الخطبه

انتي ادرى بنفسك
وانتي الوحيده اللي تعرفين سبب رفضك
خليك صريحه وواضحه مع نفسك وامسكي كل الاسباب اللي بداخلك وفكري فيها وناقشيها مع نفسك وشوفي لها حل
اما سالفة انك متردده مره تبين ومره ماتبين ماجات من فراغ ابحثي بداخلك عن السبب وبتلاقينه

والله ياختي مالقيت سبب مقنع دايم اقول خايفه ما ارتاح له وخايفه اتم على وضعي متضايقه منه رغم اني ابي اتزوج واشوف حياتي بس ماني عارفه سبب هالضيقه واللي امر فيه وكلمت كذا شيخ وكلمت مستشار وللان على وضعي

تقولين اخاف ما ارتاح له
ليش يعني انتي متوقعه ان رجال العالم العربي والغربي كاملين ومفصلين تفصيل مافيهم ولا عيب ولا غلطه ؟
وانتي وانا وغيرنا اساساً هل احنا اشخاص كاملين مافينا عيوب ؟
الجواب .. لا
محد فينا كامل ومفصل تفصيل
ونفسياتنا ومزاجنا واخلاقنا مستحيل احد يقدر يعرفها الا لما يعاشرنا
فلا تتوقعين انك بتعرفين الرجال اللي بترتبطين فيه قبل لا تعاشرينه او على الاقل تسألين عنه الناس اللي معاشرينه
الزواج عندنا يتم بناء على الارتياح والقبول بالشوفه الشرعيه ثم السؤال عن الخاطب واخلاقه وتعامله مع الناس ثم الاستخاره والتوكل على الله
اما مسألة انك خايفه ما ترتاحين له هذا الشي يفترض تحددينه من اول مادخلتي عليه وجلستي معاه بالشوفه يا اما يكون له قبول او نفور بداخلك مو كل شوي على رأي والضغوطات العائليه تاخذك وتوديك

واذا انتي شخصيتك متردده بشكل عام في كل قراراتك بالحياه فلازم تشوفين لك حل لان الخلل يكون في شخصيتك وتفكيرك مو في الناس ولا في الخاطب

اعرفي وش تبين بالضبط وخليك حاسمه في قراراتك
وحاولي تطورين نفسك وشخصيتك وتصححين افكارك المغلوطه عن الزواج يمكن هي اللي مسببه لك كل هذي الربكه والتردد من كثر ماشفتي تجارب فاشله تأثرتي

يمكن خوف من الارتباط والالتزام
ما دام سألتوا عنه وعندك قبول تجاهه واستخرتي خلاص استعيذي من الشيطان وحاولي تقللي تفكير
كل ما فكرتي اذكري الله
واقري من مصادر موثوقة عن الزواج والتعامل مع الزوج يعني استعدي للمرحلة القادمة الخطوات الأولى خلصت لا عاد تفكري فيها

اتوقع اللي فيك خوف غير مبرر
انتي خايفه من الحياه الجديده
من التجربه الجديده و كيف بتعشين مع انسان جديد
طبيعي اللي فيك
فكري باجابيه و حب و استمتاع و راح تروح هذه الوساوس منك
حبي فكره الزواج و الاستقرار و الحياه الجديده
الله يتمم عليك و يجمع بينكم بخير و يسعدكم و يهنيكم