تطبيق ابشر دمر اسرتنا

السلام عليكم ورحمة الله وبركاته

ممكن فيكم من استغرب عنوان قصتي لكن هذا ماحصل.
واردت فقط ان افضفض لكم ولعلى فيكم من تدعوا لي.

كنت سعيده في حياتي مع زوجي بيننا خمس اطفال و وقتها حامل بالسادس وطالعين سفر تمشيه واحنا بالطريق قال لي زوجي ادخلي ابشر حقي واطلبي لي تجديد بطاقة لانه هو كبير ومايعرف لهذي الامور وانا اللي دايم انجز اشياءه المهم كان هو يجهل نقطه ولعلى الله اراد ان يفتح عيوني .
سبحان الله خلصت اللي طلبه مني لكن ماخرجت من حسابه قعدت اتعبث فيه وفتحت المضافين وكانت الصدمه لقيت زوجه ثانيه مضافه عنده ناظرت له وسألته وهنا عرف ماعاد فيه مجال للهروب قال ايه نعم متزوج وكان ناوي مايعلمني الا بعد الولاده و زواجه كان بيكون بوقت نفاسي.
اكتشفت انه الكل داري الا انا وكانوا مستغفليني بكيت وقام نزلني عند اهلي بدل مانكمل مشوارنا للسفر .
ومن هذاك اليوم ماعاد شفته له ثلاث سنوات غايب عني وعن عيالنا و ولدي الصغير اللي كنت حامل فيه كبر ولا يعرف ابوه .
واهله مؤيدينه وطلعوا علي اكاذيب وقصص من وحي الخيال واتهموني اتهامات باطله عشان مايتعاطفون معي الناس ويلومونه على فعله بي وبعيالنا.
احداث كثيره حصلت لكني اختصرتها وابي منكم دعوه قلبي انكسر كسر لا يمكن لحد ان يجبره فقدت كل شي عشت معه ١٢ سنه ورماني و رمى عيالنا لأجل انثى غريبه مايعرفها!
وعطاها بيت عيالنا وسكنها فيه وغرفتي واثاثي اللي اثثته قبل اطلع استعداد لاستقبال المولود الجديد كل شي راح.
طالبته بالمحكمه وانكر انه هجرني وقال اني انا اللي خرجت بعد اكتشافي زواجه واتمهني اني ناشز وهو كذب انا قايله ابرجع على عيالي طلعها من بيتي ورفض.
وعند الشيخ انكر وحلف كذب وصدقه الشيخ.
الآن انا مهجوره مع ست اطفال ولا ينفق علينا ولا نملك بيت.
كيف كنا وكيف صرنا.