صباح الخيرات للجميع ..
الفترة هذه انا جالسة اتأمل بالبشر من حولي واهتمامات الناس
وبنفس الوقت لي فترة انسحب ببطء من حياة الصخب وكثرة الاجتماعات و ليس عندي برامج تواصل و بدأت أُزهِّد نفسي بكثير من التراكمات والماديات..
اجمع نفسي واحفظها من الشتات ..
لكن
اللي خارج الدائرة يبصر حدود الدائرة اكثر ممن هم في داخل الدائرة !!
اذا خرجت للمجتمع الاحظ
تغير في مقاييس الناس ..
الناس صاروا كل كلامهم بالمال وكل تذمرهم بنقص المال..
وعلاقاتهم مع بعض ماليه
وصداقاتهم مالية
وهداياههم ماليه
وتقديرهم لبعض مالي
وحبهم لبعض مالي
وجمالهم مالي
يعني اذا معك مال كم تدفع عشان تنضم للمجتمع ونحترمك ونقدرك ونرفعك ..
مثلا .. اذا بيطلعون مكان يحرصون على اللي تدفع اكثر حتى لو سيئة و غثيثة ..
واسوء منها لما تحسين ان الناس تتصل عليك عشان تقطين معهم عشان يحجزون شاليه !! لانك موظفة وتلقين الطلعه فيها خلطة غريبه مافي بينهم توافق اخلاقي ولا روحي ولا ثقافي الا بالمال ..
وكذلك ..
البنات صاروا يدورون المال لو وش يكون .. لانها تعتقد ان جمالها مادي بحت ومايكتمل الا بالمال ..
عشان تكونين جميله روحي دكتور بشره سوي شد سوي مط سوي تبييض وتقشير ..
اذا تبغى الناس يحترمونها
وتكون مميزة و فخمة تشتري ساعة فخمة وشنطة فخمة .. و تحصر قيمتها بقيمة شنطتها !!
عشان ينبسطون ويستانسون لازم يدفعون مال ويحجزون اماكن ويدخلون قطيات ويدفعون مبالغ تضيع بيوم عشان يصورون سناب ويبينون سعادتهم ويشاركونها ..
لو تعزم عزيمة بسيطة صرفت مبلغ وقدره وجابت ديكورات للسفرة وجددت مواعينها عشان التصوير ..
عشان الناس تصور ويكتبون
- كثر خيرك فلانه..
- جلسه ولا اروووع عند ام فلان ..
- سفرة دايمة فلانه..
مدري احس فيه توسع غريب وتسارع مريب
محتاجين شد احزمة وتوقف شوي ونقول لحظة حنا وين نمشي وين بنوصل ؟!
ويقولون المال عصب الحياة ..
جلست اتأمل مخلوقات الله
الاخرى ..
الحيوانات مثلا
مافي حيوان معه مال .. ولا عندهم بقالات ولا راتب ولا اهل ولا اسرة ولا جمعية ..
ومع ذلك عايشين ومستمرين مع ان بلدنا صحراوي تطلعين حتى ماء وشجرة واحدة ماتشوفين .. خصوصا بمنطقتنا ..
لكن اذا تأملتي الاية
( و كأين من دابة لا تحمل رزقها الله يرزقها وإياكم وهو السميع العليم)
ان كان ربي يرزق الدواب
اجل فما بالك بالانسان اللي هو اكرم عند الله من كل المخلوقات !!
وتأملتي الحديث ( لو أنكم تتوكلون على الله حق توكله لرزقكم كما يرزق الطير تغدو خماصا وتعود بطانا)..
يعني هل الازمة عندنا هي ازمة نقص التوكل ؟!
وصار الواحد مايفكر ان الله رزاق .. وماراح ينساه ربي من رزقه ..
فبعض الناس ينشغل برزق نفسه كأنه هو بيقسم الرزق لنفسه
فيعيش بقلق وهم واكتئاب..
واشوف بعض البنات غاية امنياتها وظيفة !!
طيب الراحة مكسب وهي من النعم المغبون عليها كثير من الناس
لكن سقف مطالبنا كل ماله ارتفع ويرتفع ويرتفع ..
صار الحين ابو البنات مو بس يصرف عليهن اكل ولبس مثل قبل !!
لا صار ماتكفي الرواتب
صرف اكل ولبس وعيادات التجميل وعيادات الاسنان و فواتير الجوال واركان التصوير
صرت اذا شفت اقاربي اللي عنده بنات اقول يا رب انك تعينه ..
ليش كل شيء توقف ع المال..
فيه غلط بالمعادلة
ماكانت كذا..
كان المال مجرد وسيلة من بين العديد من الوسائل الاخرى ..
اما الان لا
صار المال بحد ذاته غاااية ..
شاركي في النقاش
سجلي الدخول لإضافة تعليق.
التعليقات
45- كلامك صحيح أولويات الناس تغيرت.. يمكن بسبب تغير نمط الحياة وصار كل شيء ينحسب بالمادة فقط.. ذكر الله في كتابه المال كزينة للحياة ولا يختلف اثنان في قيمة المال وأهميته ولكن من رأيي المال نعمة من الله و يجب تسخيرها في منفعتنا ولكن باعتدال و وسطية.. وفعلا المجتمع الآن في معظمه عبد المال ولسيد المال.. اللهم لا تجعل الدنيا أكبر همنا يا رب🤲🏻
- الفلوس شي مكمل للحياه
ويبني الحياه ويجلب الاشياء الي انتي ترغبين فيها
الانسان بطبعه يحب الجمال لان رب العالمين يحب الجمال
وهذا مب عيب اسعى لالتقاط الرزق والمال الشريف لاتميز واغير حياتي للافضل
وشي جميل ان اكون اليوم بسيط وغدا اكون مبدع بالافكار والتجاره وكيفية كسب المال الحلال
واشتري الفلل الفخمه لاعيش فيها .. ليس من معه مال يعني بعيد عن رب العالمين بالعكس هذي هداية من رب العالمين
وبالنسبة للحيوانات الي تتكلمين عليها .. هذي مسيرة رب العالمين كتبها لهم .
اذا عشنا بدون هدف وبدون ان نسعي لنجمع المال ستكون حياتنا ضنكا
وعاله على ىالمجتمع
وكل انسان مسؤل عن رعيته ربي عطاني صحه بسعى ورى كل شي يميزني
بعض الناس للاسف همهم الهدايا والتميلق والمضاهر لانهم في بيئة ينقصها الوعي
وفي بيئة تعوودوا ع انتظار المال بدون سعي له - العالم بعد وسائل التواصل انهبلت وصار كل همها المظاهر والفشخره والهياط بالهدايا والمشتريات والسفر صدق المال مهم بس بهالزمن لازم يكون الواحد دخله عالي مره عشان يواكب هالموجه والي مامعه شي الله يعينه اصلن منهو يبيه او حتى يعبره تدرين السنه هذي مزنوقين مره بسبب ديون زوجي والله لاحضرت زواج ولاقدرت اهدي او اوجب احد اشوف تصويرهم للهدايا الي تجيهم بالعرض ياربي متى كنا كذا اف ياربي والله اقرب شخص لي نزل هذايا خواتي وانا مالي اسم بينهم احس انحرجت مره مره قلت اجلس ببيتي ابرك لي والي بيشره كيفه ربي هو العالم بحوالي
- المال وسيلة
اقدر احقق اهداف كثيرة بحياتي مالها دخل بالمال !!
التجارة وكسب المال جزء من السعي في الحياة ..
حديث الرسول صلى الله عليه وسلم المتفق عليه ( اللهم اجعل رزق ال محمد قوتا)
قوت يومهم يعني بس اللي يكفيهم
والحديث ( بارك الله بمن كان رزقه كفافا لا له ولا عليه)..
يعني الاعتدال مطلوب
حنا محتاجين نبين لانفسنا ولعيالنا ان المال مو كل شيء بالحياة ..
ولا تجعل كل اهدافك ماديه وماتقدر تحققها الا بالمادة ..
النبي صلى الله عليه وسلم حقق كل اهدافه ومع ذلك ماعنده مال ( اللهم احيني مسكينا وامتني مسكينا واحشرني في زمرة المساكين))
انا لا اخارب المال لكن هي دعوة للتأمل في الطرف الاخر..
والتفكر..
الحياة المادية طغت علينا لدرجة صار الناس يعيشون قلق واكتئاب بسبب سعيهم وراء المال لانهم حصروا اهدافهم كلها في المال ومايقدرون يحققون اي هدف الا بالمال.. لازم الواحد يوسع مداركه واهدافه بعيدا عن المال .. حتى لو كان له سعي مادي مايحصر اهدافه عليها.. كيان انثى34 العالم بعد وسائل التواصل انهبلت وصار كل همها المظاهر والفشخره والهياط بالهدايا والمشتريات والسفر صدق المال مهم بس بهالزمن لازم يكون الواحد دخله عالي مره عشان يواكب هالموجه والي مامعه شي الله يعينه اصلن منهو يبيه او حتى يعبره تدرين السنه هذ…
فعلا صادقة
انا اشوف كذا
من غير مصروفك ومصروف البيت والعيال
صار مصروف الهدايا والاعتبارات الاجتماعية
الموضوع محتاج وقفة عقلاء
اللي قاعد يصير ارهق جيوب الناس..
وفيه ناس لو تلاحظين من مجتمعكم انقطعوا ماعاد يطلعون لانهم مو قادرين يواكبون الناس بهذه الصرف والهدايا !!
انا احس اللي تصور هداياها هذه تشحذ من جيوب الناس !!
لانها تحرجهم بالتصوير ومايقدرون يقدمون اي هديه لازم هديه تتصور وتكون فخمة مايتفشلون !!
ارهاق مادي هذا .
مواضيع مشابهة
تابعي تجارب أخرى من هذا القسم.