تجربتي للحقن المجهري في تركيا " شامل جميع المعلومات"

هلا ياقلبي شلونج
توني كتبت اللي صاير معاي بالتجمع .... سويت التحليل المنزلي وطلع سلبي يا كل الاسامي 😭
وايد خايفه من التحليل يوم السبت حاسه مافي حمل استغفر الله العظيم ما ابي اتشاءم .... اللهم لا اعتراض على قضاءك ..الحمدلله على كل الاحوال...


بس اللي قاهرني المصاريف والوقت وجسمي اللي هلكته ابر ومنشطات واهلي واهله اللي ناطرين الفرحة كل يوم يدقون متى موعد التحليل ومتى راجعين ؟


لما صحينا عشان نتريق والله ماكان لي خلق حتى زوجي ياعمري يحاول يغير مودي يقول عادي يمكن الجهاز خربان يمكن مو دقيق هالتحليل.. ننطر ليوم السبت اللي هو موعد التحليل الهرموني ونتأكد .. وحتى لو ماصار حمل يكون ربي ماقدر الحمدلله على كل حال نحاول ونسعى ونعيد مره اثنين ثلاث وربج كريم ...


هو قال هالكلام من هنا وانا اطيج لج بجي من هنا 😭 ... ياعمري انخرش ما عرف شيسوي عشان يسكتني هههههههه


حتى من زود ماني متضايقه اكلت معجنات وشربت شاي ع اساس انها من الممنوعات هههههههه


الحين قاعده اكتب لج ودموعي اربع اربع ياربي !!!!


يا الله ياكريم لا تخيب رجائي وارزقني الفرحه بالذرية الصالحه انا وكل من يتمنى 🤲

لا ياقلبي لا تعتمدين ع المنزلي
انا فالمره الاولى المنزلي وترني وقررت هالمره اني مااسوي منزلي وسبحان اللي صبرني لي الهرموني
اكثري استغفار ولا تنسين صلاة الليل اسمها صلاة الحاجه صلي ركعتين وادعي بكل مافي قلبج الله بيجبر قلبج ان شاءالله وبيلطف بحالج وينزل عليج السكينه والصبر
توكلي على الله ولا تنهارين وانطري الهرموني وبتفرحين وبتفرحينا معاج ♥️

هلا ياعمري طمنيني عليج وشلون الحمال وياج ربي يتمم عليج ويسهل ولادتج وتفرحين بشوفة ضناج بحضنج ❤

والله ما كنت بسوي واصلا هالمره كنت وايد ماسكه نفسي ولا كنت افكر احلل بس مدري شلي خلاني اتهور واشتري واحلل اصلا كان باقي بس اليوم و باجر والسبت ان شاءالله التحليل ...
اقولج على شي يضحك فجأة كل الاعراض اللي كنت احس فيها خاصة آلام الدورة والشد اسفل البطن حتى بوادر الزكام من سخونه واحتقان وانتفاخ ببطني كل شي كل شششششي اختفى من صحيت اليوم الصبح احس اني خفيفه يعني كأني مو مرجعه اجنه مستغربة والله معقولة كنت اتخيل الاعراض ... ياربي شلي خلاني احلل استغفر الله العظيم كلها يومين وكنت بروح الموعد إلا اللقافه اعييت من يداويها هههههههه
جزاج الله خير على التذكير ياقلبي هاذا انا كل ليلة اصلي صلاة الحاجه وادعي والله سبحانه مجيب الدعاء ان شاءالله بعد ماروح السبت اجي ابشركم وبإذن الله ربي ما راح يخيب رجاي 🤲

الحمد لله من قبل ومن بعد اولاً باب الأمل للان مفتوح مروا علينا بالتجمعات كثيييير ماكان يبين معهم المنزلي نهائياً وهم حوامل .

وثانياً هي اقدار وارزاق الله يكتبها ويقسمها وكلها لحكمة ومافي شي عالفاضي حتى التعب والعمليات والفلوس مو عالفاضي كلها على اجر عظيم ورفعة بإذن الله وكلها سعي انتي تسعينه وابواب تطرقينها عشان بعدين ماتقولين ياليتني جربت كذا وكذا

أهم شيء لو لاسمح الله طلع في الهرموني مافيه اول جملة ترددينها " اللهم اجرني في مصيبتي واخلفني خيراً منها "
في الحديث ما من عبد يصاب بمصيبة فيقول: إنا لله وإنا إليه راجعون، اللهم آجرني في مصيبتي، وأخلف لي خيرًا منها؛ إلا آجره الله في مصيبته، وأخلف له خيرًا منها.

اللي يقولها وقت المصيبة يكون وعد من الله يعوضه ويخلفه خيراً منها ..


وثاني مره لاتعلمون احد انكم مسوين عملية ترى والله لو محد يدري تهون عندك كثييير



أنتم ايش مشكلتكم في الإنجاب بالضبط ؟

هلا كل الاسامي شلونج وشلون بنوتج ربي يحفظها ❤


مشكورة ياقلبي على الكلام الطيب ربي يجزاج خير


ما عندنا مشكله معينه مأخرة الانجاب....ببداية زواجي واللي مر عليه ٩ سنين كان عندي هرمون الحليب مرتفع وكان ارتفاع بسيط يعني فوق المعدل الطبيعي برقمين أوثلاث... والادويه كانت تنزلها بشكل كبير فوقفته واخذت بردقوش ولله الحمد ليومنا هاذا هرمون الحليب مستواه طبيعي .. سويت اشعه صبغيه والحمدلله طلع كله تمام وبعدها بفترة سويت منظار بطن وطلع عندى لحمية وتم ازالتها ... وبعدها كل فتره وفتره نفحص ويطلع كل شي سليم اللهم لك الحمد.. والدكاتره يقولون مافي سبب يمنع الانجاب وعلى هالحال وبالاخير نصحونا بالتلقيح ... جربنا تلقيح صناعي هالكلام قبل تقريبا ٦ سنين وربي ما قدر يصير حمل الحمدلله كل حال.... وهاذي تجربتنا الثانيه اطفال الانابيب ربي يكتب لنا فيه الخير