🤱🏻🎊تباشير الخير الـ٢٠ لمواليد سبتمبر واكتوبر لعام ٢٠٢٠🎊🤱🏻

الي بارك لي ونسبت اسمه يعذرني
الله يسعدكم جميع

الله يسعد قلبك ويريح بالك ❤️يارب

ماشاء الله خروج السلامه يارب
عقبالي والله انتظر الايام تعدي واخلص الاربعين
بس الحمدلله كل ماشفت بطني اقول الحمدلله على الخلاص واتذكر التاسع ياطوله وياثقله والحرقان اللي لعب فيني الله يكتب اجرنا ويجعلها تخفيف ذنوب
باقي الخياطه 😤😤اللي شكلهم موصلينها فوق وتحت ماني قادره لا اشوفها ولا اتحسسها 😐

صباح السعاده ع الكل 💗
مبروك الف مبروك لكل اللي ولدوا الحمدلله ع سلامتكم
اسفه بنات ماطليت عليكم كنت خارج التغطيه كل هذي الايام ماقدرت ابداً القى وقت 🦦💔
بالنسبه لولادتي كان معي طلق قبل ولادتي ب٣ ايام كل يوم اروح الطواريء يسوون تخطيط يقولون طلق بارد وتكشف الدكتوره تقول الرحم مسكر
٣ ايام مانمت الا غفوات عشر دقايق او ربع ساعه كنت مهدوده
اليوم الاخير طاقتي صفر الم غير محتمل ما اكل ما انام وابكي ومرات افصل اضحك مع دموع والله خفت افقد عقلي الم الطلق يابنات شي لايحتمل الله يعظم اجر امهاتنا يارب 🥺♥️
رحت الطواري قبل ولادتي بليله وبرضو التخطيط والطلق بارد واصر علي الدكتور يكشف وما احكي لكم عن حجم اليد 🦦💔
كشف قال مسكر خلاص تعالي موعد الصباح تقرر لك الدكتوره اذا نقدم العمليه ونشوف قسم التخدير
ورجعت البيت ع ٤ الفجر ولا قدرت انام لين جت ١٢ الظهر موعدي مع دكتورتي وكشفت سونار قالت كل شي تمام
والممرضه سعوديه حست اني تعبانه وقاعده اطلق لان كل ٧-٥ دقايق وانا جالسه عند الدكتوره قاعده امسك شنطتي بقوووه واتألم و تتكلم مع الدكتوره بالانجليزي قالت لها ترا المريضه مو طبيعيه اشك ان معاها طلق ولاردت عليها الدكتوره كانت مصريه
ع الساعه ٣ العصر خلصت اوراقي و تعاطفت معي الممرضه وطلبت لي كرسي متحرك وصارت تمشي فيني لقسم التنويم عشان بكره عمليتي وطول ماهي تضبط اوراق التحليل وتسجيل التنويم انا اتألم و لمن طلعنا قسم التنويم تكلمت مع الدكتوره المناوبه كانت سودانيه وتقوم الدكتوره قالت يلا ع غرفتك الان بسوي لك تخطيط و طلع طلق بس خفيف وقالت الدكتوره ضروري اكشف قلت يادكتوره انا عمليه اخاف تكشفين علي وتسوين تحريض ومعي كسر في الظهر ما اتحمل قالت ضروري اكشف عشان وضعك ما يطمن الان اكشف واقرر لك وش يصير
ولمن كشفت صار فاتح ٣ وقالت ضروري الان عمليه معك ٤٠ دقيقه فقط كلمي زوجك و بدلي وبيجهزونك الممرضات للعمليه
يمه قلبي مدري ليه خفت وصرت ارجف يابنات والله بدون توقف مع كل ٣-٤ دقايق اطلق وبلمح العين وانا بوسط غرفة العمليات انهرت قمت ابكي ابكي واقول مابي ابرة الظهر ابي كامل ما اقدر اتحمل اكثر خايفه بموت صاروا يدورون لي عروق مالقوا والله يابنات ٩ اماكن عشان يلقون عرق مالقوا حتى بالجهاز اللي يكشف العروق نشفت مدري من قل النوم او من قل الاكل او من الخوف
والقصدره آه يالقصدره 💔
ركبوها لي قبل البنج مت وهي تحفر اخر شي صرخت انا نفسي تسكرت اذوني من الصرخه 😣
اشوا تعاطف معي دكتور التخدير قال ببنجها اول البنت ماقادره تتحمل كان اردني الله يجزاه الجنه واعطاني ابره وقفت الرجفه فجأه وخدرني نصفي بعدها عطوني منوم ماحسيت بشي
لاطلق ولا شي خلاص الله يا الراحه اللي جتني بعد مادفت رجولي بعد ابرة الظهر قمت اسولف عليهم وانكت عاد ما اذكر وش كنت اقول بس اسمعهم يضحكوون اذا تكلمت الله يستر وش كنت اقول عسى بس ماكبيت العفش لان بعد العمليه مروا علي الغرفه كانوا عارفيني بالاسم وكلهم يدخلون مبتسمين ويمزحون معي واضح اني مهببه الله يستر عندي مراجعه بعد كم يوم متفشله اروح 🦦💔
المهم وانا بالعمليه بعد التخدير نمت وصحيت على دفى خد بنتي بوجهي وشميت ريحتها لا شعوري قمت ابكي واشاهق ورجعوا ينوموني الظاهر قالوا خل ننومها لاتفصل علينا هذي 😂
يالله يابنات كل اللي مريت فيه من تعب وارهاق سواء قبل العمليه او بعده والله مستعده اعانيه بس اشم ريحتها واحظنها
يالله كيف الضنى غالي ومستعده الام لكل الم مهما كان عشان قطعه من روحها مع كل طلقه كنت اطلقها كنت ادعي لامي بالفردوس الاعلى من غير حساب ولا عقاب
كيف كانت تجيب ٧ بطون وكل بطن تحبه وتغليه مع هذا التعب كله الله يعظم اجرهن ويطول باعمارهن ويرحم ميتهن يارب ❤️🥺

صباح النور
ضحكتيني بااخر شي 😂😂
هلوستي اذا رحتي لهم قولي استرو ماواجهتم 🌚