حب

انتي وش اللي تبينه بالضبط ؟
الموضوع كله في يدك انتي اللي تقررين وتختارين اللي يناسبك مو احنا نقرر نيابة عنك
في مواضيع الخيانه ترى مافي حل سحري سري مخبينه الناس عنك
انتي عارفه كل التفاصيل والظروف اختاري اللي يناسبك اما تبقين معاه وتتقبلين الخيانات وماتتعبين نفسك بالمراقبه والتفتيش والهواش وتعيشين لنفسك او تتطلقين بالمعروف وتعيشين حياه جديده بعيد عنه
ابداً مافي حلول سحريه ثانيه
اما بخصوص المشاعر تشاور تودع مسافر وتيرا را ياليل العاشقين والحب المغصوب كلها سواليف مراهقين ومرحلة ثورة الهرمونات وخلصت مع احترامي لكل مشاعر الكوكب
الزواج الحقيقي مو مثل اللي تشوفينه بالافلام والمسلسلات عشق وغيره واشتياق ونار وشرار طول الحياه فما بالك لو كان الزوج اصلاًشخص غير مخلص ويلعب مع بنات خلق الله بالحرام اكيد مشاعرك ماراح تكون حلوه اتجاهه
يعني الخلاصه اذا ماتقدرين على الطلاق امسكي ارضك واتركي عنك الحبحبه والبحث عن مشاعر عشق وألتفتي لحياتك الشخصيه وهواياتك واطفالك اذا عندك واطلعي وانبسطي وحبي نفسك هي اولى من حبحبة ابو شنب ريحي راسك بس
واذا الخيانه مجرد سواليف تليفونات وانترنت مافيها زنا وامراض طنشي ولا تبحثين وراه ريحي راسك

طيب كيف احب نفسي كيف افك التعلق منه متعلقه فيه تعلق خوووف من بعد خياناته

اقري قران يا اختي .. التعلق لله سبحانه وتعالى .. استغفري كل يوم عن ذنوبك الف مرة .. وحوقلي الف مرة واهم شي احمدي الله الف مرة .. حترتااااحيييييين من ضغوطات النفسية اللي انتي فيها ..
الحل بالتسبيح .. والانشغال بالاعمال الصالحة .. موش قصدي جمعيات خيرية وصدقات طول الوقت ..
القصد انجزي مافي يديك انتي الان ..
عندك ترتيب .. تنظيف .. شي تبي تجددينه من زمان جدديه لو في امكانية ..اهتمي بمن يستحقون الاهتمام .. اطفالك ونفسك .. امك وخواتك .. صديقاتك اذا عندك .. واذا ماعندك .. تعرفي وكوني صدقات جديدة في حياتك ..
ركزي على حالك .. في عمرك الان شنو اللي تبين تسوينه من اهداف وماسويتيها .. ادخلي نادي رياضة .. العقل السليم في الجسم السليم .. اهتمي باسنانك شعرك بشرتك .. تعلقي بلله وزيدي ثقتك بنفسك ..
زوجك لا عاد دوريه .. اذا ماسال عنك لا تسالي عنه .. عيشي حياتك كانه مو موجود .. واذا كلمك ردي عليه باختصار ..
واذا تبي منه شي استغفري الف مرة قبل ماتطلبينه .. قوي علاقتك بربي من تسبيح وصلاة نوافل وقيام الليل ..
وربي يرزقك راحة البال والصحة

والله استغرب من اللي زوجها يخونها
ولا يعاملها بطال
وتقولك احبه ومتعلقة فيه
معقول ماتزعلي على نفسك
وانتي متعلقة بواحد مايستاهل
حبي نفسك مايحتاجلها كيف
اشغلي حالك بأي شي تحبيه
او بأولادك
ماتبغي تتطلقي اجل تتعايشي مع حياتك
بالطريقة اللي تخليك تعيشي مرتاحة لو جزئيا

شفتي حبك لزوجك ببساطه خليه لنفسك لذاتك لكيانك لانوثتك لجمالك لهواياتك لمشاعرك واحاسيسك طبطبي على روحك وارفقي بها وواسيها واعذريها وسامحيها ولا تلومينها وتأنبينها وتحملينها فوق طاقتها ولا تحطينها بمواقف ذل واهانه عزي نفسك واكرميها
واكتفي بذاتك لاسعاد نفسك لا تنتظرين من احد شي
وصححي معتقداتك بخصوص الزواج من فكرة التملك والسيطره الى ان الزوج مجرد شريك لك واضافه لحياتك وليس كل حياتك انتو ألتفيتو مع بعض عشان تكملون الحياه بالتشارك وليس بالتملك يعني هو له مساحته اللي يعيش فيها لذاته وهواياته وانتي كذلك لازم تكون لك مساحتك لذاتك وهواياتك واهتماماتك اللي مالها علاقه بهذا الزوج
والتعلق المرضي ينفك لما تحطين لحياتك عدة اهتامات واهداف وخطط ومصادر وخيارات اخرى غير التركيز على الزوج وكل ما يتعلق به لانك لما تحصرين نفسك بشخص وتخلينه اكسجينك وروحك وسعادتك وراحتك بمجرد ما يغيب او يزهق او يختفي انتي تنهارين وتحسين بالفراغ لان حياتك فارغه بعكس الزوج اللي حياته مليانه وعنده اهتمامات ثانيه ملتهي فيها اتمنى تكونين فهمتي وش اقصد
حاولي تصححين مسار حياتك وتفكيرك وتشوفين لك اهتمامات ثانيه تشغلين نفسك فيها ومع مرور الوقت بتلاحظين التأثير الايجابي عليك وحتى نفسيتك وتفكيرك بيتغير
للاسف الافلام والمسلسلات برمجت البنات على ان الزواج عباره عن حب وعشق واحضان وتبويس وكلام معسول وغزل بينما الواقع والله مو كذا وشوفي امهاتنا وخالاتنا وعماتنا وكل من يقرب لنا مافيها هذي الافلام هي حياه يعمرونها بالمشاركه وتربية الاطفال وكلن له اهتماماته محد لاصق بالثاني وناشب له
الله يشرح صدرك ويسهل امرك ويرشدك للصواب يارب