يامرحبا يامرحبا نوركم حاس المنتدى وخلاه يخبط ويعلق ويعيي علينا اننا نعدل
مير نقوله: أفتح انا تأبوطه اللي تو كتبت الرد قال اقول دحدري وضفي وجهك
قلت : حرام عليك ما أمداك تنسى وجهي افتح بس وخلك رجل
<< وش عندها قالت معاناتها بالتعديل
اسمعوا ترى هالخرابيط اللي فوق ايقالها مقدمه<< تسمع بالمقدمات
أول شي نصيحه اللي مشغوله و وراها شغل << كلهن نفس بعض يالدلخه
لاتكمل القرايه لان هالموضوع عبارة عن تفريغ شحنات
وخرابيط بناتاكيد استغربتوا العنوان وقلتوا وش هالبعير
اللي تاكل سيريلاكبس بصراحه اليوم قررت اقولكم قصتي مع هالحب الغريب والمفاجئ
في يوم من الايام راحت تأبوطة للمطبخ
وبدت تحوس فيه وفجأة
وبون سابق انذار فتحت دولاب من الدواليب ولقت فيه علبة سيريلاك
وبدأ قلبها يخفق ويخفق
فتذكرت ايامها الخوالي << خوالك ولا اعمامكخخخخخ ايام ماكانت اذا قالت لها امها سوي سيريلاك لدحومي
قمزت تقل مقروصه وراحت تسوي له وغطست وبدأت امها تصوّت لها
تأبوطة تأبوطة وينك فيه نمتي؟؟!!
وهي تأكل
من ذا السيريلاك وهي بالطريق تمسح الآثار
الباقيه على الخشه وماجاورها مثل الخشم
اللي حتى هو ماسلم من ذا الحب
ايه لاني مابعد افصحت لأمي عن هالحب
وبعدها استيقظت
من هذا الحلم الجميل << ادعس يا استيقظت وقلت ليش ما افتح العلبه يمكن القى لو قطرة سيريلاك
لوهو له حول الخمس سنين منتهي تاريخه
عادي وش بيصير اذا اكلته؟؟
بس بأموت
وقبل لا اموت بأمرضولكن يوم فتحته تحطمت وتكسرت ورحت لأبو ريالين ادور صمغ اصمغ نفسي بوه
<< ياشيخه وراك كل شوي لافه عن الموضوع ؟؟
المهم تدرون وش صار اللي بالعلبه
شاهي ويافرحه ماتمت
المهم وتمسك براس اني آكل سيريلاك
مير اروح لأمي قلت : يمه قالت: سمي قلت : سم الله عدوتس ابي سيريلاك
مير تقوم امي وتحط ايدها على جبهتي تبي تشوف يمكن إني مصخنه واهذري
ياعمري أمي انصدمت وما استوعبت الوضع قالت: ماسمعت عيدي
قلت: أبـــي سيريلاك قالت : وشهو سيريلاكه؟؟!!!! قلت : هذاك أكل البزراين
قالت وش تبين بوه قلت ابي قلت: ابي اصور معه يعني وش ابي فيه ابي اكله
يتبع مثلكم وش حيثكم مواضيعكم طويله
المهم امي ماعطتني وجه لانها متعودة على خطماتي"دخلاتي وشهواتي"
اللي مدري وش تبي!!!
ويوم اتصلت خالتي قالت لها امي: الا اقول ماعندكم سيريلاك لولدك الصغير؟؟
قالت خالتي : لمين؟؟! تحسب امي ولدت ولاده مبكره هههههه
قالت امي: لتأبوطه
نفس الحالة تنحت خالتي وصارت أعقل مني وقالت لأمي اقري عليها يمكنها مصخنه
المهم بنفس اليوم صجيت امي ابي السوبر ماركت قالت: وشوله؟؟
لانها نست سالفه السيريلاك
قلت : بس قالت: طيب ،، وطلعنا للسوبر ماركت وطرت اخذت عربيه
وقلت لأمي: بروح اجيب شي وبرجع قالت : طيب
وطيرااااان لقسم اغذيه البزران واتنح عند السيريلاك وقمت اقول في نفسي :
والله وأحلويت وتغيرت طلع لك أنواع وش كثرها
وقمت اطالع الانواع بتلذذ ونسيت نفسي ،،والناس يمرون ويتنحون فيني
وأنا اللي اخذ سيريلاك بنكهة القمح وابدا اقرا طريقه التحضير
وانا واقفه بنفس القسم علشان اول ما ارجع للبيت اسويه على طول
بدون ما اضيع وقت واقرا الطريقه<< شفتوا اختصار الوقت
ومير تجي امي وتكفشني بالجرم المشهود والناس مازالوا يمرون ويتنحون
قلت : يمه ترى اخوي الصغير اللي بالبيت ميت جوع << حشى مجاعه
يقول جيبوا لي سيريلاك ، والناس متنحين يقولون امها حامل وتبي سيريلاك لاخوها الصغير
واخوها الصغير يتكلم ، قلت : قصدي لولد خالي
وأمي فطست ضحك على كذبتي اللي واضح إن فيه إن بالموضوع
قالت لي: انتي منتيب عاقله عن هالرجه ؟؟ قلت: لا ، قالت : طيب خوذي اللي تبين
واخذت علبة السيريلاك والفرح يغمر قلبي الصغير<< صدقت انها بزر
ويوم رجعنا للبيت وانا لابسه عبايتي سخنت المويه وجهزت صحن وملعقه
ايه لاتحسبوني صدقت اني بزر بقوة واشتريت رضاعه
مع إن امي تقول : ماتبين رضاعه علشان تكمل سالفه البزران؟؟ قلت: لاعادي اكله بصحن
المهم سويت لي الخلطة واكلته بصحه وهناء ورحت غبيته بدولاب بغرفتي علشان ماحد ياكله
وحطيت معه ملعقه علشان الوجبات الخفيفه اكله بدون مويه
وتخيلوا صرت احيانا من زينه أحط راسي على المخده ابي انام بعدين اقمز واقول:
مشتهيه سيريلاك واروح اسوي لي وارجع انام،، لكن والله ياهو لذيذ
وآخر شي حبيت اقول للي قروا موضوعي لاتتشمتون
وروحوا غثوا امهاتكم قولوا نبي سيريلاك واشتروه وكولوه وشوفوا وشلون هو لذيذ
وسلامتكم
محدثتكم الطفله : تأبوطة بنت أم تأبط
ومع السلامه بروح آكل حبيب قلبي
قبل لاانسى خوذوا صورة هديه ذكرى مني للسيريلاك
^
^
^
وشوفوا هالصورة
البلاء انه مكتوب هيئي طفلك ماقال هيئي بعيرك
خخخخخخخخخخخخ
^
^
^