دائماً الوحده فينا لما تدخل الثلاثين يجيها خوف او صدمه وتنخل حياتها نخل وتشوف وش انجازاتها وتبحث عن ذاتها..
الشعور اللي تمري فيه اقدر اقول طبيعي واغلب الناس تمر فيه، اللي موظفه بدون زواج تبدأ تحس انها محتاجه زوج واستقرار، واللي ماعندها أطفال تحن للأطفال، واللي مادرست تحس بالنقص وممكن تبحث عن وظيفه..
وحتى اللي متوفر لها كل شي في هذا السن تحس انها لازم تنجز وتطور نفسها..
بالنسبه لك أحد الأشياء اللي تشوفيها معيقه لك ولتقدمك هو زوجك،
وبصارحك بشي لاتزعلين، انت استسلمتي له وماحاربتي علشان دراستك فجزء كبير من الغلط يقع عليك..
لا تفكرين سلايفك او اللي حولك اخذو حقوقهم بالساهل وبدون مشاكل،
اعرف وحده جننها زوجها على الدراسه مع كذا درست وتوظفت وحققت هدفها بدون طلاق وتشتيت بس كان عندها اراده..
اسألي نفسك هل الطلاق بيحقق لك أهدافك وطموحك ولا بتزيد مشاكلك وهمومك؟
الطلاق بدايه لمشاكل اكبر،
وماهو حل أبداً، وتضييع لاطفالك اللي قعدتي عشر سنوات بالبيت كربة بيت ناجحه علشان تربيهم تربيه ناجحه،
تراهم ثمرة عظيمه لقعدتك في البيت وتضحياتك، وصدقيني انت مؤجوره اولا وأخيراً في بقائك معاهم وتربيتهم وانت انجزتي معاهم شي كثير بس انت غافله عنه حاليا ً..
طيب الحل؟
لو انتفضتي على زوجك انتفاضه قويه ممكن مايتقبف وطبيعي لانك خاضعه كل هالسنوات يشوف منك تغيير او تمرد..
لذا التغيير حبه حبه، بتقوللي كيف؟
اقولك علي حسب طبيعة زوجك وحياتك، حطي لك أهداف تحققيها وبعد ماتخلصين من هدف تبدأين في الثاني وهكذا،
اول شي في التغيير الدعاء، والله ماراح يغير حياتك وزوجك ونفسيتك الا الدعاء كأول خطوه..
علاقتك برب العالمين راجعيها، واخلصي النيه في اي عمل تقومين به في بيتك ولاولادك..
واقدر اقولك لو مشيتي في خط الدعاء ومعرفة الله والقرب منه بتتغير حياتك كثير وبتمسكين اول الخط..
في نقطه حابه اقولها المرأه اللي ماتاخذ حقوقها دايما اشوف انها تخاف من المشاكل وتخاف من الزعل..
مااقولك زعلي زوجك لكن إذا طالبتي بحق طبيعي لك في البيت أو غيره وزعل اصبري علي زعله لأنك على حق ولاتخافين، ترا اللي حولك انت تشوفي الجانب المضئ فقط من حياتهم ماتدرين هالزوجه اش سوت وكيف تعبت مع زوجها علشان غير أفكاره وصار فاهمها..
الله يفرج همك وييسر أمرك ويسخر زوجك..
اكتشفت اني ضيعت ١١سنة من عمري مع زوج اناني
متابعة النقاش، صفحة 4