(للبنات) بالعزايم او الزواجات!!

السلام عليكم و رحمة الله و بركاته
العنوان كتبت للبنات عشان مرة قرأت اسم رجل هههههه

كيفكم حبيباتي
بقولكم كلام كنت اتمنى احد يعلمني و يقوله لي من زمان
لما اكون معزومة

بالاسلوب يعني
وحدة علمتني و الله يسعدها و حبيت افيدكم اعتبركم خوات
و لا تحسبون اني فاهمه و متعالية بس من باب الافادة.
و ضيفوا اي شى تبونه تحسونه مهم بعد


في الاجتماعات(لو كنتي معزومة زواج او اي مناسبة)
1-لا تقولين لأحد اي كلام على لبسه لانه ما بيقدر يغيره خلاص هو في العزيمة و بتنكدين عليه.
2-فيه مواضيع لا تتكلمي فيها (الشيب في الشعر و العمر و الوزن و الراتبو تأخر الزواج و حبوب الوجه و المشاكل العائلية و اي تغيير سلبي يصير في شكل البنت او اي شئ صاحبه ما تكلم فيه)
الناس جايه تبي تنسى همومها و تغير جو و تستانس.
3-لا تعيبين في أكل او شراب (طبيعي في حاجات ما تاكليها الناس اذواق لكن قولي الحمدلله بابتسامة و انك اكلتي)
4-اللي ما تتقهوى الا من قهوتها هههههه (عادي اتقهوي من قهوتك اساسا القهوة مزاااج بس لا تبينين انك ما بتشربين الا قهوتك) مثلا صبي لهم و لك.
5-قبل تروحين للعزيمة شوفي اظافر يدك و رجولك لو طويله قصيها و نظفيها.
6-لا تتحكمين بالدي جي الا لو طلبوا منك.
7-وزعي كلام حلو بس مو كذب يعني مثلا قولي لون مناكيرك حلو عليكي او طلتك حلوة اليوم او درجة الروج مناسبتك او لون فستانك حلو و اتبعيها بكلمة ما شاء الله. ما تتخيلين كيف بعضنا تأثر فيه الكلمة الحلوة يمكن يومه يكون كله حلو بسببك او يكون يومه صعب و انتي بكلامك اللطيف اسعدتيه و فرحتيه.
8-اعرضي مساعدتك لصاحبة العزيمة بينك و بينها ان لو تبي مساعدة تناديك.
9-لو ما بتحضري بلغي صاحبة العزيمة قبلها بيوم و اعتذري لو برسالة.
10-اذا كنتي ما تسمعين موسيقى او ما تحضرين زواجات او مناسبات فيها مثلا مخالفات شرعية مثل اللبس العاري و الاغاني لازم تقدرين اللي عزمتك و تجينها في بداية العزيمة تعطينها هديتها و تعتذرين منها او تكلمينها او تزورينها بالبيت لو زواج مثلا لأن اللي يقدرك قدريه و الله يسعدكم.
الله يبارك فيكم