قناعه مقتنعه فيها …

والله ولا انا لي نفس للنقاش🥴🤒
بس بقول شي واحد
ظروف الحريم تختلف
واذا كانت متزوجه ولها رغبه بالشغل وزوجها رافض خلاص لاتفكر
ومافي شي اسمه فلوس زوجها
وهي تسوي لنفسها دخل
يعني من الاول يوم راح يتزوجها
ماعطئ لاهلها خبر انه فلوسه لحاله وهي تدبر عمرها وتشتغل
هو المسئول الاول والاخير عليها
يصرف عليها اذا كان موافق او غير موافق علئ شغلها
في زوجات ودها تشتغل وتغير من روتينها بس الزوج يكون رافض
وش تسوي تعصيه؟؟ تخرب بيتها
خلاص تربي عيالها وتشوف بيتها
وهذا شي تؤجر عليه
وكلها ارزاق بيد الله بالاخر ياغلا
اشتغلت الزوجه او لا
مابتلقئ الا اللي ربها كاتبه لها

ماشاءالله ربي يبارك في والدتك ويكتب اجرها في تحفيظ وتعليم وتجويد القرآن للغير ويحفظها لكم يارب

ادري انك مقتنعة برأيك وانا بعد مقتنعة
بس معليش ما اقدر ما ارد على بعض نقاط ذكرتيها

اولا كلامك يبين وكأن الوظيفة او المكان الوظيفي بالذات جنة الله على الارض ورسمتي  صورة مثالية جدا للبنات عن الوظيفة بالنسبة للراتب اللي قلتي انه ينسيها التعب

هل كل الرواتب فعلا مجزية وكثيرة لدرجة تنسيها التعب طبعا لا ولسة بالمستقبل بتكون الرواتب اقل واقل لدرجة ان يادوب تكفي الواحد

عاد جملة تتونس ويكون عندها صاحبات ياريت والله ذا الحلم يتحقق فعلا
والله اني قريت هنا بالمنتدى عن وحدة تشتغل تقول زميلاتها ابدا مو متقبلينها ومسويين عليها حزب مع انها كانت بشوشة معهم وتهديهم وتقهويهم بعد

ولما قلت بيجي يوم يحتم على المرأة تشتغل اقصد البنات الصغار بعمر ١٧ و ١٨تخيلي بنت لسة خلصت ثانوية تروح تشتغل لان ابوها او اخوها قال لها ليش قاعدة بالبيت روحي اشتغلي واصرفي على نفسك على الاقل
انا  ما اتكلم عن بنات بنص العشرين وفوق انا اتكلم عن الصغار

انا اللي ابي اوصله لك ان الوظيفة للبنت مو ضرورة حتمية وفعلا المجتمع صار يستنقص البنت اللي ما تشتغل



بنتي  تقول لها صديقتها انهم ينظرون لها على انها غلط تقعد بالبيت وهي متخرجة من ٤ سنين تقول دايما يقولوا لها ليش ما توظفتي ومستغربين قعدتها بالبيت قالت لها بنتي انتي مرتاحة قالت جدا
قالت  خلاص سوي اللي يريحك

شفتي كيف وصل تفكير الناس الوظيفة حق وواجب صار للبنت مع ان اللي تبي تشتغل هي حرة واللي ما تبي بعد حرة
ليش الاستنقاص من اللي ما تشتغل

وهم بعد تردين وتقولين ان الفلوس تخليها تجيب سيارة او تسافر او تسوي اللي تبي انتي  كثير تفكيرك متطرف او انسانة حالمة جدا
مو لما يكون الراتب مجزيء
او لما يكون عندها زوج محترم فعلا يعتبر ذمتها المالية منفصلة وهالشي قليل يكون بأرض الواقع

حتى لما تجي وحدة هنا تشتكي انها ما تبي تصرف على البيت وعلى عيالها وتبي فلوسها كلها لها يقولوا لها البنات عادي اصرفي انتي تصرفين على عيالك وعلى نفسك

والرجل يحترمها انا اشوف اللي صاير العكس وقليل اللي يحترم
الرجلزصار يحط عينه على راتبها ويبيها تشارك معاه بالمصروف واذا بتقولين تستاهل هي اللي ما وقفته عند حده بقولك ما كل ما يتمناه  المرء يدركه ياريت الموضوع بهالبساطة اول شي بيقوله لها الباب يفوت جمل

وبالنهاية هذي قناعات
اهم شي محد يستنقص من الثاني ويشوفه اقل درجة

كلامك وكانهم أثنين متصاحبين
مو زوج وزوجه،،

اكيد مابتتمشئ الا بتنتظر أذن من زوجها
كيف يعني البس عبايتي واطلع ماانتظره هو اللي يمشيني ماأخذ الاذن منه علئ طلعتي؟
وحكايه بيحترمني بفلوسي والا أذا ماحترم حاله بترك له كل شي
🙄 هذا صاحب هذا مو زوج ياخيتي
ليش الاحترام قائم بين الازواج علئ من معها فلوس تحترم ومين ما معها يشوتها وانتهينا
هذا الكلام ماتربينا عليه ولا ديننا امرنا فيه
وما سمعته من زوجه عامله خارج البيت ابد

حتى اللي قاعدة بالبيت
ما تسوي شي
وما عندها مشروع
ولا تتعلم شي عن بعد

بس قاعدة تربي عيالها وتهتم فيهم وتراعي زوجها وتهتم فيه
ما نستنقص منها
ولا نشوفها اقل درجة