مشكلتي مع امي يابنات ساعدوني

السلام عليكم بنات
بقول مشكلتي وبحاول اختصرها

بنات انا تزوجت وعمري 21 سنة وخلفت ولد وتوفى بعمر سنه والحمدالله على كل حال
وطليقي كان رجل غير مسؤول وتحملت عشان طفلي ومشيت وعديت وكنت احاول اصلح الامور بينا بشتى الطرق كان مايصرف ولا يدفع ايجار لين طلعنا صاحب البيت وقالي روحي لاهلك ورحت لاهلي وانا مقهوره على الحال اللي وصلنا له بسبب استهتاره ولكن نقول نصيب وانتهى والحمدالله بالعكس انا ارتحت وراضيه وهذي خيره وفاة طفلي وانفصالي كلها اثرت فيني لمدة معينه وتجاوزت وانا عند اهلي من سنتين وسجلت بالجامعه وكملت السنه وباقي لي سنه واتخرج وبنفس الوقت بعمري ماطلبت من امي وابوي شي كنت احاول اشتغل بنفسي واطلع حق احتياجاتي اشتغل بالعطور

والحمدالله بفضل من ربي صنعت لي عطر خاص باسمي والحين يباع في اغلب المحلات ويجيني رزق منه والحمدالله يعني مو واجد لكن تغطي احتياجاتي لدرجة ماقد احتجت اني اطلب من امي او ابوي فلوس لاني اراعي ظروفهم برضو
مشكلتي مع امي يابنات الله يهديها

لسانها سليط علي وعلى ابوي والبيت كله
طبعا ابوي شخص مسالم وكبير بالسن دايم يحاول يتجاهل ويبسط الامور مايحب المشاكل والصريخ

لكن امي لسانها سليط وتدعي على ابوي رغم انه كبير بالسن وصحته ع قده وموفر احتياجات البيت ومافي شي ناقصهم

لما يعطيها فلوس تاخذها وتقصر على نفسها عشان تعطي اخوي الكبير طبعا اخوي متزوج لكن بينه وبين زوجته مشاكل وهي عند اهلها من اربع سنوات وعنده بنت

وعمره 35 سنه وعاله على نفسه يشتغل وراتبه 3 الف مادري وين يروح دايم يدخل نفسه في ديون وياخذ سلفيات ومايسددها وعليه مديونيات يعني ياليت يستفيد من الفلوس اللي ياخذها بالعكس كل ماجاله ووضعه في انحدار يعز علي وانقهر عليه ودي انه يتعدل ويصير رجال يعتمد عليه ويفتح بيته زي الرجال لكن مافي فايده دايما يروح لامي يطلب فلوس وتعطيه وتعطيه تخيلو اني من جيت عندهم من بعد طلاقي ماقد جت وعطتني ريال واحد او قالت محتاجه شي والحمدالله اني قاعده اشتغل على نفسي واوفر احتياجاتي

المشكله ان امي احسها شخصية انتقاديه جدا وتحب تتشرهه على الناس لدرجة احس الناس صارو ينفرون مننا بنات خالاتي وخالاتي وجماعتنا بصفه عامه

في موقف مره كانو خواتي متجمعات عندنا وجبنا عصير وجت اختي عمرها 13 وكبته بالغلط طبعا وتصارخ عليها وانا اقولها يايمه قولي بسم الله خلاص شر وانكب وهي تقول وش بسم الله الحين مين بينظف ومدري وش برغم اننا مو مقصرين انا واختي ننظف ونرتب البيت

ومره انا اشتريت بخور للبيت بمبلغ وقدره وتقول مايسوى ومو ذاك الزود ريحته برغم انه بخور معروف مو عبدالصمد وكل الناس تثني عليه وقلت يالله وجهة نظرها وعادي

ويوم وحده جابت لها بخور قالت زين وقامت تمدح فيه ومابقت مدحه الا وقالتها

يابنات احس مايعجبها شي بناتها يقدمونه لها حتى خواتي المتزوجات ينشغلون في بيوتهم احيانا ويجونا كل ويكند واذا اعتذرت وحده من خواتي

اذا عندها مناسبه مع اهل زوجها او جاراتها تقوم تذم وتتكلم على خواتي وهذولي مافيهم خير ومدري وش

برغم والله اننا مانقصر في شي واحاول ارضيها بشتى الطرق ماعمرها احتوتنا ولا قالت لنا كلمه زينه واحس حتى خواتي المتزوجات صارو ينفرون منها 💔

احسها من الشخصيات اللي الشخص اذا صار طيب ويدور رضاها ماتطيقه والشخص اللي مثل اخوي مامنه فايده عاله على نفسه وعلى البيت تموت عليه وبس يطلب شي قالت لابوي عطه رغم انه ابوي يجامل مره

ومايبي يردها واحيانا اقول ابوي لو يتكلم مره وحده بس ويعطيها العين الحمرا بتتعدل لكن ابوي خلاص رجال كبير مره ومافيه حيل للمناقر

مثلا لما يجون خواتي ونبي نطلع نتمشى او يلعبون عيالهم ونروح مطعم او كوفي ترفض تروح معنا وتقول روحوا انتم ونروح

المشكله انها تختار الناس اللي تجالسهم اشخاص نمامين ومنافقين وكل حياتهم مشاكل

يعني عندنا وحده من الجماعه هذي امي تحبها وتروح تسهر عندها للصبح عادي وتستقبلهم عندنا بنفس حلوه وطيبه عكس اي شخص مسالم حاله حال نفسه

يابنات انا احسها تستقعد لي يعني انا اوقات اطلع مع اختي الصغيره اذا طفشنا وطبعا نستأذن منها او من ابوي ويسمحون لنا نروح مطعم نتعشا او نتغدى او نروح نخلص اشغالنا ونرجع

واذا صار نقاش قالت هذولي يطلعون ويروحون ويجون وماقولهم شي يلبسون عباياتهم ويمشون برغم اننا نستاذن منها دايم وتقول روحو

انا والله اوقات من كثر مانفسيتي تتعب ودي بس تحن علينا انا وخواتي وتحتوينا وتصفي قلبها ونيتها وتعيش بسلام وتترك المشاكل
ماني عارفه كيف اتصرف اختي الصغيره نفسيتها تدمرت مالقت الحنان ولا لقت احتواء وانتو عارفين هالجيل يتحسس من اي شي

وصرت انا معها واحتويها واذا ناقصها شي اجيبه لها ونجلس ونسولف مع بعض وامي دايم منفسسه منفسسه يابنات لاتسولف واذا اقولكم والله ماتضحك معنا يمكن ماتصدقوني بس هذا الواقع

يعني انا الحين عمري 29 سنة وابي اثبت نفسي ابي اكمل دراستي وابي اشتغل وانجبر احيانا على الطلعات اخلص اشغالي ماطلع اتلكع كذا الحمدالله حاشمه نفسي وساتره نفسي واخلص شغلي وانجز شي لمستقبلي وهي مو عاجبها تكفون يابنات وش تنصحوني اسوي او اتصرف 😭😭😭