زوجي يضربني
السلام عليكم بنات ، انا متزوجة وعندي ولد عمره ٣ سنين ومشكلتي هي مثل ماهي مبينة من العنوان زوجي انسان عصبي مع اني احاول قد ما اقدر اني ما اعصبه واسوي له كل اللي يبغاه انا ما اشتغل واسويله شغل البيت كله من طبخ وغسيل وكوي ثيابه وملابسه وكل شيء بس ما يبين بعينه اذا جاء يطلع ولقى ثوبه مو جاهز ولا شماغه مو مكوي يا ويلي يا سواد ليلي يسويها قضية وانا تحملت كثير بس اخر مرة من العصبية رديت عليه بعد ما قال لي يا حمارة قلت له انت الحمار لكنه ضربني وجلدني بالعقال ومسكني من شعري وكفوف و بعد ما طلع اخذت اغراضي واغراض ولدي ورحت بيت اهلي ودايم اشتكي لأمي وامي من حريم اول اللي عندها الاهانات والضرب احسن من الطلاق وابوي رجال كبير وعندي اثنين اخوان الاول ما منه فايدة اقوله زوجي يضربني يقول انا مالي دخل فمشاكلكم العائلية والثاني تدخل مرة بالكلام لكن زوجي تضارب معه وزوجي غلب اخوي عشان زوجي اضخم واقوى منه اخوي هذا صار ما عاد يتدخل عشان ما ينحرج معي مرة ثانية مع اني دافعت عنه وبينت له انه شكثر كبر بعيني بس هو يظن اني انا استحقره بسبب انه انضرب من زوجي ، حتى بعد هالسالفة قلت له مرة يوم ضربني ان بعلم اخواني يتفاهمون معه يقول اخوانك رخوم لو فيهم خير ما سكتوا طول هالفتره ، محد ساعدني مرة الا ام زوجي الله يخليها ويطول بعمرها هزأته قدامي بس لما رجعنا البيت طلع حرته فيني حتى اخته مرة تدخلت وقالت له لا تضربها عشان ما كوت لبس او تأخرت في شغل البيت تراها انسانه موب ماكينه تشتغل ٢٤ ساعة ، المهم انا راكب راسي من اخر مرك ضربني فيها الا اتطلق وامي وابوي رافضين وانا قلت لهم راح ارفع عليه قضية طلاق لأني ما اقدر استحمل اكثر ، للعلم هو لما تقدم لي انا كنت عارفه انه متطلق من زوجته الاولى وكنت اظن ان سبب طلاقهم هو مجرد انهم ما اتفقوا مع بعض بس بعدين عقب كم شهر من الزواج اكتشفت انه كان يضربها حتى وهي حامل بولده وانفصلت هي عنه وبعد ما ولدت طلقها ، الحين انا هلي معارضيني وانا ابي اتطلق لأني زهقت وهو للامانه اعتذر وتأسف في اخر زيارة لبيتنا حتى يرسل رسايل بس انا ما صدقته لأن سواها مرتين من قبل يضربني ولما اروح بيت اهلي يجلس يعتذر