السلام عليكم ورحمة الله وبركاته

اول شي انا كتبت هالموضوع عشان ابين لكل وحده يائسه ان رحمة ربي فوق كل شي ،، وبعد ما الله رزقني بالولد عرفت ان تاخير حملي كان خيره لي والحمدالله ،، الله رزقني بالحمل التام ،، والطفل السليم ،، يارب لك الحمد😌

انا بذكر لكم قصة حملي وان شاءالله ما اطول عليكم☺️
بعد زواجي بشهرين حملت طبيعي ،، وكنت مابي الحمل طول وقتي بس ابكي ،، استغفر الله
ولا كملت اسبوع من عرفت اني حامل الا الجنين طاح ،، 😔
زوجي حزن كثير وانا كان ضميري يأنبني اني رفضت الحمل ، وبعد فتره قلت مثل ماحملت اول مره اكيد بحمل اي وقت ابي
بس ماصار مثل ماكنت اضن تأخر حملي خمس سنين،، خمس سنين وانا انتظر حلم عمري..
اول ما اجهضت استمرت ع المانع لمدة ثلاثه شهور وبعدها تركته ،، اول شهر من تركت المانع كنت متاكده اني بحمل بس ماصار حمل قلت اكيد الشهر اللي بعده ونفس الشي ماصار حمل ،، انشغل بالي كثير قلت لازم اروح لدكتوره اتاكد اني سليمه ،، وكنت عارفه ان بدري ع الفحوصات والتحاليل ، كل هذا صار في السته الشهور الاولى من زواجي
بس لاني كنت مستعجله ع الحمل ظليت اتاابع السنه الاولى كلها ،، كان عندي ضعف في التبويض بس مع الكلوميد يصير عندي التبويض ممتاز
ضيعت اول سنه من زواجي في المستشفيات والقلق والسهر والتفكير👎
وثاني سنه ماتفرق عن الاولى ،، وفي السنه الثالثه بعد محاوله مني واقناع وافق زوجي انه يحلل وطلع عنده بطئ في الحركه ،، تعالج لمدة اربعه شور بس وترك العلاجات كلها ،، وانا قالت لي الدكتوره ماعندي لك حل كل شي عندك طبيعي وسليم ،، تحطمت وانقهرت ويأست قلت خلني اعيش حياتي واعيش كل يوم بيومه واترك موضوع الحمل على ربي ،، اذا لي رزق باخذه لو بعد عشرين سنه ،، تناسيت الموضوع لمدة سنتين ومن يطري علي موضوع الحمل احاول اغير تفكيري قد مقدر ،، شغلت نفسي بدوامي وعلاقاتي وزيارات صديقاتي بس ماكنت اغفل عن الدعاء والصدقه ودائما اقول في نفسي الله مو غافل عني واكيد بيجي يوم ببشر فيه زوجي وكل الناس اللي تترقبني بخبر حملي واكيد بتمر علي اعراض الحمل وبجرب الام الولاده ،، في السنه الخامسه من زواجي راح زوجي يسوي تحاليل من غير مايقولي قاله الدكتور اول شي تسويه تنظم اكلك ونشاطك ،، وبالفعل صار ياكل كل شي مفيد اسماك ولحوم وخضروات ودخل نادي رياضي ،، قبل احمل بشهر رحنا نسوي تحاليل وفحوصات ،، انا طلع عندي كل شي سليم ،، اما زوجي نفس المشكله بطئ في الحركه ، بس قالو لازم نعيد التحاليل مره ثانيه ، وعشان يسوي التحليل لازم مايصير بينا شي لمدة ثلاثة ايام ، وكانت الدوره قريب تجيني ، قال زوجي خلاص اذا جاتك الدوره بروح اسوي التحليل ، وانتظرت الدوره يوم ويومين وثلاث واسبوع وماجات ، كنت مستبعده الحمل مع ان دورتي منتظمه بس ماحطيت في بالي حمل ابد ، وبعد ماتاخرت اسبوع سويت تحليل منزلي وطلع اجابي ، رحت الدوام وقلت لزوجي يجي ياخذني عشان نروح نسوي التحليل في المستشفى ، طول اليوم كنت اشتغل وفكري مو معي وزميلاتي يكلموني وانا ماحس اني اسمع احد ، كنت في عالم غير عالمهم ، عالم كله امومه وسعاده ،، استأذنت من الدوام ورحنا اقرب مستشفى اخذو مني العينه وقالو لي انتظري عشر دقايق ، كانت اطووووول عشر دقايق بحياتي ، كل شوي اطالع الساعه ، وانا انتظر على نار نادو باسمي ، وعطتني النتيجه ايجابي ، لما اخذنا النتيجه شعوور لاااااااايوصف ، زوجي من فرحته مو عارف يبشر مين بالخبر قال للسستر هذا خمسه سنه مافي حامل والحين في حمل بس هالغبيه فشلته 😡👊
قالت له ببرود انا ايش يسوي؟؟
وانا طول طريق رجعتنا للبيت وانا ابكي وفي عالم ثاااااني ، زوجي يسالني وش ابي فطور بس انا مو في جووه ولا جو فطور ، طول الطريق وانا اتخيل ردات الفعل وابشر مين قبل وابدأ بمين ، ابي افرح كل الناس اللي تنتظر خبر حملي
والحمدالله مرت فترة حملي خفيفه وسهله


والله رزقني بأجمل نعمه بحياتي ،، وصارت كل ايام الانتظار والصبر والسهر ذكرى


يّ ربّ لك ﭑﻟ̲حمَد گمآ ينبغي لجلاّل وجَهّك ۆ عظٌيّم سٌلطّانڳ ..