مساء الخير او صباح الخير بتوقيت كل واحده فيكم ياحلوات 🧚🏽♂️🧚🏽♂️
طبعا كسبت القضيه ولله الحمد وصاروا عيالي عندي رسمي الحين صار كل تفكيري تربيتهم وتأمين حياه ماديه جيده لهم والمواصلات والسكن المستقل طبعا انا كنت ساكنه عند اهلي ووالله ماقصروا معي لكن مهما كان ماراح يرتاحون او انا ارتاح لازم يكون فيه خصوصيه للطرفين مالكم بالطويله كنت انزعج اذا جو خواتي زياره المكان يالله يكفيني انا وعيالي وهم اذا جو ينامون ويصير ازعاج ويزيد الشغل والكرف مرات اكون اداوم او اختبارات صعب تتحكمين في بيت الناس مهما كان هذا بيتهم بعد ومالي حق احد من حرية احد 😔مرت الايام والسنوات وواجهت مصاعب في تربية ابني كان في سن مراهقه ولازم اراقبه واحتويه ابوهم قاطعهم ولا يسأل عنهم تبرأ منهم عشان عاشو معي رفض انهم يزورونه او يتواصل معهم نهائي يا يرجعون يعيشون معه او يتبرأ منهم وهذا اللي صار تعبت يابنات مع عيالي البنات سن مراهقه والاولاد كنت ماانام بس افكر وابكي ماقدر انام من التفكير حتى وان نمت احلم احلام مزعجه او وانا نايمه عقلي شغال تفكير كيف مادري كنت بس ادعوا الله واقرإ البقره مرات تهدأ نفسي ومرات اتعب مرت الايام وانا الاحق في ولدي وادعي له بالهدايه والصلاح كانت اخر سنه له في الثانوي بس يسهر يابنات ولا يجي الا الفجر كان يمشي مع واحد هو اللي خربه ياما هددت وتوعدت ودعيت وفي نفس الوقت اكلمه باسلوب ولا في فايده مايسمع كلامي بهذا العمر للاسف ينجذبون لاصدقائهم يبحثون عن وناستهم معهم في. يوم من الايام تاخر ولدي مارجع البيت ادق مايرد اكلم اخوياه مايردون وعندي وعندي جامعه وعندي اختبارات ولازم اصحى الصباح بدري اصحي اخوانه واوصلهم صارت الساعه 3الفجر وانا بس ابكي وادعي يارب مايكون صار له شي او مات يارب لاتفجعني ااااااه يابنات ويجيني ذاك الاتصال من الشرطه ولدك موقف بتهمة السرقه اااااه ياقلبي كانه الحين وقع الخبر على سمعي انفجعت مادري وش اسوي كيف اتصرف اشكي لمين اعلم مين مادري مابغى فضايح كنت افكر في سمعتنا وسمعة بناتي لاخر لحظه فتح ابوي باب غرفته يصلي الفجر قال لي هاولدك جاء قلت ايه كلمني نايم عند خويه ماعلمته ابوي راعي سكر بس بجيب له القلق مانمت جلست مواصله داومت دوامي ورحت ابغى اخذ استإذان عشان اروح اشوف ولدي بالشرطه قلبي كان بيوقف من الهم والحزن ماقدرت اتكلم بكيت بكيت وقلت بستأذن رحمت حالي مديرتي وقالت روحي ولا يهمك ااااه ياقلبي رحت الشرطه ودخلت والله يابنات اني كاني في حلم كيف وانا بنت قبايل ومحترمه ادخل الشرطه حاولت اطلعه ماقدرت التهمه لابسته كان باقي على اختباره شهرين ويتخرج ولدي كان شاطر بس حسبي الله في خويه غرر فيه شهر وانا رايحه جايه للسجن احاول اتفاهم مع الشرطه بلا جدوى انتقل الموضوع للنيابة العامه حاولت اكلم ناس كبار مافي فايده ربي اراد انه ينسجن دخل السجن واااه ياقلبي حسيت عقلي بيوقف بينشل من التفكير كنت اقرا سورة يوسف وادعي ربي بالفرج لكن سبحان الله عسى ان تكرهوا شيئا وهو خير لكم كان درس قوي لولدي جلس بالسجن كم اسبوع لكن ضاقت الارض فيه حس بغلطه وصحصح وعرف انه غلطان كلمت الشيخ اللي بيحكم في قضيته وقلت له ياشيخ مابقى الا اسبوعين ويختبر تكفى طلعه قال لي ولا يهمك ابشري بالخير وانا بس بأدبه وبطلعه والحمدالله طلع واختبر وتخرج ولكن المنحوس منحوس فاته الاختبار التحصيلي لانه ضيع هويته ومافي وقت يطلع بديل يووووه ياوجع قلبي كنت متأمله يدخل الجامعه لكن شاء الله انه يجلس في البيت هذيك السنه
بس كان درس قوي ماينساه المهم انا تخرجت انا وبنتي في سنه واحده وجبت معدل قوي جدا وصار عندي شهادة بكالوريوس اداره اعمال وموظفه في مكان ولله الحمد جيد واستقليت في سكن لوحدي الحمدالله صحيح في ايام كثير مره وصعبه بس الحمدالله انا انجزت اللي غيري ماقدر ينجزه ولم امد يدي لاحد الا لله والحمدالله 🧚🏻🧚🏻🧚🏻🧚🏻طبعا بنات انا قلت قصتي عشان تعرفون ان الحياه صعبه ومش كل الناس مرتاحه وان البيوت اسرار مليئه بالمفاجآت ادعولي ازوج بناتي وولدي يتوظف ويدخل الجامعه وبس حبيباتي انتظروني في مواضيع اخرى احبكم مرررره💕💕💕💕
صباحكم نشاط الاربعينيات يدخلون
متابعة النقاش، صفحة 6