تحليل بول ايجابي بعد الدورة!

قبل الدورة بخمسة أيام جاني شد أسفل بطني..
كل ما تحركت حركة سريعة أو عطست أو حتى ضحكت يشد معي مرة وينقبض..

المهم انا قلت شكل هذي أعراض حمل وانبسطت، وبعدها بكم يوم نزلت دورتي بنفس موعدها وكانت طبيعية جدا مافيها أي اختلاف وحتى نفس الالام المعتادة وقلت خلاص شكل منب حامل..

لكن بالعادة تنزل علي أسبوع وهالمرة جتني ثلاثة ايام فقط..

اللي صار لي انه بعد ماخلصت الدورة أخذت اختبار منزلي كذا أجرب واطقطق وطلع لي خطين واضحين 😂

عاد أنا قعدت اهوجس لا يكون هذا اللي يقولون عليه حمل غزلاني ومدري ايش وهاتك هواجيس لين قررت اسوي تحليل دم وقالوا سلبي 💔

طبعا ما خليت حركاتي ورحت من بكرة جربت مجموعة اختبارات بول من مجموعة شركات وكلها تطلع ايجابية !

ابي اعرف هل هذا ينبأ بوجود مشكلة معينة؟ مع اني ما استخدم ادوية ولا منشطات ولا أي شي..

وش تتوقعون السبب؟