السلام عليكم ورحمة الله وبركاته
أخواتي الكريمات
هذا طبق من ابتكاري والالوان طبيعية
مفيد ولذيذ وسهل وراح يحبونه الاطفال كثير
الطبق مافيه مقادير مخصصه
انتي وتقديرك
نبدأ في الصور
وهذي اذا حبيتي تسوينها بصينية وباللون اللي تبينه
انا سويتها برمضان الماضي وكنت مستعجلة عندي ضيوف وصورتها على الماشي
الطريقة:
1/ كشنه ( بصل +ثوم+طماط مقطع صغير+فلفل رومي مقطع صغير+ملح +بهاراتك المعتادة )
2/ حطي على الكشنة دجاج صدور مقطع قطع صغيرة جدا.
3/ حطي المكرونة (مكرونة سلطة) اللي حجمها صغير.
حطيها على الكشنه وخليها ثواني تتشرب التسبيكه
بعدين صبي عليها مويه..كأنك تطبخين رز
وهذا يخلي المكرونه تطلع طعم ثاني..غير المعتاد.
...........................
كذا خلصت الطبخه
بس نجي للخلطة والاخراج
حطي في قدر ثاني ( كوسى بقشرتها + جزر + بطاطس )
واسلقيها بدون اضافات
واثناء السلق
تجيبين صحون صغيرة بحجم الكب كيك
واذا ماعندك سوي مثلي خخخخخخخ
حطيها في اكواب الكب كيك في الصينية مباشرة عشان تتماسك قبل التقديم ماتخرب عليك
بس اللي عندها قوالب صغيرة حقت كريمه وبادونق تطلع احلى في التقديم
بس قبل ماتحطينها اخلطي مع المكرونه بعد ماتستوي جبن مبشور عشان تعطي طعم وتتماسك
وحطيها في القوالب
.........................
بعد مايستوي الخضار اللي بالقدر
1/ اللون الأخضر
شيلي الكوسى وهي حارة من القدر مباشرة وحطيها في الخلاط
وحطي معها نص كاس جبن مبشور و(جبن سائل أو قشطة أو مايونيز ) بالكمية اللي تبينها + شوي شبت + شوي بقدونس عشان يطلع اللون الاخضر وصبيها فوق المكرونه في بعض القوالب.
2/ اللون البرتقالي
نفس السابق بس بدون بقدونس وشبت ..شيلي الجزر من القدر وهو حار وحطيه في الخلاط مع الجبن المبشور و ( جبن سائل أو قشطة أو مايونيز )
3/ اللون الوردي
نفس الطريقة السابقة لكن حطي مع البطاطس شرائح بنجر حتى توصلين لدرجة اللون اللي تبينها..وردي او فوشي
......................
التزيين
( حبة سوداء – زعتر – سماق – سمسم – خبز محمص )
أو أي شي تشوفينه مناسب حطيه وشكليه بأي شكل تبينه
.....................
الطبق طعمه يجنن مغذي ومفيد وشكله رهيب ويحبونه الصغار
عشان الالوان تجذبهم
وبالنسبة لي قدمته للزميلات والنتيجة
كتبت الطريقة وصورتها ووزعتها للموظفات J
أي استفسار انا جاهزة
اعرف ان شرحي مثل وجهي حلو J
اختكم /
عبير....أم حمدان مسدحه الخرفان
