أطالب وبكل قوة – نعم وبكل قوة - أن يغلق هذا المنتدى ...!!!!

احترم وجهت نظرك يااخي الكريم ................

بس انا معارضه او غير مقتنعه بما كتبت ...يعني الوحده اذا استقبلت الردود المختلفه تاخذمايناسبها وترمي بالباقي بعرض الحائط ...............مولازم اصدق اي شي اواقتنع فيه ...بمعنى اصح كل عقله براسه ويعرف خلاصه .....
ودمتم.....

***************

وليش كل هالتعصيب والانفعال؟؟

اول شي بقول كلمة حق ..... نصف كلامك صحيح .... لكني اعارضك في بعض النقاط

وابدأ في النقاط اللي أأيدك فيها..

فعلا... حنا نجاوب من خلال تجاربنا الشخصية ... او من منطلق حالتنا النفسية .... او من نظرتنا الخاصة للرجال او للعلاقات او غيره
وهذا غلط وبيأثر سلبا على الموضوع ... وعلى العضوة اللي كتبت المشكلة ... وممكن يزيد الطين بله لو هي اخذت بأحد النصائح ((قد يكون سبب فشل النصيحة هو اختلاف الاشخاص او اختلاف الظروف او خطأ العضوة في التعبير عن مشكلتها مما ادى ان البقية يفهمون غلط )) يعني مو بالضرورة تكون النصيحة خاطئة ......فيه نصائح تنفع مع ناس وناس لاء وتنفع في ظروف وظروف لاء

وفعلا انا أأيدك انه المفروض يكون فيه مختصين في المشكلات الاجتماعية والنفسية وحلها .. وحتى ودنا بمختص في علم الشريعة ((ليجيب عن بعض الاستفسارات اللي تتطلب تدخل الشرع مثل ..الامراض الروحية وغيرها))

مع ان حتى المختصين ... ممكن يقع في نفس الخطأ اللي وقعنا به في هذا القسم ((الاجابه حسب الحالة النفسية وحسب الرأي الشخصي والخلفية الثقافية والتعليمية))

وهذا طبيعي ....... كل انسان وله خلفية من التجارب والقراءات والثقافه والاراء والمبادئ
وطبيعي بينصح او بيوجه حسب هالخلفية

وحنا مانقدر نتحكم في ثقافة كل واحد بيرد في هالمنتدى او حتى نغيرها !!!


وكل رأي ((كـــــــــــــــــل رأي)) حتى بعض الفتاوى والخطاب الوعظي والديني

هو اجتهاااااااااااااد ......يحتمل الصحة والخطأ ...

وحتى لو _فرضا_ تقفل هالقسم .... لا تعتقد ان هذا حل للمشكلة .... ولا حتى بتقل

الا

بتزدحم الاقسام الثانيه ((الاسرية _الملتقى_العام_الديني)) بهالمشكلات وبتكرر نفس الردود وطريقة المعالجه

********** حرييييييييم!! <<< مسوية طالعة منها

وهذا مو بس في منتدى حواء ...... او في النت فقط .... هذا في كل مكان
ياما نشوف ونسمع ونتعجب من طريقة تفكير الغير وحلهم للمشاكل!!

بس مانقدر نغير عقلياتهم .... مثل ما حنا بعد صعب احد يغير لنا عقليتنا وطريقة تفكيرنا


انت تقول ((ويعلم الله أنني رأيت تغيراً في نفسيتي ونفسية زوجتي – إلى الأسوء - ... بسبب أننا حين ندخل هذا المنتدى ... لا نرى إلا مشاكل ... ...!!!))

لاتدخلونهيمنع تبادل الوجوه التعبيرية بين الجنسين
المشرفه بكل بساطة
لا ضرر ولا ضرار

دامه يأثر سلبا على نفسياتكم لاتدخلونه ... النت بحر واسع ... خذ ما يعجبك ودع مالا يعجبك
ادخل منتديات مفيده ... تصفح مواقع الاساتذه اللي يلقون دورات تطوير الشخصية وتعزيز العلاقة بين الزوجين ... شارك في مواضيع التفاؤل والامل .... اكتب مشاركات عن الحياة الزوجية المستقرة


ابعد عن المشاكل ووجع الراس

اما انك ياخوي تدخل قسم (مشاكل اجتماعيه) وتقول صار يضيق صدري ويؤثر سلبا علي ؟؟!!
وتطالب انه يتغير لأسم تفاؤل و ... الخ

لا ياخوي.... لو انك اقترحت مثلا على الادارة انهم يفتحون قسم للتفاؤل
ويكون تحت اشرافك ((اذا شايف في نفسك الكفاءة))
ويكون كله مواضيع عن التفاؤل والامل ... وتوجهيات للمهمومين ... وتجارب يومية .... و مشاكل بحلولها ((جاهزه)) مثل اللي ينقلونه بعض الاعضاء في بعض المواضيع يكون سؤال وجواب من مختص
الخ الخ الخ

اوكي هذا ممكن بل ممتاز


وبما انك تقول ..((المواقف الإيجابية التي تكون بين الأزواج وزوجاتهم في هذا المنتدى مع أنها تحدث بشكل يومي في كل بيت ، ولكنها غُيّبت تحت هذا المسمى ....))

وش وظيفه قسم الحياة الاسرية؟؟
فليش ماتطرحونها فيه ؟؟

واللي بيدخل المنتدى عنده الاقسام قدامه
وكل واحد بيدخل القسم اللي يبي ..... وبيتحمل عواقب ماسيقرأه ... لانه هو اللي اختار ومحد اجبره


وبالنسبة لقولك((بل وحتى في الآونة الأخيرة – إن كنتم لاحظتم – أن البعيدات عن الشأن بدأن يتخيلن تلك المشاكل ويبحثن عن حل لهااااااا ... .))

*******************

اولا هم مانزلوا مواضيعهم على اساس انها مشكلة ويدورون لها حل...
هي مجرد فكرة خطرت في البال ومن باب الفضفضه وتبادل الاراء طرحت الموضوع ..... ويااااماااا تخطر في بالنا افكار مثلها ويمكن اغرب منها
وهذا مو بسبب كثرة قراءة المشكلات او وجودها حولنا
بس ... افكار تجي مع التأمل والفضاوة واحيانا مواقف نشوفها ....وتجي للسعداء قبل الاشقياء

يعني مااشوف ان القسم ومواضيعه له دخل!! ولو انه اكيد له تأثير على البعض

وبعدين لو بنوجه عتب او نقد .... فهو مو للي قدمت نصيحة حسب رايها .. لالا

بنوجه النقد للي عرضت مشكلتها لأشخاص غير مختصين ... ((وهي اكثر وحده عارفه هالشي))

وصدقني نصف او اغلب المشاكل اللي تنزل هنا ....هي من باب فضفضه لاغير

واكاد اجزم ان ولا حتى 70% تأخذ بالنصيحة او تطبقها فعليا !!

وآخر نقطة بعلق عليها

((وأرجوا أن تترك كل عضوة في المنتدى الرد على المشاكل المطروحة في هذا المنتدى للأكاديميات وللمؤهلات أو صاحبات الخبرة – بعد تحديدهن من إدارة المنتدى - ...!!!))

وش درا ادارة المنتدى منهي الكفؤ ومنهي الغير كفؤ؟؟؟؟؟؟؟

بناء على ايش؟؟ تعليمها؟؟ والا ردودها ؟؟

والله فيه عضوات اشوف لها رد واذكر الله ....من كثر ماتبهرني بعقلها وحكمتها

واقرا لها رد ثاني .... وتطير عيوني من طريقه تفكيرها !!

وبصراحة لا الاشراف ولا الادارة يعتبر مؤهِل لتقدير عقلية وكفاءة العضوة هذي او هذيك


وبالنسبة لموضوع اننا صورنا الرجال وحوش كاسرة************
فلو تصفحت منتدى خاص بمشاكل الرجال مثلا او جلسنا في ديوانيه رجال شف السب والنقد للمرأة
يعني شي متعارف عليه من زمن بعيييييد ....مجتمع الرجال ينتقد الحريم ويتذمر منها لدرجة أثروا على العزاب وخوفوهم
ومجتمع الحريم ينتقد الرجال ويتذمرون منهم لدرجة أثروا على الانسات وخوفوهم


الحل من وجهة نظري

هو الحوار والمناقشة والاقناع

يعني اذا شفت رد لك عليه تعليق .... فرد وناقش وعلق....

لا تتركه ..... ولا تترك من عرضت المشكلة تتخبط ..... حاول تثبت وجهة نظرك بالاقناع

والكلام اللي يطلع من القلب يوصل للقلب ..... واللي يطلع فقط من اللسان فلا يصل الا الى الاذان

وكل انسان له عقل يوازن فيه الامور ويختار افضل الطرق

فالانسان السفيه او قليل الحكمة لو اعطيناه افضل الحلول واروعها .... مااخذها وبيمشي ورا هواه


احس اني قمت اخربط




اسسسسسسسفه جدا جدا على اي كلمة او نقد ممكن يسيء لك او يؤذيك او يسيء لأي احد بالمنتدى

ساااامحوووووني تراه مجرد رأي يحتمل الصحة والخطأ

المهم لاتقفلون هالقسم لاني احبه ******

انا ضد اي يغلق هالقسم !!!

ترى مو دايم مايحل المشاكل الا المتخصصين لا من قال !!!!!!!!!!
بعض المتخصصين مالهم الاالكتب والعلم النظري بس!

انا مااشكك بقدرتهم على احتواء المشاكل بس فيه زوجات لهم 20 و30 سنه متزوجات ممكن
يفيدون امثالي الي ماعندهم خبره ابد00

ممكن التجربه تفيد ووممكن الحكمه ومرور هالزوجه من نفس المشكله تقريباً يفيد صاحبة
المشكله !!
يعني فيه عوامل ممكن تفيد بحل المشكله غير التخصص في عامل الحكمه,والخبره,والتجربه00

يااخي الكريم حنا لو نبي مايفيدنا الا المتخصص كان رحنا عيادات نفسيه ومراكز للاستشارات الاسريه
علشان يحلون لنا مشاكلنا ماكان طرحناها بالمنتدى انا في بعض الاحيان اثق برأي مجربه اكثر من رأي مختص
ماجرب بس تعلم ودرس الحاله نظرياً ومامر بهالحاله بنفسه00

الدنيا فيها الزين وفيها الشين 00
صحيح فيه اراء لاتمت للعقل والمنطق بشيءبس الفطينه الي تطرح مشكلتها وتعرف وش تأخذ وش تترك
من الردود وتستفيد من الكل وتطلع لها بفكره استفادتها بشكل عام00

بالعكس بعض المشاكل تحسس الوحده انها بنعيم ولله الحمد وماعندها مشاكل على الاقل بهالضخامه00
لازم نتطلع على واقعنا ونؤمن بما كتبه الله لنا مو يصير عندنا فوبيا من الزواج وبس!!!!

لا الانسانه لابد تسمع من هنا وهنا وتمر عليها مشاكل الناس وتكون لها افكار كثيره تفيدها
مو كل النظره سوداويه لا00 بس لازم البنات يطلعون على بعض المشاكل علشان ماينصدمون في
حالة انهم لاسمح الله صادفوا مشاكل 00

اكيد الحياة حلوه والا ماكان شفنا هذي تتدور منتج لبشرتها لانها تحب زوجها وودها يشوفها حلوه!
وماكان شفنا هذي تبي تتعلم وصفه علشان تسويها لزوجها ويفرح لو ماتحبه مادورت رضاه!
وماكان هذي تهتم بملابسها علشان تتميز بنظر زوجها ولو مابينهم حب وموده مااهتمت!

البنات وصلوا لمرحله من الوعي صاروا يميزون بين الواقع والاحلام والمبالغات00
يعني الفطينه بتشوف هذي كتبت مشكلتها اليوم وبعد اسبوع صارت تدور منتج لبشرتها!
الدنيا يوم حلو ويوم مر بالعكس اؤيد طرح المشاكل انا عن نفسي قاعده اتعلم من هالمشاكل
بشكل خاص وهذا الافضل من ان نغرق بحلم وردي لاتحمد عواقبه 00

الدنيا يوم لك ويوم عليك والذكيه هي من تعي تماماً ماذا تقرأ لاننا بجتمع كبير مو بس محصورين
بالمنتدى00
ً
وبكل امانه اؤيدك بنقطه ذكرتها تتلخص في كون الانسانه الي ترد على المشكله متأثره بشيء خارج الموضوع تماماً وترد على حسب هالشعور وتطبق صاحبة المشكله هالرأي هنا الكارثه!!

واخيراً
والي تحس انها تتأثر لاتفتح هالقسم ابد علشان ترتاح نفسياً00

وشاكره لك طرح وجهة نظرك التي ربما يؤيدها الكثير غيري طبعاً 00
واتمنى تقبل وجهة نظري بصدر رحب00

للجميه اصدق دعواتي 00

اولا جزاك الله خيرا ثانيا انا معك ان يوضع متخصيصين فقط للرد