🥁🤱التباشير 6️⃣ لموآليد نوفمبر 11 ديسمبر 12🤱🍼 2021

بنات انا هاليومين صرت احس بزيادة الم الظهر والتحجر زاد بس مو منتظم يجي ويروح والم بالحوض كنه يتفكك واليوم زاد عندي البول مااجلس ربع ساعه مااقدر اخاف يكون بداية طلق بكره موعدي باسالها

قصة ولاتي
كعادتي في كل ولاداتي السابقة ما يجيني طلق طبيعي .. ودايما أولد بالطلق الصناعي

رحت صباح الأحد الموافق 14 نوفمبر 2021 الساعة 7:30am المستشفى عندي موعد دخول

دخلت على قسم الولادة .. طبعا أنا أروح صايمة .. ومصليه الاستخارة (قبل أنام اليوم الي قبل شربت حليب معاه قرفة وزنجبيل وزعفران)
أعطوني ملابس .. غيرت ملابسي واتجهزت ركبولي التخطيط ونبض البيبي و ركبولي الإبرة الوريدية وسحبوا الدم للتحاليل وما ركبو فيها ولا محلول .. وكشفوا عليا الرحم فاتح (1سم) وقالت الطبيبة المناوبة أنت مو بكرية وهذا معناها مقفل :(

على الساعة 9:45am أعطوني أول تحميلتين للطلق الصناعي وتليين عنق الرحم وقالو ساعتين لا تتحركي .. بدأت التقلصات خفيفة .. قسم الولادة كان فاضي سبحان الله رغم أنه ما ركبولي جلوكوز كالمعتاد ورغم أني صايمة إلا أني رايحة جاية على الحمام بشكل غريب

الساعة 2:30pm كشفوا ثاني برضة مقفل الرحم (1سم) وحطو تحميلتن طلق صناعي :(

الساعة 6:00pm كشفوا ثاني برضه مقفل بس بدأت التقلصات تقوى وبدأت تولم

بعد ساعة زاد الإلم وصار تقريبا يجي متقارب وبدأت (أشم وردة أطفي شمعة) وجاء الدكتور وطلبت مسكن قال أعطيك إبرة بس راح تدروخ ما ينفع تتحركي ولا تقومي من السرير قلت مو مشكلة بس تسكن الآلم

وأخدتها .. وفعلا ودتني عالم ثاني مدروخة مرة أنام بنمط الإغماءة حاسة بالي حولي ومو حاسة.. بس آلام الطلق ما خفت ولا نقطة إلى صار أنام (بفعل المسكن) دقيقة وأقوم على آلم الطلق 90 ثانية ,بس يسكت أرجع أنام .. طبعا مدروخة ومو بوعيي وبس يبدأ الطلق أتوجع اتجمع عليا ألم الطلق القوي عمري ما حسيت بيه قبل كذا بذي القوه ( وراح أقول السبب بعدين ) مع دوخة النوم وبالرغم من برودة الغرفة فجاه جاني حر مو طبيعي معايا أمي وأختي بالورق يهوني وأنا مرة مدروخة أنسدح أنام دقيقة وأقوم من الآلم متكية على صدر أمي _ الله يجزاها خير فجعتها مسكينة _ أتوجع وأون
ما أعرف قد أي جلست في هذا الوضع جات الدكتورة تكشف ما خليتها قلت لها أبغا إبرة الظهر أنا عارفة أني لسا مطوله ولا وصل 3 سم (عشان يعطوني إبرة الظهرحسب كلام الطبيب)
وبعدها بشوي قلت لأختي قولي لزوجي يكلم الدكتور مو قادرة خلاص أبغا الإبرة الأن ولا أقدر استنا

كلم زوجي الدكتور وجو ينقلوني على غرفة الولادة وأنا بين ألم الطلق الي ما وقف والدوخة الي عندي حسيت أني سربت بول (الله يكرمكم ) وقرفانة من نفسي بس وأنا اقوم لمحت دم تحتي ولما وقفت حسيت أني كملت البول ( بس الظاهر كان موية الجنين ) ومرة قرفانة أقول لهم حطو شي تحتي لأني في بالي (بول ) الله يكرمكم

رحت غرفة الولادة وجاني دكتور التخدير ( وبصراحة كان أسلوبه زي الزفت ونفسية مرة ) طبعا متخيلين الآلم والحال إلى أنا فيه ويادوب جلست على طرف السرير يقول كذا ما أقدر اركبها قالت له اختي بس توقف الطلقة وتعدل نفسها يقول راح تجي طلقة ثانية .. ويسألني وأنا اقول له ركبها بس وأعمل لك إلى تبغاه وجاب لي الأيباد أوقع وأنا مو قادرة يقول تعليمات المستشفى وقامت أختي أخذت الأيباد منه ووقعت بدالي وبدأ يتعقم على مهلة وأنا في حاله وركب الإبرة وطبعا لما يجي الطلق أقول له وقف وهو يتأفف (الله يسامحه) وبعد ما ركبها قال كذا بدري ما راح تخدرك وقت الولادة وأنا أقول وقتها وخير .. وبعد ما حقن المادة قلت له كم إلين يبدأ مفعولها قال 10 دقائق وأعتقد أقل من كذا وبدأ المفعول بس ما اتخدرت رجلي زي كل مرة كنت حاسة برجلي بس أقول الحمد لله سكت الطلق
هنا أمي واختي خرجوا وجاء زوجي
وعلى طول جات الدكتورة تكشف (وهذا الأهم ما أشعر بالكشف) هنا قالت 9 سم .. أنا قلت أيش قالت مفتوح 9 سم وكلمو الدكتور
جاء الدكتور كشف قال خلاص ولادة 10 سم وقتها كانت الساعة 11:00pm( الحمد لله ) وصار كل شوية يجي مع الممرضة ويخلوني أدفع شوية (الظاهر البيبي كان لسا مرتفع ) ويروح ويرجع بعد ربع ساعة

الساعة الأن 12:00am من صباح الإثنين الموافق 15 نوفمبر 2021 جاء الدكتور وقال أش رأيك نبدأ قلت يالله على بركة الله وأنا ترا ما زالت إبرة المسكن الأولى لاعبة فيني أنام وأصحى
جهزوا السرير وبدأت الدفع ربع ساعة أو أقل وشرفت بنتي الحلوة حطوها على صدري والدكتور خلى أبوها يقص الحبل السري وأخذوها الطبيبات يفحصوها
والحمد لله جلسوني في غرفة الولادة ساعتين فكو الإبرة حقت الظهر وجاني برد وصرت انتفض وهذا تأثير عادي من إبرة الظهر جابو لي زي الدفاية تحت الغطاء دفتني الحمد لله وكان عندي عثيان خفيف استمر ليوم تقريبا بعد الولادة
وقت ما طلعوني الغرفة جاو قسم التنويم غيرولي ملابسي الي في الولادة ولبسوني ملابس نظيفة وطلعوني غرفتي كذا على الساعة 2:00am
التمريض والطبيبات المناوبات كانو كلهم في غاية الحنية الحمد لله بس دكتور التخدير الي كان شوية الله يهديه

طبعا الحديد الي ناقص خلاهم مرتين يعطوني إبر حديد رغم أنه كان عندي 10 إلى التاسع نزل فجأة إلى 9.1
فمهم جدا أنك تسمعي كلام الطبيب إذا قال إبر أو شي خاصة مع نزيف الولادة لا قدر الله ممكن يكون خطير أو على الأقل تحتاجي نقل دم لا قدر الله
هذه قصة ولادتي

ملاحظات مهمة :)
1- قلت لكم أول مرة أحس بهذا الألم كل ولاداتي السابقة أخذ الإبرة قبل يحمى الطلق ولو لاحظتوا سبحان الله الطلق لما زاد شكله كان يفتح الرحم وأنا مو متوقعة وأمكن لو خليت الدكتورة تكشف وكان الرحم فاتح فوق 6سم ما كان أعطوني الإبرة وهذا الشي حمدت الله عليه لان بمجرد ما ركبوها وقاست كان فاتح 9 سم
2- هذي رابع ولادة بطلق صناعي وبإبرة الظهر وفي نفس المستشفى ( ولادتين مع نفس الدكتورة وولادتين مع نفس الدكتور) والله كل ولادة لها أكشنها الخاص ولا في تشابه بينهم إلا في الدخول والبدء بطلق صناعي لهذا لا تتوتروا قولوا يالله يا مسهل وصلوا الاستخارة ترا الولادة الطبيعية أولا وأخيرا من الله الفريق الطبي فقط يعاون
3- الحمد لله الي سخر لنا العلاج والمسكنات إبرة الظهر أنا من مؤيديها قبل ما أذوق إلم الطلق الحقيقي وها أنا ذقته .. حبيباتي إذا تقدري أرحمي نفسك تراها نعمة من الله ورحمة حقيقي رحمة

وختاماً .. سامحوني إذا كانت قصتي طويلة أو فيها مقاطع مؤلمة خصوصا يا البكريات .. بس لاحظوا أننا نكتبها كذكريات جميلة ساعات صعبة وبسرعة تتحول لأجمل الذكريات ونقدر نرجع نعيدها ثاني وثالث لأنها فطرة من الله فطرنا عليها قال تعالى (المال والبنون زينة الحياة الدنيا)
أطياف ماض
الجمعة 19 نوفمبر 2021

في الاسبوع 37بدايته

لي ٣ايام امشي ابي الراس ينزل 🥲

الفراشه انا نفس وضعك