💙🎉التباشير 8️⃣ لمواليد سبتمبر (9) & اكتوبر (10) 2021🎉💓

نفس وزن ولدي 😍بس طوله كان ٥٢
ياحلوهم نتف

بعد اسبوع من تطلعين من المستشفى

ماشاء الله ام صهيب الحمدالله على سلامتك ومبروك ماجاك 🤍🤍

أحداث ولادتي:
( يحدثُ أن ننتظر الألم إن كانت تترصد لنا خلفه بابه فرحةٌ عظيمة )
بدأت الأحداث عند حوالي الساعة ٩ م في يوم الثلاثاء ٣/٦ - ١٠/١٢ يعني قبل الموعد اللي أعطتني الدكتورة لزيارة الطوارئ في حال ما ولدت؛ يشوفون وضعي إمايولدوني أو يعطوني فرصة كم يوم.
ما حسيت بشيء غريب ومختلف بداية اليوم، إلا آلام خفيفة وأشبه بآلام الدورة من الآلام المتباعدة اللي في الأيام السابقة، وقلت لزوجي استانس😅
قررت بذاك اليوم أزور أهلي فجأة، رغم إني ما كنت أبي أزورهم إلا بعد ولادتي؛ لأني أحس إن كل زيارة لي بكرشتي بدون طفلي كانت تسبب لهم إحباط خاصة أخواني🌚😂
المهم كانت جدتي موجودة عندنا وتتنبأ بأني ما راح أولد لين أجي أشوفها وهالشيء وافق إحساس داخلي عندي بأن الطلق راح يبداني من بيت أهلي لذلك تحمست للزيارة، وبس وصلت لهم قعدوا يسألوني بحماس! هاه بشري حسيتِ بشيء؟ قلت لهم شيء بسيط لا يذكر!
بعدين أختي الصغيرة قالت بأزين لك سلطة بالمكونات اللي تحبين< حبيبتي هي مدلعتني من أول الحمل 🥰 زينت لي سلطة ( طماطم - شمندر - أڤوكادو - فلفل حار 🌶🔥 ) مع تمر وقشطة وجبن ڤيتا وعنب، حطتهم لي بصندوق الأكل اللي كنت أجهز فيه وجباتها للمدرسة بالابتدائي♥️


أكلت الوجبة بتلذذ لين آخر شيء طحنت قطعة فلفل حاااارة نزلت لبطني بشكل حارق 😰🔥 وشربت عليها لبن يطفي اللهب! لما قلتلأخواني وهم حولي أحس بألم تحمسوا وأخوي الصغير يقول تكفين كلي فلفلة ثانية وأجيب لك لبن ثاني < مسكينة أنا يتمنون لي الألم لكنما عليه 😓😂
طبعًا ما زدت فلفل، وشوي بدأ معي ألم في ظهري وبطني وصفته لأمي قالت طلق، خفت وصرت أرجف 🥶 ودخلت بحالة إنكار للواقع، قلت لها أكيد من الفلفل، قالت مب أول مرة تأكلينه! وفعلًا أنا متعودة على الحار لذلك ما راح يألمني لكنه حفز الطلق عندي، دقيت على زوجي ولما وصل خبرته إني أكلت فلفل ومن بعده أحس بألم يمكن يكون طلق، هو قال لا أكيد من الفلفل😂! < نفس ردة فعلي بالبداية!
المهم رحت لشقتي عشان أتجهز للمستشفى، طلعت شنط المستشفى وعلب الأناناس والتمر اللي مجهزتهم من قبل وقارورة ماء زمزم قارية عليها ورد الولادة، وسويت لي كوب شاي ورق التوت + سويت بعض التمارين اللي كنت أسويها بالفترة الأخيرة ( قرفصاء - طلوع الدرجونزوله - تمارين الكرة ) وسلطت ماء دافي على ظهري دقائق، وما رحت للمستشفى إلا بعد ٥ ساعات لما شفت إفراز دموي، صحيت زوجي ومشينا كانت الساعة ٢ الليل.


طبعًا الطلق كان متقارب من البداية وألمه متزايد مب زي المعلومة اللي عندي إنه يكون متباعد في المرحلة الأولى من المخاض 😰 حتىالبرنامج اللي محملته يحسب التقلصات عشان أعرف الوقت المناسب أروح للمستشفى احتار مع طلقي!
لما وصلنا الطوارئ سوت لي فحص قالت فاتح ٣ سم، قلت عادي أطلع؟ قالت إيه يمديك ساعتين امشي وكلي تمر وخذي لك شاور دافئ بسلو نزل عليك دم أو موية تعالي! ما كان يمدي نرجع شقتنا والجو برا كان بارد نوعًا ما، فاستأجر زوجي شقة مقابل المستشفى، استرحنا فيها شوي ومشيت وسويت اللي أقدر عليه لتخفيف الألم، لين شفت إفرازات دموية كثيرة فرجعت لهم قبل تكمل الساعتين على ٤:١٥ سوت لي فحص لقته فاتح ٥ سم وما كانوا يحولون لقسم الولادة إلا اللي الرحم فاتح من ٦ سم وفوق، بحجة إن ما عندهم أسرة في قسم الولادة 😨هنا أنا توترت لدرجة ما عاد صرت أحس بطلق وشايلة هم وين بأولد، شوي فكت علي الموية وأنا بكراسي الانتظار برا، ارتعبت وبكيت وزوجياللي كان محافظ على هدوءه خاف وقال يلا بنروح مستشفى خاص! بس الوقت ما كان في صالحنا أبدًا! طبعًا ليش بكيت؟ على بالي إنهشيء خطير نزول الماء، وإني قربت أولد وأنا برا وما فيه سرير 😓 تواصلت مع قريبتي اللي تشتغل دكتورة نساء وتوليد في المستشفىفكانت تهديني وتأكد لي إن فيه غرف فاضية وبيستقبلوني، وفعلًا دخلت للطوارئ مرة ثانية سووا لي تخطيط بعدين فحص مرة ثالثة ولقوه ٦سم أو ٧ وعلى طول طلعوني لغرفة الولادة على الصبح الساعة ٦
وكانوا كل ساعة يسوون فحص، الساعة ٨ كان الرحم فاتح ٨ والطلق كان حامي جدًّا من ساعتين! بس كنت أقدر أتعامل معه بفضل الله ثم تمارين التنفس كانت تخفف الألم بشكل عجيب سبحان الله، وكمان كنت أستشعر ضعفي وافتقاري إلى الله وأردد دعاء الكرب وأحوقل وادعي.
نسيت أقول إنه مع الطلق والفحص حبيبي تبرز في بطني فخفت يتضرر لكن كنت أتذكر كرم الله وأدعيتي، والرؤى اللي شفتها تطمئني إنه بيولد بصحة وعافية فتهدأ مخاوفي، وبعد تذكرت كلام بسبس وهرهور هنا إن اثنين من أطفالها تبرزوا وما ضرهم الحمد لله، بس برضو كنت مع كل طلق أتابع جهاز التخطيط وأحاول آخذ نفس عميق عشان ما ينقص علي وعليه الأوكسجين.
الساعة ٩ جت تفحصني القابلة الهندية وهي اللي أعتبرها النقطة السوداء في ولادتي يدها حارة وف***ا مؤلم، قالت لسى الرحم ٨ لـ ٩وراحت! < قياسها كان غلط، صرت بالغرفة لحالي تقريًبا نص ساعة والطلق لا يحتمل من لما فتح ٨ وهو حامي ومتقارب < قريبتي تقول لي بعدين الظاهر لو معطينك طلق صناعي أهون وإن الأخصائية تتابع التخطيط من برا وتقول لقريبتي أعطيتيها طلق صناعي؟ طلقها مرة قوي! قالت لا بس هي مطوفة والظاهر أكلت أناناس وشربت شيء، قالت لو تطوف ٧٠ سنة قولي لها ما عاد تأكل أناناس😰
أنا ضعفت قوتي مع قوة النوم اللي فيني، قربت أكمل ٢٤ ساعة صاحية حتى التنفس ما صرت أعرف آخذه وأحس بيغمى علي بعدين أتذكر إن الأسباب بيد مسببها (الله ) فأدعي: اللهم لا حول ولا قوة لي إلا بك، وألقى أثرها يا رب لك الحمد🥺 طول الوقت كنت أصبر نفسي بالدعاء والتنفس والاسترخاء (أصعب شيء ) وكمان أتذكر إن هالألم ساعة أو ساعتين وينتهي بعدين أشوف ولدي اللي كنت أعد الأيام عشان تقر عيني فيه، وكل صيحة مولود في القسم كانت تحفزني😭
كانت أصعب اللحظات لما حسيت بالدفع ولا أحد حولي، المستشفى على إن كادره ممتاز إلا إنهم قليل والحالات كثير، لما جت الدكتورة اللي بتولدني لقته فاتح ١٠ سم مب زي كلام الهندية قبل نص ساعة إنه ٨ وبدأت تقول لي إذا حسيتِ بالطلق خذي نفس عميييق واكتمي بعدين ادفعي ورأسك مسنود على صدرك، مرة كانت فاهمة وتوجيهاتها واضحة ونافعة رغم إني قرأت طريقة الدفع إلا إني لحظتها نسيت وهي ذكرتني، وبعد طمنتني إنها ما راح تقص العجان بدون حاجة، ومدري كم دفعت بس الحمد لله ما طولت! كنت شاطرة ماشاء الله على كلام الدكتورة😂 وفي يوم الأربعاء ٣/٧ الساعة ١٠:٢١ حبيبي طلع للدنيا وانحط علي كانت اللحظة ذي هي اللحظة الجميلة بين لحظات الألم، وهي الحلم وسط الكابوس، يا رب لك الحمد😭♥️♥️♥️♥️ يا رب ترزق كل وحدة تتمنى هاللحظة:" طلعوه وصاح وحطوه علي شوي وجت الهندية بتقص الحبل السري وقلت لها لا شوي لا تقصين! قالت الدكتورة ماعليك بنخليه دقيقة < ترك الحبل السري دقيقة على الأقل مفيد لانتقال الحديد من الأم للطفل وتقليل نسبة إصابته بفقر الدم.
بعدها أخذوه جنبي في الغرفة، وشفطوا منه البراز ونظفوه، وكشف عليه استشاري الأطفال لقى صحته الحمد لله ممتازة فخلوه على سريرقريب مني، أما أنا فالحمد لله ما احتجت قص، بس صار فيه تمزقات طبيعية وسطحية خاطتهم لي بس طولت الخياطة تقريبًا ساعة وبعدها ساعة ثانية حاطين كمادة باردة والمفروض ما أتحرك عشان يرجعون يشيكون على الخياطة، وطول هالوقت أناظر ولدي مب قادرة أرضعه ولاأدفيه، لفوه ببطانيته لف أي كلام ودخله برد 💔
بس الحمد لله لما طلعنا للتنويم بعد الفحص الأخير رضعته وارتحت، وجت أمي الله يحفظها ويدخلها الجنة كمرافقة ولبسته زين والحمد لله الذيبنعمته تتم الصالحات.
اليوم سابع طفلي، والحمد لله أرضعه رضاعة طبيعية يا رب نستمر فيها وما نضطر للصناعي أبدًا.
ذي أحداث ولادتي، فصلتها لأني أحس الجمال دائمًا يكون في التفاصيل ♥️
عقبال اللي ما ولدوا يولدون ولادة طبيعية سهلة ميسّرة.

طلعتي من الشر 🥰💓💓