تباشير 3️⃣لمواليد💕 يوليو واغسطس💕 2021💕

اهم شي دبا😂
صح اللي مو حلو فيها انها دبا
ولا مره عيالي حبوها
ودي بعد اخذ بيجون احس حلو وعليها مدح بعد

بالضبط

صباح السعاده

الف الف مبرررررررروك ياصديقتنا الجميله 💙💙

بسم الله اقولكم قصه او اكشن ولادتي قبل ماتقوم الشقرا اول شي من يوم الاربعاء تاريخ ٢٣ وانا حاسه ياربي بضيق على صدري وتقلصات خفيفه تروح وترد مثل الدوره بالضبط بس مره في ظهري ومره في البطن تحت وانا اقول في نفسي معقوله بدايه طلق وعدى اليوم بالتقلصات الخفيفه جا الخميس تاريخ ٢٤ اتصلت لي اختي الصبح تسألني عني وعزمتني انا وخواتي على الغدا برى وانا هاليوم مب قادره امشي ومازالت التقلصات خفيفه بس موجوده فقررت اروح واغير جو طبعا خواتي الي يدفوني على الكرسي وابو الطنازه والحركات بالكرسي كنت تعبانه بس ضحكت من قلب ذيك اليوم وشلون يلفلفون فيني اذا مافيه حد في الممر واقولهم والله بكره بربي بسبتكم وصدق الفال 👀👧الموقف الي يضحك ويموت وصلنا الاصنصير بنطلع فوق للمطعم جان الاخت ادفني بالكرسي وطلعت تأشر للباقي انه احنا بنطلع فوق ننطرهم ولا يتسكر الاصنصير علي وهي برى وانا على الكرسي وكان يطير الاصنصير فيني فوق واول ما انفتح الا ناس يبون ينزلون يطالعون فيني لا انا الي طلعت ولا ووسعت لهم ما اعرف اتحكم بالكرسي ثقيل لازم حد يدفني وضحك خواتي تحت اسمعهم 😢محتره منهم وعدا موقف الاصنصير ورحنا المطعم في المطعم اول ما شافونا واحد منهم من كثر من ناكل فيه ماخذين رقمه نحجز طاوله عشان الزحمه اول شي طلبته قلت ابي وابي وابي وابي طلبت اكل انا استغربت نفسي بعد بس قلت يله يمكن عشان التغير ولمه الاهل غير طبعا اختي شوي وتلطم هي الي بتدفع 😂 وكليت وخلصت والحمدالله تذكرت درس اللغه العربيه في اخر كل تعبير ثم اكلنا وشربنا وعدنا للبيت مسرورين 😂😂 طبعا احنا ما عدنا للبيت احنا كملنا اللف قلت لهم دلعوني اليوم حاسه اني بربي بكره والله وفعلا كان احساس قوي مب كلام فاضي بعد تعرفون حريم واجتمعوا وكل شي تنزيلات خمخموا للعيد انا متفرجه وكان استراحه محارب خذنا كابتشينو في كافيه الخوات يبون يركزون في التسوق الا اللبناني يشتغل هناك في الكافيه قال لي الله يطعمك ساعه سهله يارب وسالني كم صار لك الملاقيف خواتي يضحكون ويقولون ديناصور ١٢شهر سندرتنا بحملها واميرتها المهم وصلنا اخر محطه الا وهي الجمعيه في الجمعيه السوبر ماركت اقصد جاني نشاط وقلت ما ابي الكرسي بمشي شوي اتحرك بعد الاكل وتوني باخذ ولا الطلقه القويه مثل شوط الكهربا خلتني امسك رف الجمعيه كاني لامته وما اسمع الا صوت تنفسي ولا شعوري قمت اخذ شهيق وزفير لين هدت ونظرات خواتي مكذبيني 👀لاني لاعبه فيهم لعب بالمقالب وعدت الطلقه الاولى بسلام وخلصنا وطلعنا الحمدالله واحنا في السياره جان اجي الطلقه الثانيه قويه مب بسيطه لا والم سيت السياره ونفس الشي شهيق وزفير والكل متروع تبين نروح المستشفى لين ماهدت رفضت وقلت برجع البيت ارتب الي باقي لي لانه خلاص حان الموعد نزلوني وقالوا اي شي احنا قريب وكتبت لكم اذا تتذكرون ردت علي ام عبداللطيف اتوقع لا روحي للامانه ما رحت وخلصت باقي اغراضي ورتبت والوقت هذا كان تقلصات بسيطه مستمره بس الطلق القوي وقف بس تقلصات ورى بعض وبطني نزل وايد في الدقايق هذي مب الساعه ١٢ تقريبا خذيت دش دافي مايل للحراره وتجهزت ونمت نومه متعبه بس خذيت ساعتين وافز على الساعه ٣ بطلق ياررررربااااااااااه صرخت صرخه ادور زوجي في جنبي محد اثاريه تاخر عند الشباب ومطرش مسج ماشفته بيجي بعد صلاه الفجر وانا الطلق ورى بعض يمه يمه وطلق حامي مره ظهري ومره بطني وابي ارجع حرقت زوجي اتصالات لين وصل ٥ وشوي تخيلوا طول هالوقت 🤢 ووصل وطيران على المستشفى وصار جسمي كله ينتفض وقاعده اسوي بوش في المستشفى طاروا فيني اقولهم انا قيصري وفيني طلق فحصتني الدكتوره ولا تصرخ ٧سانتي غرفه العمليات دكتوره البنج لاتسوين بوش حست فيني قربت وايد😢وانا مب مستوعبه لين اللحظه ذي وقولها خليني احاول دام ٧ سانتي رفضت قالت خطوره عليج انت دخلوني بسرعه وبنج نصفي طبعا يدها خفيفه الدكتوره الحمدالله وهديت شوي بدوا في التقصص كانوا ستاف غير ستافي بس الحمدالله بس بسرعه بسرعه ما تاخروا فيني لاني خلاص واصله وهناك دعيت لكم ولكل الناس الي احبهم

جزاك الله خير.. والله سوالفكم بلسم.. الله يرزقنا ساعه اليسر والهون والسلامه والصحه والعافيه ويقومنا واجنتنا بصحه وسلامه وعافيه وستر ويرزقهم تمام الخلق والخُلق ويحفظنا وإياهم وازواجنا واولادنا وبناتنا ويطيل أعمارنا على طاعته.. ويرزق كل من يتمنى الاطفال ياحي ياقيوم بالذريه الصالحه.. ويرفع الوباء عنا وعنكم وعن المسلمين..