طفلي في عمر ٨ شهور

احب العاب التركيز و الذكاء تلقينهم بالمكاتب و بعض محلات الألعاب التعليمية .

تمام بجربها ان شاء الله يعطيك العافية على مرورك الجميل 🌹

تقريبا طفلك بعمر بنتي بس انها اكبر بشهر عمرها ٩ شهور . اديها وجبات بالشوفان مره مفيد . يعني تطبخي شوفان وبعدين تهرسي معاه موزة ااو تطبخي الشوفان وتقطعي معاه تفاحة وتخليها تطبخ مع الشوفان واخر شي اطحنيهم ولو حابة ضيفي رشة قرفة تعطي طعم وريحة حلوة . برضو خضار اسلقها زي بطاطس وجزر وكوسا اسلقهم مع بعض واطحنهم واحط رشة بسيطة كمون وتقدري كمان تضيفي دجاج مسلوق مع الخضار وتطحنيها وقتها الدكتورة قالت من عمر ٧ شهور عادي تدخلي لها بالاكل دجاج ولحم كمان اوكلها من اكل الببيت اذا ينفع زي مثلا لمن اسوي شوربة شوفان كويكر مع دجاج احط لها شوي منها وطبعا اطحنها او اذا سويت ايدام بطاطس او ايدام كوسا اهرس لها شوي منها يعني تقدري تنوعي بالخضار وتسلقيها برضو بنتي اعطيها زبادي بس تاكدي لو يناسب طفلك او لا ولو تبحثي بالتيك توك او الانستا بتلاقي حسابات كثير ينزلوا وجبات للرضع ع حسب سنهم بصراحة استفدت كثير منهم وبالنسبة للالعاب بصراحة زيك ماعرفت ولكن حسيت بنتي تجذبها الالعاب اللي فيها اصوات او موسيقى او تطلع الوان وناوية اجيب لها العاب تعليمية زي المكعبات او برضو بوكس وفيه كور داخله وتصير هيا تطلع الكورة وتدخلها جوا البوكس . وبس اعرف اني طولت بالكلام ولكن حبيت افيدك باللي اعرفه

نسيت اقولك بالنسبة للقرفة تاكدي انو طفلك ماعنده حساسية منها وحتى الزبادي فيه اطفال مايناسبهم

يسعد قلبك مره افديتيني الله يخليها لك بنتك ♥️♥️