حوامل الامارات (تجمع) 2

شخباركم كرووووشات

حبيباتي بغيت أسألكم عن جهاز مراقبه الطفل وين ينباع غير البيبي شوب

الاني مجربه من عندهم والصرااااااحه النوعيه مو زينه أبدا...

أم سوافي و شهد .. اختي بتلقين هالجهاز واللي هو حايز على جوائز عديدة من مجلات متخصصة بالحمل و الولادة .. و هو افضل جهاز في السوق.. و بتلقينه عند مذر كير و بيبي شوب واسمه :
Tomy Walkabout Platinum Digital





مميزاته:
1) ديجيتال : فيه 120 قناة يسمح بالتقاط صوت نقي و صافي بدون اي انقطاع او تداخل مع اجهزة مراقبة ثانية.
2) تغطية لمسافة 300 متر و تقدرين حتى تشتغلين في المطبخ و و تنزلين برا في الحوش بدون ما ينقطع الارسال.
3) تقدرين تكلمين الياهل وانتي بالغرفة الثانية و تهدينه او تهددينه خخخخخخخخ.
4) خاصية التشفير: ما حد يقدر يسمعج او يسمع الياهل.
5) اضاءة تولع تلقائيا يوم الياهل يسوي صوت او يصيح.
6) تقدرين تجرجين الالة الخاصة بغرفتج و تشلينها معاج بدون ما تحتاجين بطارية اضافية.
7) اضاءة خاصة ليلية تشغلينها من جهازج قبل ما تدخلين على الياهل و ما تزعجينه بليت الغرفة القوي.
8) مقياس درجة حرارة الغرفة.
9) ذاكرة لتخزين موعد آخر رضعة.
10 ) خاصية التنبيه بالهزاز اذا كنتي في مكان فيه صوت عالي مثل غرفة الغسيل او اذا كنتي تستخدمين الخلاط في المطبخ

شخباركم كرووووشات
مافي جديد ؟؟؟؟؟؟؟؟؟؟؟؟

هلا كروشات .. كالعادة يايبتلكن مقال يجنن قريته في مجلة Mother & Baby البريطانية عدد ديسمبر 2006 و يقولون فيه اذا سويتي هالخطوات بتكون ولادتج اسهل و مدتها اقصر.. يالله بخبركن عن هالخطوات:
الخطوة الاولى:مساج منطقة العجان:
طبعا هالمساج مب مثل مساج المنتجعات الصحية.. لكنه له فوايد كثيرة منها انه يقلل من ضرورة الخياطة و يقلل من حدوث التشققات و الجروح.. و يخلي الجلد مطاطي.
طريقته:
تبدأ الحامل من الاسبوع ال 30 بهذا المساج باستخدام زيت غير معطر مثل زيت اللوز الحلو او زيت الجوجوبا او الزيتون او الزيت اللي تصرفه الدكتورة سوادح. ادهني اصابعج بالزيت و دخلي صبعين او الابهامين( بعد ما تتأكدين انج غسلتي ايدج عدل و اظافرج قصيرة) داخل فتحة المهبل و اضغطي للاسفل بأتجاه فتحة الشرج و خلج ضاغطة لمدة دقيقتين و بعدين حركي يمين و يسار على طول الجلدة من تحت مع الضغط المستمر و امسكي الجلدة و شدي للخارج كأن راس الياهل يشد الجلد للخارج.. سوي هالمساج كل يوم .. لين ما تولدين بالسلامة و يقولون اللي تسوي هالمساج مستحيل يصير لها اي تشقق و ما بتحتاج اي خياطة و بترجع المنطقة مثل ما كانت قبل الولادة..

الخطوة الثانية:الوضعية المثالية:
طبعا من كثر الثقل و التعب اكيد بتمين منسدحة طول النهار على الشبرية او على الكرسي اتطالعين التلفزيون و تاكلين تشيبس.. بس هالوضعية ما بتساعد الياهل انه يكون في افضل وضعية للولادة.
OFP -Optimal Fetal Positioning هو انج تحاولين تخلين الياهل في افضل وضعية عشان تسهلين خروجه من من قناة الولادة بسلامة و سرعة. افضل وضعية هي LOA - Left Occipito Anterior وهي لما يكون الياهل ظهره و راسه باتجاه الخارج. و اذا كان في اي وضعية ثانية بيحتاج انه يلف قبل ما ينولد او ينولد وهو يضغط براسه على العصعص و بطريقة مؤلمة اكثر و طويلة.. و تقدرين تخلين الياهل يثبت في الوضع الصحيح بهذا التمرين البسيط:
أجلسي في كرسي مستقيمة الظهر و ريولج متباعدة . انزلي من ظهرج باتجاه الامام لين ما تحسين ان بطنج نزل شوي بين افخاذج و خلج على هالوضع مدة 20 دقيقة اذا تقدرين.

الخطوة الثالثة: وقت الشاي:
من المعروف عند الغرب ان شاي اوراق التوت Rasberry Leaf Tea هو افضل صديق للحامل في الشهور الثلاث الاخيرة لانه يقوي عضلات الرحم و يخلي الطلق احسن و يعجل من الولادة . و تشربينه بعد الاسبوع ال 32 من الحمل 3 مرات باليوم.

يالله بنكمل باجر.......