بأمانة اللي يسونه يجيب نتيجة!!؟

السلام عليكم ورحمة الله
كل عام والجميع بخير، تقبل الله منا ومنكم صالح الاعمال..

بنات انا قبل فترة طحت على قناة وحده روسية اسمها Anna محتواها عن كيف ترفعين استحقاقك لنفسك إجتماعيا وماترتبطين الا بنخبة المجتمع من الاغنياء، المهم من ضمن مواضيعها انك لازم تقحمين نفسك بدائرتهم ونصحت البنات يصيفون في فرنسا خصوصا كان والمدن الساحلية اللي يصيفون فيها، وقالت ان كيت تعرفت على الامير وليام بنفس الطريقه لدرجة اجلت ترم كامل بالجامعة بس عشان تصادفه وكمان ميغان نفس الطريقه دخلت بأعمال تطوعيه بس عشان هاري،، عاد انا هنا على طول تذكرت قصة الام اللي بكل اجازه تسفر بناتها لندن وتحجز لهم بأفخم فندق ومعروف اللي فيه اغلبهم أمراء ورجال اعمال ونخبة المجتمع، وكمان تذكرت اختين في التيك توك مره سوو بث وفضحوا اف**ن الب**ل وقالو كذا عرفت زوجها، وكمان تذكرت فوز الفهد انه من خلال افنت لكارتييه تعرفت على زوجها نفس نصيحة الروسيه، وجلست احكي وحده من زميلاتي اللي من حضر المدينة وقالت لي تصدقين ان بقية مدن السعودية يحسدونا احنا بنات مكه والمدينة وانهم بكل موسم حج او عمره او رمضان يجونا مخصوص عشان يطبقون هذي الحركه وقالت لي وحده من معارفهم شخصيا حجزت فندق من افخم فنادق المدينه بالعشرة الاواخر واخذت بناتها معاها على انهم من سكان المدينه وتحلف لي انها زوجت اثنين منهم لامارتين أغنياء من ورا هالحركة،،

بنات أنتم ايش رأيكم بالموضوع تشوفونه ذكاء ولا قلة عقل؟ ورجاء خلوا النقاش عقلاني لاتجي وحده تقولي الفلوس ماتهم أسالكم بالله خذو لفه على مشاكل المتزوجات هنا اغلبها بسبب الفلوس ويقولون حتى الاغنياء مشاكلهم من مستوى ثاني تنساب طبقتهم يتضاربون على اكل الطباخ على مشاكل الخدم كم سفره يسافرون.. ابدا مو المشاكل اللي تهد الحيل وتقصر العمر اللي نسمعها ، حكموا عقلكم وبعدين المجال مفتوح خلونا نتناقش ونفيد بعض، وهذي قناة الروسية اذا احد مهتم فيها Anna Bey

118 تعليق 21,424 مشاهدة

شاركي في النقاش

سجلي الدخول لإضافة تعليق.

التعليقات

114
  1. @shaathh

    يازين الزواج عن اقتناع وستر بدون استعراض وسفر ومشقه
    نصيب الوحدة مكتوب حتى لو كانت بقرية وماتطلع من البيت
    بعض الناس اعمتهم الفلوس وصاروا ماديين ومستعدين ينزلون من كرامتهم عشان الاغنياء
  2. @nylor

    صاحبة الموضوع
    شعثه
    يازين الزواج عن اقتناع وستر بدون استعراض وسفر ومشقه نصيب الوحدة مكتوب حتى لو كانت بقرية وماتطلع من البيت بعض الناس اعمتهم الفلوس وصاروا ماديين ومستعدين ينزلون من كرامتهم عشان الاغنياء
    الزواج عن اقتناع جميل لكن دايما نسمع الحب مايوكل عيش وقيسي عليها بقية المواضيع، ماننكر اننا بعالم مادي بحت لدرجة لاقدر الله لو ماعندك القدرة حتى علاج ممكن ماتلقين وتتبهذلين بالحكومي طول عمرك لو ماعندك فلوس حتى اطفالك مستقبلا بتحرمينهم من التعليم العالي والجامعات المرموقة الحين حتى الطبقة المتوسطة يضغطون على نفسهم بس عشان عيالهم يجيبون درجات بالخاص ويدخلون جامعات رجاءً لاننكر اهمية الماده بزمنا هذا ماتطرقت لسى للسكن والترفيه وبقية جوانب الحياة اللي بدون فلوس ماوصلتي لها، اما بخصوص الكرامه هم اذكى من انهم يهينون نفسهم شوفي صاحبة القناة هذي كيف واثقه من نفسها ومن تصرفاتها وابدا ماتنقص من كرامتها بالعكس تشوفه حق من حقوقها كأنثى ترتبط بأفضل الرجال واكفاءهم، وفعلا صار اللي خططت له تزجوت لبناني ملياردير عايش بسويسرا
  3. @newmum

    -
    الموضوع ما أشوفه لا ذكاء ولاقلة عقل..
    لكن ما اقتنعت فيه.. يعني معقول اقحم نفسي فـ مجتمع الأغنياء واسكن فـ فندق فخم عشان اتزوج شخص غني..
    ابداً ما اقتنعت بـ هذا المبدأ..
    وبخصوص البـاتل اعتقد انها تزوجت شخص من نفس مستواها المادي والإجتماعي..
    هس مو ناقصة فلوس او سفرات عشان تقحم نفسها فـ مجتمع شخص غني.. هي خذت من نفس طبقتها..
    "انا تكلمت عنها لأني متابعة لها".. الباقين اللي ذكرتيهم ماعرف عنهم شيء..
    وعلى فكرة انا استفدت كثير من نظرية اني ارفع استحقاقي لـ ذاتي لكن مو بهالطريقة..
  4. @aaoatf_trky_2

    الحياة فيها اتساع ووفره ومليانه خيارات متنوعه وكلن حر بقراراته واختياراته
    لان ممكن الخيار اللي يناسبك وتحسينه يخدمك قد يكون غير مناسب لغيرك ولا يخدمهم
    ويمكن هذي السيده صاحبة القناة طرحت مثال فقط عشان توصل لكم وجهة نظرها بنقطة معينة
    لكن لو فكرتي فيها ترى مو شرط تسافرين وتسكنين بفنادق فخمه عشان توصلين لهدفك
    الفلوس لها عدة ابواب وطرق متنوعه وعديده غير انك تستجدينها من شخص
    ليش ما انتي تصنعينها وتجيبينها بيدك وتكونين انتي الثريه المنجزة سيدة الاعمال اللي لك مكانة ومميزات
    الاستجداء من الاثرياء خيار والعمل والانجاز وتحقيق الطموحات خيار كذلك

تابعي تجارب أخرى من هذا القسم.