أغصان الشجر @aghsan_alshgr
محررة برونزية
°•.ღ.•° سـ ـ ـ والـ ـ ـ ـيف الأولــ ـ ــيــ ـ ـن °•.ღ.•°
السلام عليكم ورحمة الله وبركاته
:26: يالله حيهم كلن باسمه :26:
حيّــاك يامــن جيــتـنــا اليـــوم لافــي .. الدار دارك وإنــــت ضمــــن الجمـــاعــه
بما اني ماأجي اكتب موضوع من الدميجه الا مع المواسم فأبشركم التمر أغلبه طاح << باللهي
مبطيين عن سواليف التراث فببدا بس واعتبر الي فوق مقدمه
ღ نبي نبيد المال قبل يجي قضاع ويبيده ღ
كان فيه رجال بخيل بالحيل .. وكانت شغلته انه يتاجر ببعض فلوسه فيروح بلده ثانيه ويجيب بضايع ويبيعهن وعلى هالحال .. :09:
كبر الرجال في العمر وهو مااعرس وولا عنده عيال كلذا خوفن منه على قروشه ما يبي يصرفهن على حرمته وعياله .. :22:
فمرتن جاه واحد يعرفه وقاله يافلان ورا ماتعرس وتجيب لك مره اذا انشق ثوبك تخيطه وتطبخ لك وتوسع صدرك ووو .. :eek:
والرجال ماهيب داخله الفكره براسه لان وراها صرف قروش !:(
قاله خويه شف عندي لك وحده أرمله متوفين زوجها ومعها وليد يتيم
ماتبي منك ولااا شيء لا تصرف عليها ولا على ولدها ولااشي ماتبي منك الا الستر ..
وقام خويه يزن علية ليين اقتنع واعرس عليها .. وقعدوا عنده الأم والولد شهور لا ذاقوا اللحمه في بيته
ولاشيء والحرمه صابره عشان وليدها ومتحمله .. ومره كان الرجال رايح لبلده ثانيه عشان يجيب منها بضاعه
وكان الوقت برمضان ويوم وصل الرجال البلده دخل المسجد وجلس فيه وكان الوقت قبل أذان المغرب
فقعد الرجال يحتري احد يعزمه على الفطور ولا أحد من الي بالمسجد قاله شيء كلهم مثله مسافرين وجالسين يرتاحون
والا يصلون ضاق صديره ويوم جاء يبي يطلع والا يدخل عليهم رجال توه صغيرن بالعمر وقال :
الي ضيف على هالمكان والا مسافر والا فقير والا أي شيء حياه الله على الفطور في ذا البيت الي قبال المسجد
عاد كلامه كم مره وطلع من المسجد ..
انبسط خوينا البخيل وقبل الأذان طلعوا كل الي بالمسجد الي راح لبيته والي راح معه لبيت ذا الرجال
ويوم دخل ويشوف المجلس ملياان ويشوف ذا الذبايح والنعمه واجده وتطير عيونه .. بعد ماافطروا قال نفس
الرجال يااخوان الي فقيروالا ضيف مايعرف احد والا أيي شيء حياه الله هنا للسحور .. ويوم جاء وقت السحور
والا يشوف ناس جدد وبعض الي كانوا موجودين وقت الفطور ويشوف ذا النعمه والذبايح والناس تاكل وتمشي..
بعد ماتسحر راح للسوق يحتري المحلات تفتح ويشوف واحدن جاي للسوق يبي يفتح محله قاله : انت من ذا الديره ؟
قال : ايه
قاله : طيب وش قصته راعي ذا البيت " وأشر له على بيت الرجال " الي يعزم الناس على الفطور والسحور ؟
قال : هذا الله يسلمك كان في رجالن بالديره بخيل قضى عمره بس يكنز ذا القروش عنده ولا يصرف منها شيء
على نفسه ويوم كبر بالعمر اعرس له على ارمله عندها ولد اسمه قضاع .. وعيشهم عيشتن قشرا معه..
بعد فتره توفى الرجال وترك فلوسه كلها للحرمه وولدها والي شفته انت هذا هو قضاع قاعدن يلعب بالفلوس لعب .
المهم .. شرا الرجال البخيل بضاعته ورجع لديرته وقبل لا يدخل على أهله راح للسوق وشرا نص بعير
وقال ارسلهم لبيت فلان وشرا حطب وقال ارسله لبيت فلان وشرا تمر وفاكهه وخضار وارسلهن ..
ويوم دخل بيته وتجي حرمته مرتاعه
قالت : يافلان وش القصه تو جانا راعي التمر وراعي الخضار والفاكه وجانا وجانا
قال: ايه انا مرسلهم
قالت : وش الطاري ووش صاير
قال : نبي نبيد المال قبل يجي قضاع ويبيده ..
قالت : ليت قضاع جاي من زمان
ღعساها قاسمة خير ღ
يقال ان فيه تاجر من تجار العقيلات كان كل ما صار له موقف شين والا حصل له أي شيء
كان يردد : " عساها قاسمه خير " ومن كثر ترديده لذا الجمله صاروا أخوياه يتضايقون منها ..
وفي أحد سفريات هالتاجر كان معه اثنين من اخوياه وكانوا رايحين يجيبون لهم بضايع وكل واحد معه مزودته
فقاموا أخوياه وقالوا نبي نعرف وش قوة ايمانه بهالجمله الي يرددها قبل كلما صار له شيء ..
يوم جاء الليل ونام التاجر جوا أخوياه الثنين وفتحوا مزودته وخذوا كل القروش الي فيها وحفروا لها حفره
ودفنوها وناموا ..
ويوم جاء الصبح جاب كل واحد مزودته وقعد يعد القروش الي فيها ويوم دخل عليهم الرجال قال وراكم تعدونها
قالوا عشان نعرف كثر ايش بنشتري بضايع ولازم نحدد قبل ونعرف وش معنا زين قام وراح يبي
يجيب قروشه ويعدهن معهم ويوم فتح المزوده ولا لقى بها شيء فرجع لاخوياه وقال : شكل القروش
طاحت من المزوده وحنا نمشي بالطريق .. لااكن "عساها قاسمة خير" قاموا أخوياه يقولون له هالحين
قروشك راحت في ذا الطريق الي قطعناه وتقول "عساها قاسمه خير " وين الخير معه ؟
قال : هذا كله من تدبير ربي ويمكن انه يوم ضاعت قروشي كان صارفني عن شيء ويبي لي الخير ..
سكتوا أخوياه وقاموا يتقهون وتقهوى معهم وهو راضي بقضاء الله ..
وفي نفس الوقت هجموا عليهم قطاع طرق وأخذوا كل مالهم وحلالهم وما خلوا لهم شيء الا قربة يشربون منها
ودلتهم الي تو يتقهون فيها .. بعد ماهدا الوضع قالوا لخويهم ياابن الحلال ترا السالفه كذا وكذا وكذا وقروشك
ترانا دافنينها بالمحل الفلاني عشان نختبر قوه ايمانك وعوضك الله خير ..
ღ تساوى الغارب بالسنام ღ
كان فيه واحد من العقيلات رايح هو وعبدن له " وكلنا عبيد لله " المهم وهو في الطريق هجموا عليه قطاع طرق
واخذوا كل قرووشه وحلاله الي هو رايح يتاجر بها قام العبد قاله ياعم : " تساوى الغارب بالسنام " والمعروف ان
السنام عمره ما يتساوى مع الغارب وهو يقصد اني انا وياك صرنا مثل بعض .. المهم الرجال شينه يرجع لأهله
وهو مسروق فرجع للديره وهو متخفي وأول ما دخل بيته صك على العبد في حجره .. وراح عند واحد من اخوياه
وقال له القصه قام قاله خويه شف لااحد يدري بالسالفه انا عندي كروش وبدبر لك زياده عليها وجمع له لين جاب له
قيمة القروش فسافر وجاب بضاعه وباعها وسافر ورجع وعلى هالحال لين مارجع فلوس خويه وجمع نفس
قروشه الي انسرقت فراح هو والعبد عشان بيشترون مره ثانيه وهو في الطريق مر على المكان الي قال له العبد
فيه الكلام وقاله يافلان : يتساوى الغارب بالسنام ؟
قال العبد : لا ياعمي مايتساوون ..
:
ان شاء الله جازت لكم سواليفي
..
تم لطشها من جدتي اللهـ يخليها لنا
:
والي عندهـ جدهـ ياليت ماتبخل علينا من سوالفهم
..
أختكمـ ..:..أغصان الشجر
5
877
يلزم عليك تسجيل الدخول أولًا لكتابة تعليق.
الصفحة الأخيرة