💙🎉التباشير 6️⃣ لمواليد سبتمبر (9) & اكتوبر (10) 2021🎉💓

ماشاءالله الف الف مبروووك لكل اللي ولدن
بيريم فرحت لك والحمدلله انه جاء بالسلامة
طل الصباح رفيقتي بالانتظار الحمدلله على فرج ربي
قطر الندى وكاجمان الف مبروك ماجبتن
باقي أمل اذا ماني غلطانة الف مبروك ويارب مانسيت احد 💔
وعقبال باقي خوياتنا بالولادة السهلة الميسرة

تاريخ ولادتي ١٠/٩ عدلوه بالقائمة😇

الله يبارك فيك
الشرك الحمدلله بخير الحمدلله الويكند صحصح فينا وعطانا طاقة مع انه بالليل يجوني الزوار بس اهون من ضغط المنصة
وحنا نحبكم 🥺♥️
وان شاءالله ماننقطع عن بعض ماتوقعت انشغل عن الجوال كذا

مناهل الله يتمم لك على خير وتولدين بالسلامة ويجعلها من ايسر ماتكون تفاءلي خير وربي ألطف بعباده
لاتصيرين زيي نقيت على نفسي وكنت ماابي اولد بأغسطس شرهتي كبيرة احسب اولد نص التاسع واخرتها عوشرت والحمدلله الله كاتب لنا الساعة اللي نجيب فيها بس ابن آدم عجول

اكشن ولادتي
طبعًا تذكرون لما قلت اني راجعت الدكتورة يوم الثلاثاء وطلبتها تفحصني كان فاتح واحد سانتي وسوت لي تحريض وسويت تخطيط ماكان عندي طلق المهم قالت اعطيك فرصة ست ايام اذا ماولدتي تجين نعطيك صناعي ..
رجعت البيت ووضعي جدًا طبيعي ماكنت احس بأي طلق نهائي يوم الخميس شربت حليب بزنجبيل وعسل واكلت اناناس المهم على اذان العشاء دخلت ابي اتوضأ الا فيه افراز بسيط ومعاه دم وقعدت امسح الا حسيت فيه شي عيا ينسحب طلعت لغرفتي فوق على طول وقعدت امسح الا افراز ثقيل سحبته عرفت انها السدادة المهم لبست فوطة وصليت وطلعت مع زوجي مشوار ومريت الصيدلية ومن الخوف بسرعة رجعت البيت وقعدت امشي احس ظهري يوجعني المهم على الساعة ١٢ حسيت الفوطة تبللت وعلى الساعة ٢ قلت ابي اصعد غرفتي انام واريح وبدا معاي الطلق خفيف مرة اقل من دقيقة مايطول وبين كل طلقة والثانية ٢٠ دقيقة حاولت انام ماقدرت وصارت المويا تكب علي كل شوي رايحة ومبدلة الفوطة وملابسي الداخلية صليت الفجر ورجعت الا المويا صارت تزيد وطلعت على ملابسي ترددت اروح المستشفى لان مافيني طلق المهم اخذت دش وصحيت زوجي وسويت لي حليب بعسل وحبة سوداء وزنجبيل وعلى المستشفى مشيت بالحديقة لين يشد علي وبعدها دخلت الطوارئ فحصوني فاتح يمكن ٢ سم وركبوا التخطيط الطلق جدا خفيف من الخوف قلت ابي اطلع وارجع لكم قالوا مستحيل المويا تنزل عليك وصعدوني قسم التنويم على الساعة ٨ قالت نبي نعطيك فرصة يمكن يزيد الطلق او يسوون لي ولادة تحفيزية بالطلق الصناعي وعلى الساعة ١٠ قاسته لي فاتح ٤ بس الطلق زي ماهو بارد وحطوا لي الطلق الصناعي زي الخيط فيه مادة محفزة قالت ساعتين واطلعها هنا بدا يحمى الطلق وصرت انتفض برد وبديت اتعب أرق مانمت وجوع المهم على الساعة ١٢ ونص شالت اللي ركبت لي وبدا يزيد الطلق كل خمس دقايق صرت اصيح عليهم ابي ابرة الظهر رفضت تقول ماتنفع لانها راح تطول مدة الولادة وتضعف مفعول المادة المحفزة هنا استسلمت ووكلت امري لله وادعي طول الوقت فحصتني فاتح ٨ سم ودخلوني كشك الولادة هنا بدت المعاناة الثانية كل مايجي طلق يقولون ادفعي صرت ادفع ع الخفيف مافيني حيل وركبوا لي اكسجين مسكن المهم تجمعوا علي وصارن يضغطن على بطني ويصرخن علي البيبي بدا يتعب خفت وصرت احاول ادفع بس مو قادرة وعلى الساعة ٢ طلع حبيبي على الدنيا هنا انا زي المغمى علي شفته وهو يصرخ وبعدها زي الغيبوبة وصاروا يخيطون وولدي ودوه الحضانة ياروحي راسه يخرع مضغوط على فوق وفيه زي الكدمة من قو الضغط عليه وقت الولادة والحمدلله كله يهونه بشوفة حبيبي الله يهون عليكن ويكتب لكن التيسير ❤️❤️