هل تقبلين بزوج لايتعدى راتبة 1500 ريال ؟؟؟؟؟...........موضوع مطروح للنقاش..بكل واقعية

متابعة النقاش، صفحة 20

شاركي في النقاش

سجلي الدخول لإضافة تعليق.

التعليقات

222
  1. @am_shoosh

    انا ولله الحمد متزوجة واهم شي الراحة النفسية للزوجين في الحياة وياما فقراء عايشين في الدنيا وبدون رواتب ........الحمدله رب العالمين
  2. @um_joud

    ديناصورة
    لا طبعا
    السلام عليكم ورحمة الله وبركاته
    والله يا حبيباتي هونيها تهون واذا واثقة من ربك انه راح يرزقك صدقيني ابدا ماراح تحسي انك عايشة دون الناس
    اسمحوا لي احكي لكم تجربتي
    طبعا سبق وقلت لكم انه زوجي كان معتمد على المكافأة وعلى مبلغ رمزي كان ياخده من محل كان يعمل لهم صيانه للشبكات واجهزة الكمبيوتر ..محل كوفي نت
    كان المبلغ شهريا 1800 ريال
    طبعا بدون ما ابالغ ويمكن هذه نقطة كثير ساعدتنا انه ايجار البيت كان على والد زوجي الله يحفظه
    والنقطة الاخرى اني كنت ساكنة في مكة وطبعا اهل مكة يعرفوا انه العيشة هناك بسيطة وماتكلف مثل الرياض وايجار البيت كان 16 الف سنويا
    طبعا فرش البيت ايضا اتكفل به والد زوجي والحمدلله كان فرش راقي وسعره مناسب وكله من ( ايكيا) وطبعا نعرف اسعارهم متواضعة واثاثهم ناعم
    وطبعا مبدأيا لما كنا انا وزوجي عزابية او بالاصح عايشين على قفا اهالينا كل واحد فينا كان معاه جوال احدث نوع
    وبعد الزواج اتفقنا اننا نلغي الجوال من حياتنا ونعيش زي زمان ( يعني الناس قبل الجوالات كانوا ميتين ولا عايشين ؟؟؟)
    وحتى بيتي ماكان فيه ثابت لاننا سكان جدد وماسبق لنا الاشتراك فما كلفنا روحنا مبدأيا بالاشتراك ولاننا عرسان جداد فضلنا عدم الازعاج
    وكان توزيع المبلغ كالاتي ..
    300 ريال اغراض البيت
    200 ريال مصروف لزوجي
    200 ريال مصروف لي
    300 ريال للطوارئ ( عزايم او هدايا لمواليد او عرسان وطبعا هذه ميزانيتنا في الهدايا ماتتعدى 300 ابدا وكنا جدا مقتنعين والحمدلله )
    بقي معانا الف ريال والله يابنات يمكن تفكروني ابالغ بس والله كنا نحتار فين نصرفها
    وبالنسبة لفاتورة الكهربا شقتي كانت صغيرة وماكنت استغل الا غرفة النوم وغرفة جلستنا والمطبخ ومع انه اجهزة مطبخي كلها كهربائية مثل البوتجاز والغلاية والقلاية يعني اخر راحة
    وكانت الفاتورة ماتتجاوز ال70 ريال والموية طبعا ببلاش الحمدلله
    وطبعا باقي المصروف كانت للترفيه جدة ماعندنا غيرها او الهدا والمطاعم كانت اما البيك او ساندوشتات خفيفة مثل كودو وكنتاكي شاورما طعمية .. ياسلام
    واذا حبينا مطاعم فاخرة تكون مرة في الشهر تغنينا نختار لنا مطعم مع اننا كل مرة ندخل مطعم فاخر نخرج متحسفين على الريال اللي حطيناه لانه اكلهم غالبا بيكون سيئ وطبعا نجلس نتغنى في البيك
    وكنت مخصصة شهريا مبلغ بسيط غير مصروفي اشتري به اي شي للبيت طبعا من ايكيا
    صراحة كان غرامي ايكيا واغلب فسحتنا فيه اشتري لوحة صغيرة او فازة او حتى كاسة عجبني شكلها اي شي المهم شهريا اجيب من عندهم حاجة
    ولما جات بنتي جود ربي رزقنا ووسع علينا وطبعا بثقتنا في الله انه كل مولود وله رزقه
    والحمدلله زوجي زاد راتبه في الكوفي شوب وصار 2000 ريال
    استقطعنا مبلغ 200ريال لوازم لجود هذا غير الالعاب وكلها من تويز ار اص او التعليم المبكر
    وكل لبسها من مذركير وطبعا مو كل شهر اشتري كل شي
    شهريا اخصص حاجة معينة اما لبس او لعبه وطبعا مذركير اغراضهم عادة ماتتعدى 150 ووقت التخفيض فرصة كبيرة لي مع انه كان حظي سيئ وما الحق دائما على التخفيض بس الحمدلله
    وبالنسبة لي .. طبعا ما كنت افكر لا في الساعة الماركة ولا الشنطة الماركة لانه الحمدلله كان دبشي ( اغارضي وانا عروسة ) كلها ماركات طبعا مو معقولة راح ارميهم واستغني عنهم وانا ما مر على زواجي سنة
    وكان لبسي فقط الماركات وكل شهر ايضا اشتري قطعة اما تنورة او بلوزة وبالنسبة للاكسسوارات دولابي كان ما ينقفل منها ومااحتجت اشتري غيرهم والله يكرمكم الجزم والشنط نفس الشي ولا افكر اشتري لانه متوفر عندي كل الماركات بالوانها وانواعها
    وايضا الماكياج والعطور كنت مكثرة منها ايام الدبش بشكل خرافي
    لدرجة اني صرت بعد الزواج وخصوصا ايام الوحم اتبرع بنصها لاخواني
    والحمدلله كانت عيشتي افضل عيشة وماحسيت بفرق ابدا ابدا
    ولما اتخرج زوجي اشتغل الحمدلله في .. طبعا في الرياض .وكان راتبه مبدأيا 5 الاف وطبعا كانت هذيك الايام على حظه المكرمة الملكية 15% وطبعا عيشة الرياض اغلى يكثير ومغرياتها كثيرررر
    والحمدلله لنا الان سنة وصار راتبه 13 الف ولله الحمد والمنة ورجعنا الجوالات باحدث انواعها وتلفون ثابت واشتراك في DSL عشان كده بتشوفوني مسنترة كل يوم عندكم :42: من الفضاوة
    ودحين اسالكم .. ايش اللي نقص مني لما استغنيت عن الجوال سنة ؟؟؟ الحمدلله انا مثل ما انا
    واعتقد مافي بنت من جد تعترف انها بنت عز ومتعودة على الماركات انها ترفض شاب في اول حياته بعد كل اللي قلته
    وهذه خلاصة تجربتي مع الثقة في الله والتوكل عليه اتمنى تستفيدوا منها
    واي سؤال انا حاضرة :26:

تابعي تجارب أخرى من هذا القسم.