استشاره بخصوص وضعي كزوجه ثانيه

السلام عليكم ومبارك عليكم الشهر الفضيل..
انا متزوجه من كم سنه وعندي أطفال صغار..
سجلت في المنتدى لأن بالي مشغول ومتضايقه وحزينه وابي اطلع اللي بصدري لأحد فاهم وناصح
هذا أول زواجي ولما انخطبت كنت صغيره وجاهله كنت صفحه بيضاااء مااعرف عواقب الزوجه الثانيه، ولا كان عندي علم بنظرة الناس عن الزوجه الثانيه ولا كان عندي علم ومااحد نصحني من اهلي عن التعدد..أبوي عساه بجنات النعيم شاورني وقلت اللي تشوفه يبه وبس وتم العرس..كنت مفكره اني تزوجت حالي حال اي بنت تصوروا ماكنت اعرف ان ترا فيه فرق في المجتمع بين الزوجه الاولى والثانيه..ونظرة الناس للي تتزوج معدد ماكنت عارفه أن هالشي حساس عند الناس. المهم زوجي يارب لك الحمد طيب معي وكريم وحنون ومازال كذلك، وضرتي أكبر مني بواجد وأول ماقابلتها رحبت فيني وقالت انتي حسبة بنتي الكبيره، وترا أنا مالي يوم ولا ليله أنا خلاص باعيش باقي عمري لعيالي وبناتي وبس،، واحمد ربي اللي جابك لنا.
المهم الوضع بيني وبينها تمام، وصرنا نزور بعض واحط عيالي عندها وعيالها يجون عندي وكل شي بيننا سمن على عسل،
بس فيه نقطه منكده علي حياتي كزوجه ثانيه اللي هي : (أهل زوجي ) مدري ليه مايبوني ومايعبروني مع اني حاولت اتقرب لهم بس مايبين فيهم.. معقول كل هذا بس لأني زوجه ثانيه💔😭
طيب أنا ماسويت لهم شي غلط بالعكس أحاول أقرب نفسي واحاول ادخل عيالي فيهم..
المشكله اني مليت وحاولت من كم سنه ابتعد عن زيارتهم وتجمعاتهم بس زوجي يقول لاتحرمين العيال من اعمامهم.. وحتى اخوانهم يبونهم في زيارات البيت الكبير..بس انا مليت من وضعي وصرت اخجل على نفسي واشفق على حالي لأني لست مرغوبه..أحس اني افرض وجودي معهم بالقوه وماعندي كرامه ولاعزة نفس!!
مايكلمني في تجمعاتهم غير ضرتي.. أحاول اتشارك السوالف مع اخت زوجي اتكلم مع سلفاتي ويسوون نفسهم مايسمعوني..يطنشوني بقد استطاعتهم
العيد هذا بإذن المولى عز وجل في اجتماع البيت الكبير ولكن خايفه مااروح يزعل زوجي وماابي احرم عيالي من فرحة العيد مع عيال عمهم..وزوجي دفع قطية العيد مع اهله..وعيالي من الحين ينتظرون الحفل بفارغ الصبر..
هل اشاركهم مناسباتهم أو لا انصحوني❤️