مشكلتهم يفسرون النقص بالحديث بالاستنقاص من قدرها وعقلها وفكرها وكيانها
اذا المراة بنظركم متخلفة عقليا ومو متساوية مع الرجل
ليش اجل لها نفس عقاب الرجل ؟
ليش ربي مايحاسب الطفل مثل البالغ ويحاسب المراة مثل الرجل؟
ليه مانقول هذه امراة عقلها ناقص ضعيفة سرقت خلاص نعفوا عنها ؟؟
ليه مانقول هذه امراة زنت نعفو عنها لانه النساء عقلهم ناقص ودينهم ناقص و عاطفتهم زايدة وضعييييفات لازم مايتحاسبوا مثل الرجل او يكون عقابهم اخف من الرجل وانها زنت لانها محتاجة وجود رجل معها ياحراام ؟!
لانه طبيعي النقص المذكور مو مقصود بالشكل الي الكثيرين يحاولوا يقنعوا المرأة فيه !! افهموا هالشيء !
كثير نساء تعيش جو " ايه الدين يقول انا ناقصة يعني ماقدر ادبر امري لازم احد يسوقني ماقدر اتخذ قراري ماقدر اتعامل ماقدر افكر "
وهذا هو عين الغباء ، التفاسير شارحة معنى النقص بالحديث لكن الاصرار على تغيير المعنى مافهمه !
كونك امراة تقدري تكوني قوية بنفسك وتدبري امرك وتعرفي تتعامل بكل شيء بالحياة مايعني انك تلغي دور الرجل ، الطبيعة البشرية اصلا ربي خلقها كل جنس يكمل الثاني ، كلن له واجباته طبيعته ، مايعني نقص في اي طرف
لا الرجل يقدر يستغني عن المرأة ولا المرأة تقدر تستغني عن الرجل ، لانه محد منهم سفيه او ماله عقل ويحتاج احد يسيره ، هم مكملين لبعض هذه حكمة الحياة ،
قوامة الرجل على المراة مو نقص فيها بل تكريم لها ، افهموا هالشيء ،
شوفوا هالسيناريو :
اذا المراة هي بتطيع زوجها وتنفذ وهي بتحمل وتولد وترضع وثلاث سنين بعنقها رضيع هي مسؤولة ٩٩% عنه وفوق هذا هي لازم تروح تشتغل عشان تقدر توفر لقمة عيش لاولادها لانه الرجل مو مكلف يصرف عليها ، هل تشوفون هذا شيء ينصفها ؟ لا طبعا ، حكمة ربي ضمن حقها بالعدل مو نقص فيها ،
هي قادرة تسوي هالشيء وياما حريم يسووه ، لكن هذا استغلال وظلم وتعدي ربي مايرضى فيه
ماله علاقة بانها ضعيفة على قولتهم ولا عقلها ناقص بالمفهوم الي ينشروه ، المرأة تدبر وتسعى خديجة رضي الله عنها كانت تاجرة قايمة بنفسها ولها صيت وتتعامل وو وهي تعاملت مع النبي قبل لا يتزوجها ، ماقالت اخويا يتعامل ابويا يتعامل عمي يتعامل ما اعرف انا !!
كثير سير بنساء المسلمين كلها سير تبين انه النساء كانوا قايمين بانفسهم حتى بهذيك الازمنة !
زمن جداتنا اغلبهم كانوا يدبرون انفسهم انا جدتي كانت يد بيد مع جدي الله يرحمهم بالمزرعة بين زرع وحصد وبيع وكانت هي حتى اشطر منه بالتجارة ، كم واحدة جدتها كانت ترعى لحالها وتشيل سلاح ؟ ماقالوا مثلكم احنا ناقصات ضعيفات مانقدر !
اذا توفر رجل كفو فهو سند ورحمة والمراة الطيبة مذلك سند ورحمة وهذا الكون ومعادلته ،
تفسيري الوحيد للي تعرف كل هذا ومصرة انها ناقصة لازم احد يوديها ويجيبها مثلا او يروح يسوي معاملاتها او او ، انها كسولة اتكالية سلبية متهربة من مسؤوليات بديهية عليها كبشر بغض النظر عن الجنس ! ماتبغى تفقد هالدلع والرفاهية حتى لو يوصل فيها تنقص من قدرها وعقلها وامكانياتها عشان تحصله
فتبي زي معاملة البزر لها لازم احد يوديه يجيبه ياكله يشربه يشتريله يسويله يعلمه الخ
هل انتي ناقصة؟!!
متابعة النقاش، صفحة 3