بقولكم عن اللي صار معاي بالرضاعه عشان تستفيدون .
بكل حملاتي اللي قبل الطبيعي والقيصري كان يطلع لي حليب على طول ومن ثاني يوم يتحجر صدري واشفط عشان ارتاح .
هالمره سبحان الله صار لي شي مختلف تماما ، اول ما دخلت المستشفى وانا انبّه عليهم اني ابي بس رضاعه طبيعيه بالاصح ازعجتهم ، لما ولدت وحطوني بالافاقه يستنون يفك البنج كان قلبي متواكل على ولدي ابي اروح الغرفه وارضعه . لمن رحت الغرفه وجابوه لي ارضعه ضغطت الممرضه على صدري وطلع منه حليب وحاولت ارضعه بس ما كان يمسك صدري ولاحظت يطلع من فمه زي السعابيل كانها بلغم مع فقاعات . ضاق صدري انه مارضع مني الا شوي مره وكله نايم وبعدين بلغوني انهم عطوه صناعي اول ما انولد لان السكر عنده كان منخفض فتوقعت انه كان شبعان ومكتفي . ثاني يوم طلبت اخصائية الرضاعه الطبيعه وجتني وسبحان الله وانا اشتكي لها الا ولدي وصخ براز كثير اسود فقالت الاخصائيه ولدك شكله شارب مويه كثيره من بطنك لهذا السبب الفقاعات من فمه والبراز الاسود ( طبعا ذكرت انه كان دايم في بطني احس بالخازوقه وربطتها مع كلام الاخصائيه) المهم بعدها سبحان الله على طول مسك صدري وقام يرضع وانبسطت وارتحت . بعدين لاحظت انه يمسك صدري وبعدها ب١٠ دقايق يصيح وجلسنا على هالحال ٥ ساعات لين جت ممرضه وشافت صدري قالت لي حليبك شوي . ثالث يوم طلبت الاخصائيه وقالت طبيعي حليبك شوي هذا اللي فيك الحين ( اللبا) والحليب يتكون من ٣ الى ٥ ايام . قالت لي لا تتوترين عشان يجيك الحليب لان النفسيه لها دور وبديت اشرب شاي الادرار وسبحان الله من امس واليوم ثقل صدري وتحجر وصار يكفيه اللهم لك الحمد .
الخلاصه من اني اسرد لكم تجربتي هو ان الصبر يا بنات على الرضاعه لا تستعجلون ابد عطو نفسكم فرصه ، اليومين الاوليين جاني شعور انه مافيني حليب ولا راح يطلع لي بس صبرت واصريت اني اخليه يمسك صدري طول الوقت والحمدالله صار الحليب يدر
💙🎉التباشير 6️⃣ لمواليد سبتمبر (9) & اكتوبر (10) 2021🎉💓
متابعة النقاش، صفحة 138