إياك ان تشجع او تشجعي ابنتك على عدم الزواج

واحد من معارفنا له فتره يخطب ويرفضونه لانه يشترط ان البنت ما تتوظف وتتفرغ للبيت رغم انهم غير موظفات
شوفي حتى الغير موظفات يرفضون ان احد يساومهم في الوظيفه اللي هي حق من حقوقهم حتى لو انهم لسه ما يملكونها ويمكن حتى ما يتوظفون بعد الزواج لكن مسألة سلب الحقوق مخيفه
ومشكلة البعض انهم يبون يسقطون ظروف جيلهم وجيل امهاتهم على جيلنا الحالي اللي بينهم فرق شاسع في كل شي
وبس يفترض الواحد يسأل نفسه ليش البنات صارو يرفضون حرمانهم من التعليم والوظيفه ؟
هذا الرفض ماجاء من فراغ على مر السنوات وهم يشوفون تجارب السابقين من العمات والخالات والامهات وكيف ظروفهم صعبه وحياتهم حرمان وعراقيل على ايادي الرجال والنتيجه ان هذا الجيل صار واعي لمصادر امانه بعد الله وفهم الدرس
فليش نلوم البنات وننسى الرجال اللي لهم دور كبير في صناعة هذا النموذج من البنات
الحياه لازم تتوازن غصب عنا شئنا أم أبينا
الظلم لازم ينرفع
والحياه دروسها ما توقف والسعيد اللي يتوازن وما يفرط في حقوقه ولا ياكل حقوق غيره

فعلا والله كلامك صحيح جداا ، عاد تدرين فيه العن منه ؟ في واحد عمره 38 ويقول شرطي ان البنت تستخدم الجوال اللي ابو كشاف مو الذكي ،والله العظيم هذي اخته تقول

البعض شاطرين في لوم البنات
وللاسف هذا النموذج اللي ذكرتيه في بنات ممكن يوافقون و يتدبسون فيه وبعد الزواج تلقينهم يصارعون الامراض النفسيه ويبحثون عن مخرج من هذا السجن
انا اشوف ما يشترط هذي الشروط الصعبه مثل حرمان من جوال ذكي وانترنت الا اللي عقله محشي اوهام وتخاريف المتطرفين اللي يظنون ان الحرمان فيه سلامه وحمايه وكأنهم يتخيلون البنت اللي بيتزوجونها بلا احساس ووظيفتها تسمع وتطيع وتنفذ وتنسى وجودها

+ احيانا البنت الموظفة أحلامها صغيرة في الزواج تتمنى بس شخص يخطبها مهو عشان راتبها عشانها هي وهذا مايتوفر في كل البيئات.. ويسبب للبنت عقدة نفسية من العمل كونه بيشاركها راتبها اللي يادوب يكفيها. وتلقين لما يتزوجها ماينفق عليها خلاص بعذر أنها موظفة والنفقة واجبة مهما كان 😏

بنفس والوقت في رجال لازال فيهم خير ويعرفون واجباتهم قبل حقوقهم فتلاقينه يقوم بواجبه وينفق على زوجته حتى لو موظفه وبالعكس يشجعها تجمع فلوسها لنفسها
وفي رجال خلينا نقول هم قله نادره عيونهم على رواتب زوجاتهم ونفسهم دنيئه وللاسف تجيهم الزوجه رخوه هشه ضعيفه يسلبونها فلوسها ثم بعد سنوات يصدمونها بالزوجه الثانيه
هو الوعي بمسألة الحقوق والواجبات تكفي ان البنت تعرف هي مع اي نوع من الرجال عايشه وبناء عليه تتصرف