شاركي في النقاش

سجلي الدخول لإضافة تعليق.

التعليقات

1,112

  2. @frh_frh_5

    صاحبة الموضوع
    بقولكم ايش اللي صار معاي،،
    اول شي انا توام ثلاثي يعني من البدايه عارفه ماراح اكمل اكثر من ٣٤ .. الحمدلله
    رحت لموعدي الثلاثاء.. وقبلها بأسبوعين كان عندي موعد وكل شي تمام والاوزان كانت من ١٤٠٠-١٥٠٠
    وبموعدي هذا توقعت توصل ١٨٠٠
    لكن مع الاسف صارت فقط من ١٥٠٠-١٦٠٠
    وسويت تخطيط وعلى كلام الدكتوره فيه طلق منتظم..
    بس ماهو هذا اللي اقنعني اولد ..اللي خلاني اولد هو
    الجنين الثالث من اسبوعين وحركته خفيفه هو كان بجهة اليسار مادري ايش السبب هل لاني انام يسار اكثر من يمين .. او المكان ضاق عليهم خلاص ماعاد يتحركون .. مااعرف صراحه..

  3. @frh_frh_5

    صاحبة الموضوع
    طبعا قلت لها بشاور زوجي وارجع لك وقال افضل نسمع كلام الدكتوره وتولدين..
    طبعا يابنات انا كنت كل ليله استخير هل اولد بمستشفى الولاده والاطفال الحكومي او لا .. ومن داخلي مرتاحه ومقرره اذا جا علامات ولاده اروح للحكومي بدون تفكير ومتفاهمه مع زوجي على هذا الموضوع ..
    وسبحان الله صار اللي صار وولدت بالحبيب ..
    المهم طلع زوجي معي للعياده وسألها عن كل شي وتطمنت وتوكلنا على الله ..وكلمت هي التخدير والعمليات وتسألني متى اخر وجبه وكذا .. وتاكدت لنا من موضوع تكاليف العنايه الحضانه وانها تتغطى بوزارة الصحه اللهم لك الحمد لان حالتي تتعبر طواري و توام .. وطبعا تكاليف العمليه القيصريه واي شي ثاني يخصني لا ..

  4. @frh_frh_5

    صاحبة الموضوع
    وراح زوجي لمكتب الدخول وخلص كل شي وطلعنا فوق للعمليات .. كل شي كان سريع وبديت احس بخوف وابي اتراجع احس بدري مره واخاف اضرهم .. المهم حطوني بغرفه صغيره كأنها غرفة ولاده طبيعيه .. وسوو تخطيط واخذوا دم مني واسأله حساسيه وادويه ومتى اكلتي وكذا ..
    فجاءه اخذوني لغرفة العمليات كانت الساعه ٢ ونص الظهر مااذكر بالضبط وانا قبل شوي كان موعدي بالعياده تعرفون مصدومه وخايفه ..
    نجي للمهم .. غرفة العمليات .. دكتور التخدير طيب مرره وقلت له بدري على الولاده واصيح قال ماعليك وكذا بعدين قال لفي على جنب عشان بيعطيني الابره والحمدلله كانت سهالات ..وشفت دكتورتي يوم لفيت وبرضوا قلت لها بدري مره على الولاده وتنزل دمعه .. هونت الموضوع عليدوسدحوني وبدوا وحطوا الستاره قدامي ودكتور التخدير عند راسي قال ناظري يمين للسرير وبتشوفينهم اذا طلعوا مرت اللحظات سريعه وطلع اول بيبي وصاح واخذوا للسرير وبسرعه للعنايه والثاني نفس الشي اما الثالث اللي كان حركته قليله جدا ببطني طول بالخروج وطول على السرير الصغير واصيح وهو يصيح واقوله ماعليه حبيبي واهديه واسكته تخيلوا وانا بمكاني ..
    المهم وخلصت الدكتوره شغلها وقالت لقيت تجمع دموي كبير تحت الجنين الثالث..
    اللي صار له كان مضغوط جداً عند الاضلاع تخيلوا .. عشان كذا له فتره حركته قليله ويدينه مكتفه عليه ،،على صدره ولونها غامق.. وقتها فعلا حمدت ربي وعرفت انها خيره ولادتي بذاك اليوم ..

  5. @frh_frh_5

    صاحبة الموضوع
    وطلعوني للافاقه وكان برد وجسمي يرتعش والممرضات مشغولات والوضع ماكان حلوو
    بعد ثلاث ساعات ماذكر بالضبط طلعت للغرفه وعلمت امي وبكتتت ياويلي اول احفاد لها 😥
    وكان الوضع مستتب ،،على المغرب العشاء بدا الجد والالم وحالتي حاله وبعد معناه كم ساعه عطوني علاج مخدر قوي الظاهر اسمه بثادين وهو اللي هداني .. طبعا المفروض اقوم بعد ثمان ساعات .. بس انا ماقمت الا من بكرا الساعه وحده وهذا غلط ..
    والحمدلله سمعت بنصايح مابعد القيصريه واهتميت بالاكل ومااشرب حليب .. واشرب ينسون وحبوب الغازات ديسفلاتيل حبتين مرتين باليوم وادويه بالوريد مضاد ومسكنات واكل بروتين بيض ولحم وسمك عشان يلتئم الجرح ومرت الامور على خير الحمدلله
    ويارب ياكريم تقر عيوني بشوفة عيالي بحضني بصحه وعافيه يارب .. ويارب تيسر على كل حامل وتحفظ لها ضناها وترزق كل من يتمنى الضنى يارب ..

تابعي تجارب أخرى من هذا القسم.