اول شي انا سجلت دوبي في المنتدى عشان كلامك قهرني اول شي انتي تقولي اكتشفتي خياناته وله تاريخ في الشي دا
وتسالي اواجه ولا لا ؟!!!!!!
انتي اخدك من بيت اهلك معززة مكرمة وبالحلال لكي تقديرك واحترامك ومكانتك كيف ترضي ب افعاله هادي وتسكتي انتي اعطي نفسك تقدير واحترام عشان هوا يحترمك كيف يخونك ويكلم غيرك ويسوي حركات المراهقين اترفًعو عنها وتسكتي ؟
كيف ترضي على نفسك الشي دا معليش او انتي بس سويتي لايك لواحد رجل او علقتي تعليق محترم هل حيقبل ؟ هل يصفقلك ويقلك برافو عليكي ولا حيكسر البيت فوق راسك ؟ ويمكن يقلك انتي ايش علاقتك بالانسان دا ويهينك
وانتي تسكتي ؟
لا تنرفزيني واجهيه ايش قلة الادب هادي وقلة التقدير اللي بيسويه واجهيه بدون ما تبكي وبدون ما تصرخي واجهيه بعقل كبير وبكل صرامة قوليلو انتا كيف ترضى على نفسك تسوي كدا وانتا رب اسرة وزوج واب كيف يكون منظرك قدام اولادك بعدين وقدام نفسك وقدامي انا اعز نفسي واحترمها ولا ارضى انك تسوي كدا تبغى تعيش مراهقتك عيشها لوحدك لا تدخلني في القذارة هادي انا ما اتزوجت عشان يسير فيا كدا يا تشتري بيتك وحياتك وزوجتك وتحافظ عليهم يا تكمل مراهقتك ووساختك بعيد عننا قوليلو انا تهمني سمعتي ازا سمعتك مستغني عنها خليكي قوية لا تنزلي دمعة
انا ليش اقلك دا الكلام وليش مقهورة عليكي
لاني اكتشفت زوجي اول سنة زواج فقط كلام بدون صور ولا اتصالات فقط كلام واتكلمت وواجهته وبكيت وحلف واتعظًم وباس راس وكل شي وقفلت الموضوع بعدها بكم شهر اكتشف انو في محادثات واتصالات وقلوب يا بنت شلت جوالو ورميتو على الجدار بكل برود قلتلو يلا استمر في مراهقتك لا توسخني معاك جا يقلي احترمي نفسك والله يا اختي اني وقفت فوجهو زي الجبل وبكل نبرة صارمة ونظرات قوية ورفعت اصباعي قدام وجهو قلتلو انا محترمة وصاينة نفسي وبيتي ومحافظة على سمعتي واقسم بالله العظيم لو ما حرًمت يا فلان ولد فلان لا اسيبك وارميلك الدنيا كلها على راسك انفد بجلدي من الحياة دي اللي في اهانه لكرامتي وربي حيعوضني باحسن يا تسيب القرف دا يا اقسم بالله ما احللًك لاخر عمري وكلام كتير
الزبدة من دا كله ( لو ما تسوي لنفسك تقدير واحترام ومكانة وتعرًفي الناس حدودهم معاكي حتى زوجك صدقيني حتندعسي في الحياة هادي ومحد حيسئل عنك ) طول ما انتي ساكتة حيشوفك ضعيفة وخايفة ويستقوي عليكي خليكي قوية بكل ادب وخليكي وانتي تواجهه واثقة في نفسك اكتر من اي شي
هل أواجهه ام اسكت 💔
متابعة النقاش، صفحة 2