الجزء الخامس: خياطة بلا بنج.. الآلام المهولة!


بعد طووووول انتظار.. وألم وتعب..
جت الدكتورة.. سودانية..
وعلى طول فحصتني.. لكن فحصها كان أرحم..
وأنا أترجاها أنها ما تيخطني.. باقي شوي أقوم وأبوس إيدينها (لوما انهم معلقيني من رجولي كني خروف العيد هههه)..
قالت لا.. لااااازم.. الجروح صغيرة لكن ممكن تسبب لك نزيف.. وهي عميقة وداخلية..
قامت الركب ترجف من الخووف..
جابت بخاخ.. وبخ بخ..
(أثريه بنج!!!!)
وجابت خيط أسود طويل.. وإبرة.. لا مب إبرة.. ميبر.. هذا طوله!!.. أنا يوم شفتها.. حسبتها بتخبن عباة..!!

وطبعاً فتحت رجولي لما بغت تتكسر.. عظام حوضي تفككت..
وبدت تدخل الإبرة في اللحم.. آآآآآآآآآآآآآآآآآآآآآه.. والله أشوف وأحس بكل شي.. تخيلوا ابرة تدخل في لحمكم؟؟ والله ما أبالغ..

يوم سحببببببببببببت الخيط.. آآآآآآآآآآآآآآآآآآآآآآآآآآآآآآ آآآآآآآآآآآآآآه.. يا ويل قلبي.. جلدي ينسحب.. والله وبالله أني ما أقدر أوصف الألم..

والله أن الولادة تهببببببببببببل بالنسبة لفحصهم وخياطتهم حسبي الله عليهم ونعم الوكيل حسبي الله..
تخيلوا تخيطني وهي توها باخة البنج.. ما مداه حتى يوصل للجلد..
أقول لها الله يخليك اصبري ليما يبدأ مفعول البنج.. تقول أنا مستعجلة وراي شغل..!!! (إحساس الناس مب مهم أبداً خرفان)

وتخيييط وأنا قلبي يتقطع مع كل غرزة.. وأبكي وأصرخ..
والله يا دكتورة يووووووووووووووووووووجع.. آآآه.. يا رب ارحمني.. يا أرحم الراحمين..

وهي تهاوش وتقول كيفك إذا ما فتحتي كويس.. أنا بتركك وبأقوم.. وخليك كذا..!
والله يا ليتها تجرب غرزة من غزراتها بس.. كان عرفت وش تقول..
وهي تخيط ويفتح الستارة دكتور يسألها عن شي.. وأصرخ عليه .. سككككككككر الستارة.. اطللللللللللللع.. يا قليل الأدب!!!!

وأهاوش: ماااااااااااااااااااااا أبي أحد يفتح الستارة.. ولا أحد يفتحها..(تهاوش وهي تتألم وتصارخ خخخ)..
بس صدق وربي حيوانات.. ما فيه كرامة.. ما فيه حياء.. ما فيه إحساس بالناس.. وش رجال كذا يتجرأ يدخل عادي يسأل عن ورقة ومردي إيش.. وينا فيه؟؟
أنا أول مرة في حياتي أشوف مستشفى حكومي والله لا يعودها يا رب العالمين..


المهم... خلصت الخياطة.. وأنا خلااااص.. أنرحم.. منهارة من الألم والصياح..
والله أني أبكي وأشهق مثل البزر من اللي شفته..
حسيت أني دخت.. ما عاد أحس باللي حولي من شدة الألم اللي شفته..
تركوني كلهم وراحوا (أشوى نزلوا رجولي ما قصروا)..
وأنا دمي ينزف تحتي.. لا عطوني كيلوت.. ولا فوط نسائية ولاااا شي..

وأقعد أصيح وأشهههههق..
أبي أمي أبي زوجي.. أبي أي أحد أعرفه ينقذني من هالمكان الإجرامي المخيف..
محد يرد علي..
أصيح على الممرضات أبي وحدة تدخل علي.. ما أحد يرد..
نييييييييييييرس.. نييييييييييييرس..
تعبت خلاص.. وتجمدت من البرد.. ودمي تحتي..
يوم جتني الممرضة.. أقول لها أبي بانتيي.. بادس.. ليش مخليني كذا؟
تقول لازم أنتي تجيبين..
أقول لها طيب شنطتي برا مع أمي.. جيبيها.. قالت لا أنا ما أطلع..!
قلت طيب خلي أمي تدخل تجيبها؟
قالت لا ما يصير أحد يدخل..
قلت لها.. طيب.. اتصلي عليهم يرسلونها..
قالت ما فيه تلفون هنا في القسم.. !!!!
يعني هي مغارة الأشباح؟

على قولة أمي الداخل مفقود والخارج مولود..!!

وأمي وزوجي مساكين جلسوا ينتظروني للساعة 5 ونص.. يعني ساعتين ونص وهم في الانتظار وما يدرون ويني فيه.. وأمي تهاوشت مع الطبيبة المصرية... تقول لها وين بنتي؟ وش صار عليها بعد ما طلعت؟ تقول لها : وأنا ما لي..؟
قالت لها أجل من يعلمنا وينها فيه؟ الممرضات ما يدرون والإداريات ينافخون.. والكل معصب.. مين يعلمنا؟ لنا ساعتين ونص هنا؟
في الأخير بالموت قالت لها خلاص سوت العملية وبينومونها فوق..


راحت أمي البيت تفطر مسكينة هي وأخوي.. وداها زوجي.. هي وخالتي..
وأنا جالسة مرمية في كهف الأشباح ساعتين متواصلة محد يدري عني..
مليت زهقت.. ودمي تحتي.. وبردانة.. وأبكي.. حالتي مأساوية..
ويوم أسألهم.. يقولون.. اصبري لازم الدكتورة تكتب لك ورقة علشان تطلعين من هنا..
والدكتورة حضرتها راحت تصلي.. وشوفي متى ترجع..
ساعة ونص علشان تصلي؟؟؟ معقولة؟
مخلصة خياطتي من الساعة 4.. ولحد الآن ما خلصت صلاتها الساعة 5 ونص..؟

جلست أنتظر لدرجة أني حسيت اني خلاااااص ما راح أطلع من هالمكان.. استغفر الله..
وإيش صار بعدها؟

الجزء السادس: البيببي المتجمد!! منظر مأساوي!



بعد طلللعة الروح.. جاء الفرج.. وسمعت صوت نقالة جاية..
وطبعاً قالوا لي "انقزي عليها".. ومن الفرحة نقزت وأنا أبكي وأصيح...
الممرضة تضحك علي وتقول.. أنتي بيبي؟؟
ليش تبكين؟
وأقول لها بالانجليزي تخيلي حالتي.. أرجوك بس حطي نفسك في مكاني.. وتخيلي وضعي المذل.. وحدة توها والدة ومتألمة ومتعذبة.. ومتروكة في البرد قرابة الساعتين.. ما عليها ملابس داخلية ولا تدري وين زوجها وين أمها.. وما تبيبني أصيح؟
فكأنها رحمتني.. وكلهم كانوا يستغربون أني أتكلم انجليزي.. صراحة من الناس اللي تجيهم..
تعودوا يحتقرون الناس.. لأنهم ما يشوفون إلا أبسط الناس.. وهذي المشكلة..

المهم..
شالتني بالنقالة وغطتني بغطاء صوف الله لا يوريكم شكله مستخدم من عشرين سنة..
يوم وقفت فجأة.. وشو؟
وإلاها بتاخذ البيبي.. يا عمري.. يا حياتي. يا قلبي.. والله أني ناسيته من الألم اللي شفته.. أحسبه مع أمي..
شفت منظر الله لا يوريكم..
منظر ما أنساه بحياتي..
وليدي حاطينه في حاضنة.. وهو مفسسسخ.. ما عليه إلا حفاظة..
رجوله زررررررررق لا كحلية.. وإيدينه زرق.. وشفايفه زرررررررق.. وفتحة التكييف فوق راسه.. وأصابع إيدينه ترججججججف من البرد..
والله قطع قلبي.. بغيت أصيح يوم شفته..
جابته وحطته جنبي في النقالة..
مسكته وضميته.. ودفيته بالغطاء الصوف.. لقيته مثلللج..
حسبي الله عليهم ونعم الوكيل.. والله لو أننا في موزمبيق ما سووا كذا.. وش هالتخلف؟ وش هالإجرام..
هالبيبي اللي توه والد.. يحطونه مفسخ تحت التكييف يا حياتي له ساعتين يمكن في هالوضع..
والله ان رجفة إيدينه قدام عيوني الحين.. كلما أذكرها أحس أني بأصيح..

أنا حرمة كبيرة.. ولابسة ملابس.. وكنت أرجف من البرد.. شلون هالطفل اللي توه طالع من دفا البطن؟
حسبي الله عليهم ونعم الوكيل...

ضميته وقمت أصيح..
وكان راسه فيه آثار مخاط السائل.. حتى ما غسلوا له من بعد الولادة..
وتغطيت بالغطاء..
وصعدوني فوق..
الله لا يوريكم غرفهم شي عجيب..

أغطية صوف جلد النمر!!!!!!!!!! خخخخ مدري من وين جابوها أذكرها يوم كنا صغار موديل قدييييم..

الجزء السابع: الخروج من كهف العذاب!



طبعاً يوم شفت الغرف انصدمت!!
وكالعادة رموني على السرير.. (قصدي أنا قمزت)
ورموا وليدي علي.. مفسخ..
وأنا لازلت أبكي ودموعي تصب..
وكأن الممرضة رحمتني..
قالت لي.. خذي جوالي اتصلي على زوجك.. (كانت الساعة 6 أذن المغرب وأنا ما أدري وينه ولا هو يدري ويني فيه)..
وأتصل عليه.. يوم كلمته ويصرخ.. (عاد هو حاس بتأنيب الضمير)..
ويييييييييييييينك فيه؟ شلونك؟ شصار عليك؟
وأنا خانقتني العبرة يا الله أتكلم.. قلت له.. أنا غرفة 413 (نسيت الرقم).. ما أقدر أطول.. هذا جوال الممرضة.. جيب شنطتي بسرعة..!
المشكلة أن وقت الزيارة عندهم محدد.. وهذا ما كان وقت زيارة..
وزوجي يفرررررك يبي يدخل مب قادر.. وأمي كذلك.. يبي يدخل الشنطة رافضين..!!!!
في الأخير تهاوش مع مدير قسم وقال إن ما دخلتوا الشنطة عليها والله لأدخل وما يردني أحد.. ولا عشرين سيكيورتي..
وأخيراً سمحوا.. ودخلوا الشنطة وجوالي مع عاملة هندية.. وخلوني أوقع على ورقة استلام..
يوم وصلتني الشنطة..
أقول للمرضة خذي البيبي لبسيه (مسكينة انا لحد الآن ما عرفت المكان الوحشي اللي أنا فيه).. قالت لا أنتي لبسيه له أنا ما لي دخل..!!!!!!!!!!!
وأمسكه وألبسه وأنا إيديني ترجف من التعب (ولحد الآن صايمة ما أفطرت).. والمغذي معلق علي.. مني عارفة كيف ألبسه..
بس كل اللي في بالي كان كيف أدفي ولدي يا قليبي..
وأضغط على نفسي وأغير له حتى ملابسه صار فيها نقط دم من يدي لأن كانوا معلقين المغذي بطريقة سيئة..
يوم لبسته.. جاء دوري.. ودي ألبس كنت بردانة.. وقرفانة من ملابسهم وريحتها.. وأبي ألبس ملابس داخلية.. علشان أحترم نفسي شوي..

وأيضاً بالموت..
وقفت وحسيت بدوخة.. ولبست ملابسي..
ورحت الحمام أبي ألبس وأنظف نفسي.. وجت الصدمة المقرفة أن الحمام ما فيه رشاش موية.. ولا ابريق ولا شي.. زي حمامات الأجانب.. أدور على الأقل مناديل.. ما فيه!!
يعني قرف على أصوله..

المهم غيرت.. وتعشيت شوي أكلهم الحق لله يقال ما كان سيء..
كان ممكن نفسي تنسد.. لكن من التعب والدوخة حسيت أني لازم آكل وإلا بيغمى علي في أي لحظة..

وما أدري كيف جت الساعة 9.. بعد طوووووول انتظار.. ودخل زوجي وأمي وأبوي..
يوم شفتهم قمت أصيييييييييييح.. وأبوي والله بغى يصيح.. يا عمري..
وزوجي عيونه حمرت..
كانت حالتي تنرحم..
وعلى طول زوجي أخذني بيطلعني من المستشفى.. أمي حلفت قالت والله ما تجلسين ولا ساعة في هالزريبة..

ورفضوا ينقلوني في سيارة إسعاف..
قال زوجي خلاص نوديك بالسيارة..
وأبوي راح وتهاوش مع الإدارة.. طلعنا من المستشفى وهو يصرخ عليهم..
وأنا دفعني زوجي بكرسي عجلات لما وصلت السيارة وركبت مع أمي..

حتى الكرسي تصوروا ما سمحوا لنا نستخدمه إلا لما أخذوا بطاقة أحوال زوجي؟؟

المهم.. ركبنا السيارة وطلعت من المستشفى.. وأنا أصيح من الفرحة أن ربي نجاني من هالمكان المرعب..
الحمد لله يا رب العالمين.. كنت ماسكة ولدي في السيارة وأصيح.. وكلهم ساكتين..
حسيت أن أمي وزوجي لو تكلموا يمكن يصيحون..




الجزء الثامن والأخييير: الخروج من الجحيم إلى الجنة!!


وصلنا بفضل الله مستشفى المملكة..
والله ما أوصف شعوري إلا كأن ربي من علي بالرحمة والمغفرة..
تخيلت أني طالعة من النار من جهنم.. وربي من علي وغفر لي ودخلت الجنة.. مع الفرق الكبير ولله المثل الأعلى..
لكن هذا أقرب شيء لشعوري..
سبحان الله..
من دخلنا والكل يبتسم ويرحب.. ودهم يشيلوني من الأرض..
على طول جابوا لي كرسي.. وممرضة تدفعني.. وبعد شوية اجراءات ما أخذت عشر دقايق.. دخلوني غرفة الطواريء.. وجتني ممرضة حبيبة.. وشالتني من الكرسي وساعدتني أجلس على كرسي الفحص..
وأخذت مني البيبي.. وجابت كراسي لأمي وزوجي يجلسون عليها..
وقالت لي اصبري شوي الحين تجي الدكتورة..
وعطتني مسكن علشان آلام المغص اللي كانت متعبتني.. وقامت تمسد أكتافي وتمسك يدي..وتمسح على راسي..

وحتى يوم جت الدكتورة..
راحت الممرضة على طول سكرت علي الستارة علشان زوجي وأمي.. يعني شوفوا كيف الخصوصية والاحترام..
الدكتورة طيييييييييييبة لأقصى حد.. كسرت خاطرها وكانت تضحك وتكلم البيبي.. وتقول لها أنت ليش كذا مستعجل على الدنيا؟
ولما قلت لها أبي أجلس يومين هنا في المستشفى تعبانة ممكن تكتب لي على تنويم ليلتين (لأن الطبيعي ليلة وحدة بس، وحنا على التأمين).. قالت اللي تبين إن شاء الله أربع أيام..
وما فحصتني من تحت (ربي رحم حالي).. بس لمست بطني وقالت أوكي ما فيه باقي مشيمة الحمد لله..

وجاء طبيب الأطفال وأخذ البيبي.. وفحصه وقال الحمد لله طبيعي (في مستشفى القمامة ولا طبيب فحص عليه).. وقام يسأل أمي إيش سوت لما ولدت.. وقال الحمد لله سليم بس صغييير حجمه وحرارته منخفضة شوي لأنه تعرض لبرد (من مستشفى الوحوش الله لا يبيحهم)..

المهم.. نقلوني للغرفة..
وتعالوا شوفوا العناية... والتعامل الراقي.. الممرضات ودهم يشيلونك من الأرض..
ما يبونك تلمسين شي.. الكل يبتسم لك ويضحك في وجهك..
والغرفة تبرح فيها الخيل مرتبة ونظيييفة..
يوم دخلت الحمام أعزكم الله وإلا أكوام الفوط والكيلوتات اللي من شاش.. والله أن الحمام كأنه حمام فندق 5 نجوم ما شاء الله..
حتى أمي.. من نفسهم راحوا جابوا لها شراشف ومخدة وكل شي.. ولما قالت لهم أن ودها تطلب من مطعم برا المستشفى... راحوا جابوا لها قائمة بأسماء كلللل المطاعم القريبة اللي توصل.. والمينيو معها..
والبيبي أخذوه وغسلوا له ونظفوه وجابوه يجنن تو يطلع وجهه يا عمري..
ملبسينه ملابس من عندهم مرتبة ونظيفة.. أبيض وسماوي.. مع قبعة..
ورضعوه..
وقالت لي الممرضة أنتي تعبانة.. ارتاحي اليوم.. خليه عندنا ومتى ما صحيتي من النوم اتصلي علينا نجيبه..
وكذلك مندوبة المطبخ جت وقالت حنا ما راح نزعجك بالفطور.. في أي ساعة تبينه اتصلي.. أو حددي الوقت من الآن.. علشان ما نجيبه في وقت أنتي نايمة أو مشغولة ونزعجك.. قلت خلاص أتصل عليكم..
وكذلك التنظيف.. قالوا ما راح ندخل ونزعجك متى ما ناسبك وقت اتصلي نجي ننظف الغرفة..
والحمد لله بت الليلة عندهم مرتاحة جسدياً.. ونامت أمي معي..

لكن بديت فجأة استرجع كل ذكرياتي..
ورجعت أصيح وأبكي مرة ثانية.. وزاد الوضع علي..
ما طاع يجيني نوم..
قعدت أصيح وأصيح وأنا أتذكر الأحداث.. حتى حسيت قلبي بيتقطع ونفسي بيوقف..
قامت إيديني ترجف.. وأنا أصيح..
واتذكر الألم... والذل.. والخوف.. ووليدي يوم انه مفسخ.. وشعور الضياع بدون أمي وزوجي.. والإهانة.. والبرد القاتل.. وكللللللل شي..
وقمت أصيح وأصيح..
وفي ذيك اللحظة تقريباً الفجر كتبت لتوتة يوم أقول لها ادعي لي.. لأني فعلاً كنت منهااارة.. وحسيت هموم الدنيا كلها على راسي.. وكنت حاسة أن كل سكين ألم انغرس في صدري ذاك اليوم..
والله شعور الإهانة والذل والألم والصراخ مب هين.. حسبي الله ونعم الوكيل عليهم..
صحت وصحت لماااااااا خلصت دموعي..

وبعدها حسيت كأني أغمى علي.. ورحت في نوومة الحمد لله.. كان لي حوالي يوم كامل ونص ما نمت فيه مثل الناس.. فغرقت في النوم وما وعيت إلا الساعة 8 ونص.. والحمد لله يوم شفت المكان وتذكرت أني في المملكة ارتحت نفسياً وحمدت الله..
وطلبت البيبي.. وجابوه نظيف يهبل قلبوس اسم الله عليه..
وطلبت الفطور وجابوه.. والحمد لله حسيت أن ربي من علي ببركة دعاءكم وصارت نفسيتي أحسن.. لما شفت العناية والدلال والبيبي نسيت الماضي.. طبعاً ما نسيته لكن ما صارقدام عيوني زي أول..

ايش رايكم بقصتها تأثرت فيها كثير وخايفة تجيني اولادة فجأة زيها :(
لانها تقول ماتوقعت تكون ولادة لان الطلق ماكان منتظم

السلام عليكم ورحمة الله وبركاته

انا متابعة معاكم بصمت لكن القصة خلتني انطق

ياقلبي عليها شافت الهوايل,الله لا يحرمها الاجر

لكن خذوها مني نصيحة ولا وحدة منكم تجامل على حساب نفسها,

الاخت تقول ما كان منتظم الطلق يجيها كل دقيقتين!!!!خلاص كل دقيقتين معناها غرفة الولادة.

الله يهون علينا وتكون ولادتنا سهلة ميسرة.