هل قرار الطلاق في حالتي الانسب ساعدوني

السلام عليكم ورحمة الله وبركاته اخواتي ، ارجوكم محتاجه مساعدتكم وآراء ناس بموضوعية بعيد عن عاطفة الاهل ااو عاطفتي انا اللي عايشه في دوامة من الهم والتفكير، انا متزوجة من ٢٠ سنة ، ادري انها مدة طويلة ، وعندي بنات واولاد اكبرهم عمرها ١٨ واصغرهم سنتين ، مشكلتي زوجي انسان زعول بشكل لا يطاق يعني لما يخاصمني يخاصم بالشهور الطويلة وقد يمتد الخصام لقريب السنة كاملة ،، متخيلين!!!
هو موفر لي بيت وعاملتين في البيت يخدموني ومعطني استخدم سيارة خاصة لي، لكن مشكلته لما يخاصمني يعتبرني وكأني ميته ولا كأني موجوده ف الحياة حتى عيني ما تجي ف عينه ولا بيننا حتى كلمة وحدة لمدة شهووور طويلة ، اذا جلسنا شهر ما خاصمني اعتبرها نعمه كبيرة ويرجع يخاصمني ٣ شهور او شهرين او ٤ شهور او ٦ شهور ومرات اكثر
حتى وانا حامل ، كرهت حياتي وعيشتي معه ما عاد قادره اتحمل ، وهو حاليا مخاصمني من شهر يوليو (٧ ) الى هذه اللحظه، واخواني خلاص تعبوا معه ، وموافقين اني اتطلق لانه ما هي عيشه هذي
مع العلم انه موه بس انا اللي يعاملني كذا ، حتى مخاصم ولد عمه وولد خالته حاليا لمدة ٨ سنوات ، وخاصم اخته بالشهور مع انها انسانه في قمة الاخلاق والاحترام معه، وخاصم ولدي اللي هو ولده الكبير لمدةشهر واكثر ، وهذا طبعه مع اي خلاف مع اي احد انه يخاصم وما عنده مشكلة في طول المدة
انا علاقتي مع امه واهله ولله الحمد علاقه ممتازه وامه انسانه تخاف ربها ومصليه ومسميه وتعاملني زي بناتها
لكن ما لها اي سلطه عليه لانه ولدها الكبير وعنيد ما يسمع لاحد وما يحب احد يحسسه انه غلطان ابد وهي تقول اخاف اكلمه ويعاند معك اكثر
وانا حاليا خلاص تعبت وكنت احاول احافظ على استقرار بيتي وعدم تشتيت اولادي لكن خلاص طفح الكيل
ارجوكم هل تعتقدون انه قرار الطلاق صحيح؟ خايفه اتخذ هالقرار ساعدوني ارجوكم يا اهل الخبرة