مرحباً يا حلوات
أول شيء ( ترند ) المقصود فيها المنتشرة بين الناس .. موضة هالفترة مثلاً هوت تشوكلت ، يحطون فوقه مارشملو ويبيعونه بمقهى معين .. فكل الناس يروحون ويصورون هالمشروب
كنت بأحد محلات التشوكلت وفعلاً كانو يبيعون حجمين ، الكبير بـ 25 ريال ، و يحطون عليه شريحة تشوكلت عليها شعار المحل الفخم ..
فسألت وحدة : ليش بـ 25 هل هو مميز ؟ .. رد الرجال : ترنـد هالفترة !!
بقول لكم الصدق أنا شريت الصغير ، لكن قال لي : الصغير مخلص بحط لك الكبير ، فجاوبته ببساطة : لا مابي كبير ، حاسبني على الصغير ..
وفعلاً صب لي شوي بالكوب الكبير ( هذي سووها حتى مع ستاربكس و د.كيف لا تسمحون لهم يجبرونكم عالكبير).. و حاسبت بـ 15 .. والنهاية .. مشروب هوت تشوكلت ثقييييل جداً
والثاني الي يبداً بحرف هـ .. توهم فاتحين .. وطواااابير برا في الحر ... عشان العدد الي داخل محدود .. و يسوون هوت تشوكلت عليه شعار الخيل .. بالنهايه ؟ بارد .. والغطاء مو مثبت كويس عالكوب الورق ..
أنا أقول ..
حنا شعب يبي يصور .. من طلع سناب و الكل يبي يصور .. والذكية الي تلعب على هذا الاتجاه ..
تسوي لوقو .. أو شعار .. تخترع ماركة ما كانت ماركة أصلاً .. هي الي اخترعتها .. حتى لو تبيع كيك معين .. تشتغل على العلبه و الشعار و الألوان والشرايط ..
صايرين كلنا نهتم بالشكل .. حتى أكثر من الطعم ..
لما أدخل محل أسر منتجة .. يلفتني البوكس الكشخة .. حقيقة لا جدال فيها
تذكرون ذا بالم كافيه ؟.. جاء الرياض من الشرقية .. ويقدم كوب قهوة داخل قشرة جوز الهند بأربعين ريال .. صحيح انك ممكن تطلبين مشروبات ثانية بحدود عشرين .. لكن السقنتشر حقهم بأربعين
وصارو البنات يدخلون ويطلبونه ويصورونه .. لكن ولا وحدة فيهم رجعت تشتريه من جديد .. لأنها خلاص صورت ، ومافيه شيء يسوى أنها تدفع أربعين مرة ثانية عشان كوب قهوة .
السؤال ، ممكن تدفعين أربعين على كوب قهوة للتصويـر ؟؟ ((موضوع للدردشة و ممكن تجارب التاجرات إذا موجودات يشاركون معنـا))
شاركي في النقاش
سجلي الدخول لإضافة تعليق.
التعليقات
134- رفع
موضوعك يحمس شكل تخصصك علم اجتماع
انا تحمست اعرف الاراء بعد
بالنسبة لي على حسب اذا معي ايه لان ساعات ودك تكسرين الروتين و تحطين بالسناب صور زي كذا تدل على انك ( اي تو ديت ) او ترند. واجرب بنفسي هل فيه متعه وهل التعليقات ع الصورة اضافت لي شي
واحيانا اطلب هالشي مو عشان مطعم او قهوة بس اجرب احترافيتي بالتصوير و المونتاج.
انا للاسف قضيت عمر في ستاربكس بحكم دراستي الطويله و لين الحين احس بحنين له يذكرني بايام الدراسه ف لو يرفعون سعره ل ٥٠ اعتقد اني باستمر اروح له لانه مصمم بطريقة علم نفس ذكيه جدا يخلونك تألف المكان وتجلس تذاكر فيه بعدين تحن على ايام الدراسه وجمعه البنات و الاختبارات
احس يمكن يمكن حياتي ممله بالنسبة للبعض لكن اجمل ايامي ايام الجامعه وبعد الجامعه نشتغل بستاربكس.
الله ياحلوها من ايام. الين اليوم ادور صور قديمه لها ليتني صورت الجامعه الي كنت اكرهها كره العمى. - ماعمري رحت محل عشان اصور دايم اكون انا ابيه ومشتهيته او مراتٍ كتغير جو مو دايم
- هلابك عزيزتي
انا لا طبعا ماني من اصحاب هذي القهوه نهائي
ولا ادفع ٤٠ ع كوب قهوه
ولاافكر اسوي شي او اشتري شي علشان أصور اذا ابيه اباخذه فقط
شكرا لك موضوع جميل - سؤالك ..تدفعين ٤٠ ريال ع كوب ع شان التصوير ؟
والله يااختي ندفع اكثر ولله الحمد والمنه وبخير من الله واروح مطاعم ومقاهي ( تعتبر فخمه نوعا ما)
لكني عمرررررري ماصورت ولا احب التصوير ومنبها ع بناتي مايصورون شي ابد ولا حتى البيت تسأليني ليش ؟
لاني احب الخصوصيه ومااحب احد يدري من اقاربنا عن روحاتنا وجياتنا ..
اهم حاجه عندي اني انا مستانسه والباقي مايهمني رايهم ..هذا اذا بعد مافيها حراام لان فيها كسر لنفوس الناس الفقراء..
مثل كلامك هذا ينطبق ع الناس اللي تسافر برى وتصور كل شي ولما ترجع مافيه احد ماتعلمه بهالسفره وكأنها ماتستمتع بالسفر ..لكنها تستمتع بالكلام مع الناس عن هالسفره
اذكر وحده من خواتي سافرت برى ووقتها قالت لا احد يدري ولما رجعت هي بنفسها ماخلت احد ماعلمته ..ولما سألتها ليش سافرتي قالت ع شان انبسط قلت طيب ليش تعلمين الناس وش دخلهم فيك طالما انك مسافره ع شان تنبسطين ..وقتها سكتت . - عمررررري في حياتي كلها مالفت نظري شي ترند لا في اكل ولالبس ولاعطر ولاشي اشتري اللي انا مقتنعه فيه وعاجبني ويجي على مزاجي حتى لو ماعليه اقبال من احد وسعره مقبول او حتى غالي
لاني عارفه ان هالترند ماطلع ترند من جوده وطعم وجمال لا الا عشان بس الناس تهافتت عليه لمدح مشهور او لسمعة هالمحل حتى لو اكلهم ماينبلع المهم نوري العالم اننا دفعنا مبلغ وقدره في قهوه ماتنبلع والا في كيكة ماتنقرب كيت كات الذ منها
امس خرجت باشتري غرض وارجع ومستعجله قبل ياذن وتقفل المحلات وانا راجعه شفت طابور سيارات طويل عريض احتمال تكون عشرين ثلاثين سياره واقفين عشان محل كوفي المشكله مو هنا المشكله اللي يبيع خرج من المحل وحط حاجز عند اول سياره لانه باقي على الاذان دقايق فطبيعي قفل واطالع العالم واقفه ولاواحد مشي طيب صلاه ياجماعه ايش هالشي الواو اللي يخليني انتظر طول وقت الصلاه في السياره حتى اروح اشتريه من جد وقتها اشفقت على عقولهم ودعيت الله يرزقهم عقل على حجم الصبر اللي بيصبروه لين تخلص الصلاه ويروح ياخد كوفي مافيه زيه في الكره الارضيه كلها
مواضيع مشابهة
تابعي تجارب أخرى من هذا القسم.