🤱🏻♥️تباشير الخير يارب الـ٢٤ لمواليد سبتمبر واكتوبر لعام ٢٠٢٠♥️🤱🏻

قمر الحنين ولحن الله يعوضكم في القريب العاجل عوضاً يليق بجلاله وعظيم سلطانه ويجبر كسركم ويفرح قلوبكم انه القادر سبحانه ❤️

السلام عليكم ورحمه الله وبركاته؛ كيفكم يا بنات؟
والله حياتي بعد الولادة انواع الحفلة 😂 حاولت ارتب حياتي وارجع لكم بالاكشن حقي ومن قله النوم ماحسيت ان مر تقريبا اسبوع 🏃🏻‍♀️

وعلى بركة الله نبدا الاكشن بس مانبي الي بكر ولسه ما ولدت تخاف 😬..

طبعا انا بكر هذي اول بنوته الله يحفظها لنا يارب؛ ولاني بكر عاد تعرفون انا ماعندي خبرة والمستشفى مستحيل يثق بكلامي لان "بكر وش دراها؟"..
يوم الثلاثاء ٢٢ سبتمبر كان عندي اخر مراجعة في العيادات والي هي تقفيله اسبوع ٤٠ ويحددون لو كنت باخذ مهله اسبوع ٤١ او تنويم..
المهم يوم رحت انا خلاص واصله معي اخر التاسع وثقل واحس اني حامل بحلقي مو ببطني من قوة التعب، وكنت اقول يارب ينوموني ويولدوني وافتك خلاص الترقب والانتظار والقلق مابيها كل ما جيت اطلع من بيتي شلت شناطي قبلي السيارة احتياط 😂 وخلاص جاني اكتئاب من كثر ما اتأملها..
المهم ورحت المستشفى ودخلت عالدكتوره واخذنا وعطينا وبعدها قالت جاك نزيف او افرازات؟ قلت لا.. قالت نزلت مويات شي؟ قلت لا..
قامت قالت نسوي سونار نتاكد بعدها نشوف، سوت سونار وقالت كل شي طبيعي والمويات لسه زي ما هي والراس مرفوع شوي مو نازل..
قلت يعني؟ قالت يعني بنمدد لك اسبوع وزي هاليوم الاسبوع الجاي لو ما ولدتي ولا جاك طلق ولا نزيف تجين تنويم خلاص..
ضاق صدري مره، وقلت للدكتورة غريبه مافيه بوادر ولادة >مستعجله 😂
قالت يابنتي يوم في بطنك احسن من ٢٠ يوم برا بطنك ليه مستعجله؟ قلت لها تعبت من الثقل..
قامت قالت طيب حابه افحصك من تحت؟ انا فرحت قلت بتسويلي تحريض واولد 🏃🏻‍♀️ ووافقت وقلت يلا
وفحصت وقالت الرحم مررررررررره مقفل ومشدووووووود ومرتفع ومستحيل يكون فيه ولادة، قلت اوكي وطلعت للبيت وفالطريق اقول لزوجي شكلي بعوشر 😔
المهم وينزلني زوجي البيت واقوم اخلص شغلات وكذا وعلى العصر جاني خمول وقلت بنام للمغرب كذا اريح..
ونمت وقمت المغرب وانا اصلي الا احس بشي ينزل مني شعورة زي الدوره كذا! وبسرعه اخلص الصلاة واروح الحمام والاقي تكرمون زي السائل اللزج الشفاف واقول بس ولااااااادة
وادق ع زوجي على طول وطيران عالمستشفى وادخل الطوارئ وتجي دكتوره سودانية تفحصني قالت يا اختي الرحم مقفل تماما ومرفوع ومشدود ومستحيل تولدين قبل ٥ ايام كحد ادنى ويمكن اكثر بس الحين مافيي..
قلت وش هالسائل اجل؟ قالت افرازات عادي مع ضغط البيبي عالرحم..
وارجع البيت ع الساعه ٨ العشا وانا ميته تعب احس فيني نوم وخموول..
فنمت، واقوم من النوم على نغزه اسفل بطني كانها دبوس قوية مره وفجأة .. مسكت الجوال الا الساعه ١٠:٣٠، قلت لنفسي من النومه الغلط النونو تضايقت ورفستني، فنمت عالجنب الثاني، وفجأة اقوم على نفففففس الشعور نفس النغزة! وامسك الجوال الساعه ١٠:٤٧🙂.
قلت لنفسي يا بنت وش ذا الوسواس توك من ساعه جيتي من الطوارئ والصبح كنتي فالمستشفى وكل المرتين قالوا مافي ولا بادره ولادة..
قمت سويت لنفسي سليق وقعدت اكل واتابع مسلسل بعدها قلت خل اخذ شاور حار اريح وانام..
ودقيت ع زوجي وقلت تعال ابي اتروش وابيك تكون موجود احتياط، وادخل الشاور وزوجي جالس عند الباب وعالجوال وانا اتروش فجاااااه احس بنفس النغزه
واطالع بزوجي واقوله جب جوالي وافتح له برنامج حساب الطلق وابدا اقوله يضغط..
وتتكرر النغزه بعد ٣٠ دقيقة..
بعدها ٢٦ دقيقة.
ثم فجاه كل ١٠ دقايق..
كل هالوقت وانا تحت الدش والمويه الحارة تصب فوقي! قلت لنفسي يا بنت اطلعي من الحمام قبل توصلين الخمس دقايق والحقي نفسك عالمستشفى واطلع واتجفف والبس واشيل الشناط وكانت الساعه ١ وقتها بس معد صارت النغزات منتظمة رجعت عشوائية قلت شكلها من المويه الحارة زادت التقلصات ماني متحركه من البيت الا لو رجعت منتظمة حتى لو مو متقاربه لو كل ٤٠ دقيقة بس مو عشوائية كذا، وقلت لزوجي رح نام شكله مو طلق ولا شي وان صار شي صحيتك..
وهو ينام من هنا وانا اخذ اناناس وقرفه من هناك واكل اناناس واشرب القرفة ولما خلصت رحت انسدحت ابي انام وماقدرت، احس بتوتر وقلق واحساسي يقولي بولد..
واحاول انام احاول اتغصب ماش..
لما اذن الفجر على ٤:٣٠ كذا..
حسيت بنفس النغزة، قمت فتحت تطبيق الطلق وبديت احسب..
النغزه كانت تجي لمده دقيقة او ٤٠ ثانيه بعدين تختفي،
مرت ربع ساعه، نغزة ثانية..
وربع ساعه ونغزه ثالثه
وانا منسدحه ع جنبي واحسب..
ومع كل نغزه احس بطني يتصلب والنونو تتحجر يسار بطني..
ويوم صارت الساعه ٦ بدت النغزات تتكرر كل ١٠ دقايق!
قمت لبست ملابس مريحه وشرابات وقومت زوجي وقلت مشينا عندي طلق، كان صباح اليوم الوطني ٢٣ سبتمبر ..
وفالطريق مع الهزات حقت السيارة زاد الم الطلقة وشد بطني مرررره وزوجي بدا يتوتر ويدعي لي وانا احاول اركز اتنفس وصلت المستشفى وانا ميييته تعب ويشيلوني بعربيه وادخل عالدكتورة فالطوارئ الا هي باقي نفس حقت امس السودانية، وتعطيني نظرة الي نعم؟؟؟ قلت عندي طلق منتظم !! قالت شدراك؟ قلت احس فيه!!
قالت كيف تحسي فيه وانتي بكر وش عرفك انه طلق؟ قلت مو لازم احد يعلمني لما يكون طلق انا اعرف بالغريزة!
قامت تضحك وقالت اوكي اطلعي افحصك وتفحصني وتقول يا اختي الرحم نفس وضعه مقفل ومرفوع ومافي ولا مشكله !
قلت مالي شغل انا احس بطلق ومنتظم!
قالت باستهزاء "لو عندك طلق ماجيتي تمشين وقاعده تجادلين وتسولفين!"
انا بدون تفاهم دقيت ع الصحة وقدمت شكوى قلت اجيهم طلق وتقولي اني اكذب مين بيتحمل المسؤولية؟
وقالوا لي اوكي بنتواصل معهم ونرد عليك، انتظرت نص ساعه الا الدكتورة داخله علي وتقول كتبت لك تخطيط روحي سويه وبيبين معك لو فيه طلق او لا، قلت اوكي كان من اول بدون مشاكل ☺️.
وادخل اسوي التخطيط والغرف كلللها فاضية مافي الا انا والموظفات ينفخون بالونات لليوم الوطني ويصفصفون كيكاتهم والتشوكليت 😂
المهم وانا تجيني شده واطالع بالجهاز وماشوف تغيير؟؟؟
شوي تجيني ممرضه سعوديه بحلاو وقهوه وتقول تقهوي 😂
قلت بالله تاكدي الجهاز مركب زين ماحسه يحسب صح! قامت شيكت وقالت اي مضبوط وراحت، وتخلص الساعه واخذ النتيجه وارجع للدكتوره الا تقول في الساعتين جتك طلقتين مو منتظمة..
قلت دامه جت طلقتين فوالله ان عندي طلق وجهازكم خربان تاففت وقالت انت شكلك تبغين تعاقبيني باني ما اخلص دوامي! (بعد الشكوى ماقدرت تسلم شغلها وتطلع لازم ارضى انا واسحبها😂) قلت عيديه ع جهاز ثاني! قامت كتبت لي اعادة وقالت ارجعي سويه..
وارجع للقسم ويركبون الاجهزة وكل شي والممرضات السعوديات يسولفون معي ويقولون مو لازم تجي فاليوم الوطني يختي شوفي مافي غيرك ونضحك والخ، بعدها قالت خلاص كملي التخطيط وراحت وانا احس بالم فضيع، يجي ويروح رجولي وظهري وبطني مررررررره الم..
المهم جتني الممرضه وانا على ظهري ومهلوووكه، فجاة تشق الورقة وتطلع ركض للدكتوره ما مر وقتها الا ١٥ دقيقة ماقد كملت الساعه حتى، كانت الساعه ٩:٥٠ دقيقة بالضبط صباح اليوم الوطني..
فجاه دخلت الممرضه ومعها ابرة المغذية وثبتتها صم السوارة وقلت وش السالفه؟ قالت خلاص تنويم الطلق منتظم كل ٥ دقايق وقوته ٢٠ معناته بدايه ولادة!
وبس قالت لي انزلي من السرير ويجيني لوعه كبد وابدا استفرغ اعزكم الله ثم حسيت كاني عملتها ع نفسي بنفس اللحظة
قامت الممرضه تقول نزلت المويات طلعوها بسرعه واطلع عالتنويم وتدخل علي دكتوره وتسوي فحص وقالت الرحم بدا يلين بس المويات دامها نزلت لا تتحركين ولا تمشين لا تنزل المويات والرحم مقفل وتتحولين عملية ..
وادخل غرفه التنويم وانسدح وتجيني دكتوره ثالثه وتقول بنكتب لك تخطيط كل ٨ ساعات.. ونعطيك مضاد، يبغالك يومين او ثلاثة قبل الولادة فاليوم بس بنخليك ملاحظة اذا ما فتح الرحم يمكن نطلعك !!!
وانتظر الى ٤ العصر..
وتجي ممرضه وتركب لي التخطيط وكل هالوقت انا مو بقسم تنويم الولادة حاطيني بقسم حق الي للملاحظة بس زي الي يجيها طلق بالثامن او نزيف والخ يعني كانه مو وقت ولادتي!!
المهم وكل ما خلصت ساعه التخطيط قالت لي الطلق ٣٥ بس مو طلق ولادة الولادة ٥٠ وفوق..
وانتظر الى المغرب ويدخل دكتور سوداني وقالي بفحصك دام اخر فحص كان الصباح قلت اوكي، ويسوي لي فحص ويقول الرحم ١سم.. دام من امس انت تشتكين وتوه ١ سم معناته مافي ولادة الا بعد يومين او ثلاث، بس المويات ماحسها نزلت!
ويسوي لي سونار وفعلا مستوى المويه طبيعي فقالي خلاص قومي امشي واطلعي وانزلي الدرج نص ساعه ثم ارجعي يركبون لك تخطيط ساعه ثم امشي وهكذا عشان يتحفز الطلق، قلت اوكي..
وفعلا بديت امشي نص ساعه واركب تخطيط ساعه والطلق يطلع ل٣٥ بعدين يرجع ٢٠ ثم ٣٧ وهكذا.. بس منتظم الوقت لكن القوة لا..
واجلس كذا طووول الليل، وعلى ٧ صباح يوم ٢٤ بدا الطلق يقوى مررررره وانا طول الوقت اقول لنفسي تنفسي واقري الزلزلة ولا تتوترين، وزوجي "هو دكتور" يرسلي لا تخلينهم يعطونك طلق صناعي او اي شي قومي تحركي احسك بتطولين..
وابو زوجي برضو دكتور يرسلي يقول اطلعي لا تقعدين بالتنويم مستحيل تولدين!
وانا الوحيدة الي احس اني بولد 😂
ولما جابوا لي الفطور دخلت الممرضه معها ابرة الظهر تقول بنسويلك اختبار حساسية، وتسوي حق الحساسية وتقول اذا فتح الرحم ٤ سم بنعطيك لو ماعندك حساسية، قلت طيب افحصيني! تاففت بعدين قالت اوكي ☺️
وتفحص وتقول "مدام انت ١ ونص مافي ولادة اليوم!" قلت الطلق زاد طيب! قالت انت موسوسه لانك تتابعين الرقم بجهاز التخطيط تحسبينه ولادة!
وتطلع وتسحب علي..
وانا يشذ علي الالم واتنفس واذكر الله وادعي واقرا الزلزلة ..
وتجي الساعه ٩ الصبح وتدخل علي دكتوره الي بتحدد انا اكمل تنويم ولا اطلع وارجع بعدين، وتكلمني بطرف خشمها 🙂 تقول انت لك يومين هنا وتو الرحم ١ سم ليه تبين تقعدين 🙂
قلت افحصيني طيب؟ انا احس الالم يزيد مره! قالت كثرة الفحص يجيب التهابات واصلا مستحيل يفتح الرحم في ساعتين 🙂 قلت يعني؟ قالت بعطيك فرصه لين يداومون الي شفتهم ١٢ الظهر وهم يحددون لو تطلعين ولا لا! قلت طيب ابي ابرة الظهر انهلكت ٣ ايام طلق :) قالت مستحيل وصل الرحم ٤ سم بدري عالابرة 🙂
وتطلع وبعدها تجي الممرضه تشيل التخطيط وتقولي قومي امشي ..
واقوم امشي ومع المشي احس فيه شي يضغغغغط بقوه ويشد الطلق لدرجه ماقدر احرك اصبع واحد حتى!
واضغط الجرس وتجي الممرضه ع ١١ تقريبا واقولها جيبي دكتور انا احس اني ولادة خلاص! قالت مدام انت ماتعرفين الولادة لو فيه ولادة ماكنتي ساكته كذا كان سمعنا صراخك من اخر المستشفى! وانا ماسكه نفسي ومتحمله لان اذري الصراخ بس بيزيدني الم وذولي يقولون لانك ماتصارخين مو ولادة؟؟؟؟
اذن الظهر واجي اصلي وماقدرت اصلي الا جالسة من قو الالم ويجيني الطلق ويشد لدرجه نص صلاتي اقول لا اله الا الله بدال السور 💔
واخلص الصلاة وادخل الحمام والا المويات تصب علي كلها كاني تبولت على نفسي حرفيا! كانت الساعه ١ الظهر
واطلع انسدح عالسرير واضغط الجرس...
وانتظر ومحد جا
والالم يششششد
وادق الجرس ويوقفونه ومحد يجي!
والالم زاد لدرجه ماصار طلق يوقف ويزيد لا صار الم مستمر!
لما فقدت الامل قلت مالي الا اصارخ 🙂
يمكن يصدقوني انه ولادة صدق مع اني عارفه الصراخ بيتعبني انا !
وابدا اصارخ لين صحت الي جنبي وتقول وشفيك قلت ابي دكتوره بسرعه انا متاكده اني ولادة!
تخيلوا اني ضامه رجولي لاني متاكده ان راس البيبي خلاص طلع !
واقعد اقول لنفسي لا تدفعين لا تولدين لوحدك.. وادعي ان الله يحفظني ويحفظ بنتي واحوقل واذكر الله واطمن نفسي عشان اقدر اولد !
جت الي جنبي من برا وقالت مافي ولا احد بالقسم اخذو بريك 🙂 قلت لها انا احس الراس خلاص طلع !
قامت دقت ع وزارة الصحة وعلمتهم السالفه وانا اصارخ عشان يصدقون 😂
طبعا فجاة دخلت دكتورة وكانت نفس السودانية الي فالطوارئ من يومين واول ماشافتني قالت اف انت كمان هنا؟ ليه ما تقتنعي ان مافي ولادة!
انا يوم شفت دكتوره رجعت تماسكت وقعدت اتنفس وارخي اعصابي عشان الولادة
ومعها الممرضه الي فحصتني الصبح وجالسه تقولها الساعه ٩ كان الرحم ١ سم مستحيل انه فتح :)
وتتافف وتقول انت دلوعه ولو الرحم اصلا ٣ ماشفناك كذا!
قلت افحصي وبس ولا بحملك المسؤولية!
سوت فحص ووجها انقلب وتلف عالممرضه وتقولها ١٠ سم!!!
وتشهق الممرضه وتطلع ركض تبلغ يجهزون غرفه ولادة!
وتجيني بسرير و٤ ممرضين رجال يشيلوني عشان ينقلوني للولادة، وانا بس شفتهم صدقوني واسترخي واروق واخذ جوالي معي غرفه الولادة😂
ويسحبوني زي المجانين فالاسياب وارسل لزوجي ٢:٣٨ بالضبط اني داخله ولادة ودعواتك..
وادخل ويحطوني ع سرير الولادة وتصك الممرضه رجلي وتقولي لا تدفعين بنادي طاقم الولادة 🙂
وانا خلااااص ماسكه نفسي من الفجر وش الي لا تدفعين قلت ماقدر لا تروحين ! قالت انا مو ولادة انا ممرضه بس وتطلع ويدخل علي ٢ سعوديات الي يسمونهم القابلات..
ويسولفون رايقين لفيت عليهم وقلت احس اني ابي ادفع! قالت ارفعي رجلك عالحدايد قلت ماقدر لو رفعتها بولد!
وهي تستحقر 🙂
قمت رفعت رجلي وانا كل هالوقت متغطيه ببطانيه طبعا فرقبت لي القابله التخطيط ثم قالت لي احنا ننتظر الدكتور لكن لو جاك طلق ادفعي معه هذي دفعات تدريبيه.. وانا لسه مصره اني لو ادفع بولد😂😂😂
قلت يابنت الحلال الرحم ١٠ سم لو ادفع بولد! قالت انت بكر؟ قلت ايه! قالت خلاص مستحيل ولاده بهالسرعه "مازلت في انت بكر ماتدرين🙂"
المهم وهي تتجهز وتلبس وكذا ويجهزون ملابس الدكتور ويجيني طلق ومع رفعه الرجول حسيت صدق بدفع قوي قمت ادفع معه، فجاه يدق جرس الانذار في جهاز التخطيط وانا قلبي يوقف 🙂 قلت وش فيه! قالت انت تحمستي بالحركه وفكيتي التخطيط اكيد، وترفع البطانية قصدها تصلح التخطيط الا هو راكب بمكانه صح، قامت سحبت البطانيه وجت تناظر من تحت وفجاه تشهق وتصرخ علي وتقول الراس بيطلع وقفي دفع الدكتور ماجا!!!
كيف اوقف مع نفسكم خلاص انا عارفه اني ولادة 🙂
قامت تفك العده وتمسك المشرط وتطالع بصديقتها وتقولها بالانجلش ع بالهم مافهم "الراس خلاص نزل مره اقص العجان ولا انتظر الدكتور!" وصديقتها تقول لا تقصينه غلط وتتحملين مسؤوليه خليه لين يجي وخي ترد طيب قاعده تنشق من اكثر من مكان لازم يستعجل الدكتور ومع كلامهم دخل الدكتور ورايق الف ما كان فيه ولاده ويلبس قفاز بيد وحده وباقي الثانيه ويمر يطالع فيني وينقلب وجهه وعلى طول يسحب المشرط من يد القابله ويشق العجان وبنفس اللحظه البنت طلعت بيده 🙂 بعدها عم الهدوء ل٣٠ ثانيه ثم بكت البنت والدكتور قال مبروك بس كم لك هنا وكم لك طلق !!!
وانا ماصدقت ع الله ولدت وارتحت واسترخي ويجيني نوم 😂
شوي تدخل دكتوره الاطفال بعدتها وتتبوسم وتمسي عليهم بالخير الا الدكتور ماسك البنت بيده ويقول خذيها مني وتشيلها مصدومه وتقول كيف بالسرعه ذي!! وتبدا تفحصها وتنظفها والدكتور يخيط قمت مسكت جوالي ولقيت الساعه ٣:٣٠ وارسل لزوجي "ولدت وانا والبنت بخير" والدكتور يطالع فيني بنص عين ويقولي رايقة لجوالك الحين؟ 😂😂😂
وبس طمنت زوجي واصكها نومه بنص الخياطة لاني اكلت تبن ٤ ايام مانمت وانام الين صحوني المغرب على سرير الولادة يقولون قومي تروشي وانزلي التنويم ☺️
وانزل وبس اوصل الا امي عندي وش السالفة؟ قالت زوجك حجز لي وقالي انك ولادة ليه ماعلمتني قلت كان انغثيتي معي وكلن كان يقولي مستحيل اولد فقدت ماقولك الا لو تاكدت اني بولد 😂
بنص المعمعه ذي تذكرت اني ماخذت ابره ظهر، ولا ولدت الا بملابسي الي جيت فيها من البيت🏃🏻‍♀️
والنونو جت ٣ كيلو وهم قالوا لي وزنها ٣،٥٠٠ 😂وكل شي غير الخطط حقت الولادة كلها بس والله العظيم تيسرت مره مره مره الولادة مع انها بدون ابره الا اني قدرت عليها وماحسيتها هلكتني ما هلكني الا ترجيهم يصدقوني اني ولادة 🙂 بعدها اعتذروا لي الطاقم كله انهم ما صدقوني لكن دام الله طلعني انا وبنتي بخير هذا المهم ☺️
اول اسبوع بعد الولادة كوابيس وافز من نومي وبس ابكي لكن سافرت لاهلي بعد اسبوع وارتحت نفسيا مره وتخطيت الازمة الحمدلله ❤️


وجتني احلى "ضي" بتاريخ ٢٤ سبتمبر ٢٠٢٠
الحمدلله حمدا كثيرا طيبًا مباركا فيه..
خلصت قصه حياتي😂

انا 🙅🏻‍♀️

تقبل الله
الله يجزاك خير

الحمدلله ع السلامه
توترت بدالك كيف احس بالالام ومحد يصدق انها ولاده !