الفتنه اشد من القتل …..

السلام عليكم صباح الخير شلونكم بنات


انا عندي هم كاتم على صدري وبس ابكي منه
ونفسيتي دمااار واحس ما عندي احد يساعدني


انا تخرجت من الجامعه قبل ٣ سنوات
وسبحان الله انكتب لي اني انخطب بعدها بفتره قصيره
بس ربي ما كتب انه من نصيبي ومشت الدنيا


بعدها صارت لي مشاكل بعد الخطبه الي ما تمت
صارت امي تقول للقرابينا انه ما صار نصيب وكذا
المشكله مو هنا المشكله
ان فيه وحده قريبه ما كنت ادري ذاك الوقت عنها وعن كلامها
طلعت مسببه فتنه بيني وبين خواتي
طلعت تسوي مقارنه بيني الي خطبني وازواج خواتي
طبعا خواتي كلهن متزوجات الا انا
وخواتي ببدايه ما كانن مصدقات كلامها
لين صارت تستدرجني قدام خواتي
عرفتوا الي تحشر بكلام غصب
تمسكني بينهن تقول زوج فلانه فيه وفيه وفيه ما شاء الله
واكون ساكته انا فجاءه تقول ليه ما قلتي ما شاء الله
لو ليه تضحكين على زوجها عرفت الي تبي مشكله تصير
المهم بعدها عرفتها وعرفت نوايها وصرت اتحاشها ما اقابلها ولا شي
لين شافتني كذا قالت خلاص نحول للتجسس
صارت تتجسس علي تجسس يا بنات لدرجه لو انام ما ارد عليها قالت ايه زعلانه من كلامي ايه حسدت فلانه بزوجها كذا
واذا كلمت احد تحط اذنها على الباب وتتسمع انا شقول
هنا بدينا بفتنه الاكبر
عرفت انها تروح تقول لخواتي كلام غلط تطلع نفسها بريئه وانا المذنبه
لدرجه مره من مرات زل لسانها وكذبت علي قدامي
فضحها ربي وصارت تحاول تصرف
بعدها صارت تراقب الرجال وتراقب امي
وصارت تحط مقارنات بيني وبينهن وانا ما طلبت منها
لين وصلت بخواتي للعداوه خلاص
بعدها صاروا اخواتي فاهمات اني انا اتمنى ان عياليهن يتاذون او زوجها يصير فيه شي
تمام فصاروا اي احد يخطبني يتهاوشون معي ومع امي وارفضوه ما نبيه تعرفون التخبيب هو بذاته
لدرجه سمعت اكبر وحده فيهن تقول اصلن اذا جاء احد يخطب
بقول ماهو مناسب واطلع اي سبب للرفض
انخطبت ٥ مرات خطب فاشله وكلها تخبيب منهن
متخيلين كمية الحقد والكره الي زرعتها هي بقلبوهن
االحين صارت العدواة في اشدها لدرجه
تاخد بنتها وانا العبها او اضحكها وتروح تعطيني ظهرها
او اذا جاء ولدها يلعب معي تجي تركض تناظر فيه ابد تقولين طاح من عماره ماهو بس جاء وقف عندي
حتي اذا ضحك ولدها لي اخذته مني على طول
انا شفت الحركات هذي انسحبت تماما ولا عطيت رد فعل
حسيتها اوفر شويا وكبرت عقلي
الحين صاروا يرمون علي كلام مثلي الشوك
لدرجه يقولون اني متاخره بزواج وبكبر
واني شينه مو حلوه
وانه من بيرضى بوحده مثلي
حتي فيني ضعف بصر واذا بغيت افحص عشان النظاره
يقولون لي من بيجيك يخطبك وانتي ونظاراتك شكلك مو حلو
والكلمه الي وجعتني باريه
معناها للي ما فهموا مثل السلعه الي تقعد على الرف محد يشتريها
لين تغبر
مع اني حسنت علاقتي بربي واصلي واقراء قران كثير
احاول اتقرب لله ان يرزقني بزواج من غير لا حول ولا قوه مني
ويبدل حالي لاحسن حال
عمري ٢٧ سنه احس قطار الزواج مشى وراح
وانجرح اذا شفت وحده تخبي عني حملها عشان ما احسدها
ترا صارت خواتي كلهم خبوا عني حملهن واذا ولدوا
ما يخلوني اشيله او المسه
حتي لو حاولت قالوا عني ايه مسويه نفسها عاديه وهي تتمنى الضنى الحسوده
يعني ما تعرفون الي بقلبي ولا نيتي لا تحكمين علي ابد
ادعوا لي ربي يفرج همي ويألف بين قلوبنا ويصلح ذات بيننا ويهدينا سبل السلام ويخرجنا من الظلمات الى النور