عصبية بنتي وتأثيرها على حياتي الزوجيه الجديده .

السلام عليكم يا اخوات جايه وانا مثقله بالهموم ومتكدره من بنتي عمرها ٥ سنوات الله يصلحها ويهديها ويسخرها يارب
هي صغيره بس عقلها اكبر من سنها ماشاء الله ومتعبتني جدا
عنيده ومستفزه استفزازيه بكل الطرق شرسه وعصبيه مره مره وبكايه وقليلة ادب مرره لاتحترم لاصغير ولا كبير ولسانها طويل
مأزمتني ف عيشتي وفحياتي مو علرفه كيف اتصرف معاها هيا عايشه معايا انا وزوجي بس بدايات زواجي كانت عايشه عند اهلي وبعدها بفتره اخذتها تعيش عندي وهيا متنقله بين ابوها وحرمته وبين اهلي ف منطقه وبيني ف منطقه اخرى وساعات تجلس شهر شهرين عند ابوها وتجلس عندي بالشهوره وتروح لابوها زياره اسبوعين ٣ وترجع تكمل عندي
استقرارها الاساسي عندي وغرفتها جاهزه عندي وروضتها مسجلتها عندي بمنطقتي ،
انا صحيح بطبعي عصبيه بس بنتي عصبيه اكثر مني يعني انا اخاصم واعلي صوتي لكن ما اضرب ومدلعتها وطلباتها اوامر وزجي كذالك يرحمها ويعطف عليها لكنها ماتحبو وتستفزو بذكر ابوها وصفات ابوها وقوة ابوها قدامو تستفزو بانو ابوها يحب هذا الشي ويكره هذي الاكله مثلا ، تستفزو بانو انا ما انبسطت ف الطلعه ف الحديقه ف البحر بابا حيطلعني ويوديني تصرفاتها وكلامها كانها طفله كبيره واعيه وياويلي اذا حضنتو ولا جلست جنبو .
تقل ادبها على خالاتها وعليا ، وانا ما اقدر اكون مره شديده معاها لاني ارحمها واحس بالذنب تجاهها ف اسايرها ، بس هي ساعات تحسسني كأني مره ابوها او طبينتها تفرق بيني وبين زوجي بتصرفات وكلام يصدمكم انا تعبت نفسيا منها وابوها من تزوج صار ياخذها قليل خايف منها ومن شرها على حرمتو
اخواتي يشتكو منها ومن ضربها لبزورتهم تعبت والله تعبت .
حتى عيال زوجي من طليقتو تلطشهم وتآذيهم صارت مشاكل كبيره بيني وبينو بسببها ، كل مايحتويها يرحمها تدفو وتبعدو يشهد الله انه حنون ويقابلها ويخدمها اكثر من ابوها .
افيدوني او اعطوني رقم استشاريه تساعديني والله اني ارحمها واحاول احتويها وادلعها بس هي تتمادى اعصابها متوتره دايما ومشدوده .


انا ساعات ابرر عصبيتها بحكم انها ما استقرت ف بيئه وحده طول وقتها متنقله عندي نظام حياه وشروط وعند ابوها كذلك وعندي اهلي كذلك ف البنت ما اتربت مزبوط عشان كذا صايره مشتته وانا ابغى حل للتشتت ابغاها هادئه لينيه وطبيعيه ومستقره نفسياً لانها مُتزعزعه جداً .