الحب لازم يكون بالقلب او بالعقل؟؟؟؟

السلام عليكم يا صبايا
سؤال خطر على بالي وهالسؤال بخص الحب يعني الوحده بكره ازا خطبت ولا تزوجت تحب بقلبها وتعطي كل شي من قلبها ولا لا تحب بعقلها بس هو صحيح يمكن يكون الحب بالعقل والقلب بس احيانا العواطف بتسيطر على البنات وبتخليهم ما يشغلو الا قلوبهم متل قصص كتير بسمعها من صديقاتي منهم عم يشكي ومنهم طالب الاستشاره وما اظن انه عندي خبره كتير بالمجال بس دايما بتبع العقل والدين
واخر قصه كانت من صديقه لي اعرفها من زمان حبت شخص على الانترنت وبعدين شافته وكان غرضه شريف وعلى اساس انه يتقدملها للزواج وبعدين الاخ سافر لانه التغت اقامته لكنه ما زال يهاتفها ولا يقصر عليها بالسؤال وطبعا عشان اريحكم ما صار من الاشياء اللي في بالكم لانه ما قابلها الا مرتين وكان كتير خايف انه حد يشوفهم وخايف على سمعتها .
ولما سافر وطلعت ظروفه الخاصه القاهره هي طبعا ضلت تحبه ولسه بتحبه وهو قد ما بحبها وبخاف عليها لما يجيها عريس بقلها لا تستنيني ازا مقتنعه بالعريس انا بخاف اظلمك واوقف بنصيبك بس هي ترفض العرسان لانها بده تنتظره وبتحبه.(رومانسيه بحته)
المهم جت البنت لعندي امبارح وخاطر على بالها موال وبدها تغنيه واخيرا قررت انها ما عاد بدها تكلمه مش لانها وقفت عن حبه .(كلااااا) بس حست انه اي شي بيصير من ورا الاهل متعب ضميرها وانه من الافضل لو قالتله من الاول(تفضل لبيت اهلي) ممكن كان عمل خطوه حلوه وطلبها عشان ما يخسرها ازا كان خايف يخسرها . وكمان من جهه اخرى عشان تخليه يعمل ويشتغل ويشد نفسه ويسرع بالزواج وتخلص قصه الحب اللي تعبانه من البعد. انا بالنسبه الي شجعتها عالفكره 100% لانه هدا هو الطريق الصيحيح لانه هو هيك بيحترمها اكتر وبتكبر بعينه وبوقف الاتصالات والمسجات والمقابلات اللي ممكن تصير مستقبلا. وممكن كمان تعمله صدمه عاطفيه ويجي يخطبها ويسرع بالخطبه وتنتهي القصه على طريقتها وزي ما بتحب.
فقررنا الاتي:
1. اخباره بتوقيف الاتصال بينه وبينه ( بس بالمناسبات (ممكن) شو رايكم؟ وتقله هالكلمتين بدك ياني بيت اهلي مفتوح واهلا وسهلا..
2. عدم جرحه بانها تقله انا رح اتركك لااا رح تقله انا عم استناك وانت وحظك ازا اجا حد قبلك وعجبني بتزوجه وانت وحظك وانا لسه بحبك بس خلي ظروفك تحكم بنهاية علاقتنا .


شو رايكم بالحل؟ وهل مزيد من الاقتراحات؟

ومن جهه تانيه وبيني وبينكم يا بنات البنت خايفه ما يجيها احسن منه (مش بالمميزات) لا بالحب اللي بكنها بقلبه لها من كتر ما يحبها ما يرفضلها طلب ( مش قصدي يصرف عليها ديرو بالكم ) ما وصلت العلاقه لهالمجال ابدا . يعني بحبها حب خيالي ولدرجه انه بيحلم بيها ومش مصدق نفسه انه هي حبيبته ويمكن لو صارت لغيره يطير عقله
بها الزمن اللي بحب هالحب بكون نادر يمكن. المهم هي خايفه تخسر الحب لانه بحبها اكتر ما هي بتحبه وبنفس الوقت بدها تحكم عقلها وتشوف عرسان تانيني (ازا اجا عرسان) وتشوف مستقبلها مش انه تضيع من عمرها سنين وتعطي ياها واللله اعلم الظروف شو ممكن تعمل فيه .

هي خطوه صعبه بس انا من رايي انها اساسيه وانا لو مكانها ممكن اعمل هيك انتو شو رايكم؟
منتظرين ردودكم على احر من الجمر

8 تعليق 815 مشاهدة

شاركي في النقاش

سجلي الدخول لإضافة تعليق.

التعليقات

14
  1. @bdoyh_rhymh

    شوفى حبيبتى الحل انه مدام عرفها وعرفته ويحبون بعض

    الاحسن يوقفوون عن المكالمات الهاتفيه لسببين

    اول سبب تجنب المشاكل

    ثانى سبب مدام شاريها واخرته بيتزوجها خلاص

    بس اذا جا لها واحد زين واخلاق لا ترفضه لانه ماتظمن شنو بيصير
  2. يعني بصراحة كتير هالاسطر لفتوا انتباهي...
    قولي لصاحبتك انه مادام قلها هيك لا تستنا ولما يجيها عريس منيح توافق عليه فورا بعد ما تعمل الاستخارة وتتوكل على رب العالمين ...

    اختي لو كان عن جد بحبها كان خطبها من زمان وما استنى شي ..


    والله يكتبلها اللي فيه الخير
  3. @ardnyh

    صاحبة الموضوع
    شكرا يا صبايا على ردودكم والله انه ردودكم بتخليها تقتنع اكتر باللي بدها تعمله والله يقدم اللي في الخير
    ادعولها
    وفي انتظار المزيد من الردود

تابعي تجارب أخرى من هذا القسم.