أحس فيه..
يوم دفعته كله سبحان الله.. ويصيح.. شافته أمي.. قالت إيه هذا هو!!
(والله كل ما أذكر أنا وأمي نضحك.. مدري كيف ما شافته؟!)
سحبته أمي.. لكن الحبل السري قصييير..
وما قدرت تحطه في حضنها لأن المشيمة ما طلعت..
خافت الحبل ينقطع..
وجلست أمي مسكينة ماسكته بين رجولي وهي محدبة ظهرها يا عمري.. مهي قادرة لا تتركه على الأرض الباردة السيراميك.. ولا هي قادرة تشيله تخاف ينقطع الحبل ويموت البيبي لا سمح الله..
وأمي تصرررررررررررخ على أخوي الثاني يوم دخل علينا.. رح جيب طبيبة..
راح يدور على طيبية..
ودق على أبوي راح يدور على طبيبة..
وامي جت بتأذن في أذن البيبي.. ما قدرت.. تقول والله نسيت الإذان..
وتقول لي.. وش بعد التكبير.. أقول لها (وانا زي السكرانة) لا إله إلا الله..
والله مواقف تضحك إذا ذكرتها..تقول امي نسيت الأذان بأتذكر لو شي منه ما ذكرت..

أنا في ذيك اللحظات أحس اني كنت في غيبوبة.. متكية على جدار ورا ظهري.. وأصيييييح..
وكان الطلق والألم لازال معي (علشان المشيمة)..
ومن الصدمة.. كنت أصيح.. وأشوف الناس تتكلم وتركض وأنا بدون إحساس.. كأني غايبة عن الوعي بالضبط..

وبعد شوي دخلت خالتي (وعمي كان برا أشوى ما دخل)..
أنا في ذيك اللحظة قمت أفكر.. كيف بيتي كذا يفشل قدامهم محيوس ومب مرتب؟!
وش راح يقولون عني الحين؟
ومسكينة ارتاعت يوم شافتني واستحت راحت جلست في الصالة.. وعمي راح يدور على طبيبة..
(فرقة بحث كاملة 3 أخوان وعمي وأبوي كللهم يدورون في المستوصفات على أي ممرضة أو طبيبة تطلع للبيت ما لقوا)..
والبيبي لفته أمي بشرشف (جابته بنتي)..
وأنا قمت أرجف من البرد.. وأقول سكروا الباب..
يقولون مسكرينه..

بعد شوي.. جتنا فكرة نتصل على الإسعاف..
قامت أمي اتصلت على الدفاع المدني 999 خخخخ (أشوى ما اتصلت على مكافحة الإرهاب بعد)
قالت الحقوا عندنا وحدة والدة!!
قالوا اتصلي على 997 الإسعاف..
واتصلت أمي عليهم بس ما عرفت توصف لهم البيت.. عطتني الجوال أوصف..
وأوصف له البيت وأنا أبكي.. خخخخ
ثاني لفة.. رابع بيت .. إهئ إهئ.. (خخخخ)
وطلع عمي متصل عليهم.. وأخوي متصل عليهم..

بعد شوي.. دخل زوجي..
هو من الصدمة .. ما شافني.. دخل راح يسلم على أمه..
وأنا مرمية على الأرض بحوستي ومويتي.. ما شافني..
محبوبه وعسل
محبوبه وعسل •

الجزء الثالث: رحللللللللللللة سيارة الإسعاف

المهم..
جو الإسعاف..
وجاء الرجال بيدخل.. أنا كانت الطرحة علي.. وعباتي علي.. الحمدلله ما تكشفت..
يوم دخل الرجال وبناتي يصيحون يمممممممممممه.. ما يصير.. الرجال يشوفك!!
يمه ما يصير.. لااااااااااا..
وأمي تهاوشهم..
دخل الرجال وحط الكباسات على الحبل السري.. وقطعه بالمشرط..
وقال ما أقدر أسوي شي.. لازم ناخذها للمستشفى.. علشان المشيمة تطلع..
جاء زوجي يشيلني.. علشان يحطني على النقالة.. عييت..
صراحة كان فيني شرهه عليه .. وما أبيه يلمسني.. بس ما تكلمت..
قلت بس وقفني..
وقفني.. وساعدني أجلس على النقالة..

وشالوني وعلي عباتي وعلي غطاء صوف من البرد اللي جاني..
وطلعوني في الشارع (يا خزياه).. وركبوني سيارة الإسعاف.. وشافني أبو جيراننا.. (ما ودي أتذكر)
المهم ركبنا في السيارة أنا ومعي أمي وخالتي.. وركب أخوي الثاني.. وأمي شايلة البيبي وهو فاتح عيونه يطالع قلبوس..
وهم يضحكون عليه (كأنه حلم هذا اللي أذكره).. وكنت أبكي طول ما أنا في الطريق..
وزوجي ركب سيارته ويمشي رانا..
أما أبوي وعمي.. ما أدري وش صار عليهم.. ههه .. الظاهر يا عمري السكر ارتفع عليهم وما تحملوا يجون معنا..


عجز زوجي يقنع رجل الإسعاف يوديني لمستشفى المملكة علشان تأميني هناك..
ما رضا..
قال لاااااااااااازم نويها لمستشفى حكومي.. هذي القوانين اللي نمشي عليها.. ما نقدر..

وأي مستشفى؟؟

ودوني.. ولأن الله أراد ابتلائي..


إلى ..

مستشفى...


اليمامة... القمامة
محبوبه وعسل
محبوبه وعسل •


الجزء الرابع: مستشفى اليمامة: كهف العذاب المخيف



وصلنا المستشفى..
على طول دفعوني بالنقالة.. وأخذوا من أمي البيبي.. ودخلوني في غرفة الطوارئ.. وما رضوا أحد يدخل معي..
تخيلوا.. الزحمة والإزعاج والأصوات.. مكان مزعجججججج جداً.. الله لا يوريكم..

دخلت الغرفة على النقالة وقالوا لي..
يا الله قومي "انقزي" للسرير الثاني!!!!

تخيلوا جاية بالإسعاف.. والممرضة تبيني أتحرك من نفسي؟!

بالموت سحبت نفسي للسرير الثاني (والحبل السري لا زال نازل مني ).. وأنا لازلت لهذه اللحظة أصيح ومصدومة..
يوم جلست عليه.. رمت علي ملابس..
وقالت يا الله غيري ملابسك!!!
كيف أغير ملابسي وأنا مني قادرة أتحرك من الألم والتعب؟ والحبل السري تحتي..؟
فسخت عباتي بالموووت.. وملابسي.. وجيت ألبس الملابس اللي عطتني.. وإلا ريحتهاااااااااا استغفر الله..
والله أن ريحتها حمضة.. ريحة ترجيع أعزكم الله..
وألبسها.. وأنا حايمة كبدييييييييييي على الأخير..

جت الممرضة سوت معي تحقيق (اسمك، اسم زوجك، الحي، ليش ولدتي في البيت؟ عمرك.. الخ)..
وأنا تعبانة وبالموت أتكلم وصوتس يرتعش.. أقول لها اسألي امي.. زوجي.. ما أقدر أتكلم.. تقول لا لازم أنتي..
بعد شوي.. جتني ثانية.. ونفس التحقيق..
ربع ساعة..
وامي تصيح عليهم يا عمري من ورا الستارة جيبوا الدكتورة.. المشيمة إذا طولت في الرحم خطررة.. تجمد.. لازم تطلعها..
وهم سافهينها..
بعد شوي.. جت الدكتورة مصرية.. ونفس التحقيق للمرة الثالثة.. وأنا أجاوب وأنا أرجف من الألم والبرد.. والانهيار.. وأصيح..
وتشوفني أرتجف.. قالت أنتي ليش خايفة؟ عادي المشيمة ممكن تجلس ساعة..
وأنا مني خايفة بس بردانة ومصدومة.. وقرفانة منهم ومن تعاملهم اللي مثل وجيههم..

بعد شوي.. جت تفحصني..
ويا سلاااااااااااااااااااااااااااا ااااااااااااام على فحصها..
والله كأنها تنتقم مني مب تفحص ..
علمتني وش يعني الفحص.. أدبتني مضبوووط..
طلع كللللللللل الفحص اللي أول كأنه لعب عند فحصها بنت الـ.. استغفر الله..
دخلت يدها وقامت تحفر في رحمي..وصلتها لبطني.. وتضغط من فوق على بطني بقوووووووووة..
خلتني أصرخ كل في المستشفى سمعوني.. حتى أمي صرخت عليهم حرااام عليكم شوي شوي.. (مسكينة هي برا بس تسمع صياحي وما تشوف)..

بعد شوي.. راحوا كلهم وخلوني.. يمكن نص ساعة..
وأنا بملابسهم المقرفة ورجولي باردة.. وأنا أرجف من البرد وأبكي من الألم وطلوق المشيمة..

بعد مدة دخلت الدكتورة وقالت خلاص بنحولك نسوي لك عملية علشان استخراج المشيمة... لأن الوضع صار خطر.. (توها تحس ويا وجهها)..

مسكوني في النقالة ودخلوني ممر التوليد..
الله لا يوريييييييييييييييييييييييكم..
دخلت سيب (ممر).. فيه ستاير على الجوانب..
وأسمع حريم يصرخون.. آآآآآآآه.. أوووووه... إييييييييييييه.. يا رببببببببببي..
وصوت جهاز نبضات قلب الجنين عالي..
وأشوف بعض الستاير مفتوحة.. ووضع الحريم مأساوي مساكين (لو فيني ولادة هونت ونحشت)..
والممرضات يمشون في كل مكان عادي والحريم مكشفات.. شي مهوول أول مرة في حياتي أشوفه..
وبعض الدكاترة الرجال يمشون هنا وهناك..
وأنا أصرخ: مااااا أبي رجاااااااااال!..
تقول لي الممرضة لا تخافين لا.. أنتي بتسوي لك حرمة..
دخوني.. مكان.. عليه ستارة..
وحطوني..

وجتني قابلة فلبينية وجهها أعوذ بالله كأنها مجرمة.. ملامح الغضب واضحة عليها والنفس شييييينة..
وجت تفحصني.. ونفسسسس الشي..
خلتني أصرخ بغيت أمووووت..
قالت لسا.. ما شفتي شي..!!



وتهاوشني خلتني أفتح رجولي من هنا إلى هناك..
وتجيب أعواد حديد.. ومقصات ومدري إيش..
أنا دموعي تصب.. وأدعي ربي.. والله كاني في معتقل تعذيب..
ياااااااااااا رب ارحمني.. يااااااااااا رب ارحمني..
تخيلوا والله بدون بنج ولااااااااااا شي.. تدخل حديدة وتطلع ثانية.. تسحب المشيمة.. وأنا أبكي وأصرخ.. وهي تهاوش..
كأني بهيمة مب إنسان.. ما عندي إحساس..
وسحبت المشيمة بقوة.. حسيت روحي بتطلع سبحان الله...
وبعدين طلعت لها كم من قطعة..سحبتهم بسيخ الحديد ذا..
وختمتها بأن دخلت يدها تتأكد..
آآآآآآآآآآآآآآه.. والله ما ودي أتذكر.. أتعصر من الألم لا ذكرت..

وكنت أحسب هذا كل شي.. وانتهي..
لكن لسا.. القصة في منتصفها..



قالت لي وأنا أتأوه من الألم وأبكي ودموعي تصب...
قالت أنتي لااازم خياط.. عندك تمزق من الداخل..
مير يوم أصرخ بكل قوتي وأقول لااااااااااااااااااااااااااااا اااااااااااا!!
ما أبي خياط.. ما أبي شي... أبي أطلع من هنا..

قالت لازم تجي الدكتورة وهي تقرر مب أنتي..
وتركتني كذا مكششششششششششفة ورجولي مفتوحة (والجزء اللي تحت رجولي طاويته ما أقدر أنزل رجولي تخيلوا التعذيب).. والتكيف المركزي ينفخ هوااااااااا بارد فوقي مباااااشرة.. وأنا أرججججججججججف من البرد..
والهوا يضرب فيني...
وأقول لها.. نزلي رجولي لين تجي الدكتورة.. تقول لا..
أقول لها طيب غطيني بالشرشف لين تجي حرام عليك.. لا!!

بقيت كذا يمكن نص ساعة.. لحاااااااااااالي..
وأنا ارجف من البرد وأبكي.. ومحد عندي..
وقعدت أحاول أذكر الله.. وأنسى همي بأني أسمع صراخ الحريم وهم يولدون.. آآآآآآآه.. يااااا رب.. إممممم.. سستر طلع الرااااااااااااس (وحدة تنادي الممرضة لأن ما عندها أحد مسكينة)..
مساكين.. وأنا مسكينة بعد..