موضوع للنقاااش🥰💚🤍

مانبغي نلغي شي يالذة المقصد نبّسط على الرجل 🌚
يعني لما يجي رجال يبغى يتزوج ونعرف المادة عنده ضعيفه نحو ولاعلوم😂😂😂
المهم نحاول نبسط له
الان فيه أغلب بنات تشترط شي مو معقول
بمجرد يسمع المهر يبعد فكرة الزواج منها
وكم من بنات انخطبو وجلس كم سنه يكافح وبعدين
تفتسخ الخطوبه
بسبب عدم توفر المهر في السنه المحددة له🥲
كمان الشروط في بعض الرجال على المرأة
وكيف يبغاها تسبب تأخر الزواج للرجل وراح عمره وهو يدور على شريكة بمواصفات مبالغ فيها😩

على سيرة التيسير وان الواحد يراعي مقدرته الماديه
تدرين في عوائل ربي رزقهم بنات كثير ولما تنخطب وحده ينخطبون بالتدريج باقي الاخوات
والاب ما نقول فقير لانه قادر يصرف عليهم ويكسيهم ويعطيهم يتجهزون لزواج اللي بتتزوج لكن تخيلي فوق ما انهم يتزوجون وراء بعض بأوقات متقاربه كل وحده فيهم تبي تسوي بزواجها كل شي شافته عند صديقاتها من حفل حنا بمكان فخم وتجهيزات فخمه الى حفل شبكه بافخم قاعه وتتجهز كأنها عروس هذا غير هبة حفل توديع العزوبيه الى ان اخيراً يوصلون للحفل الختامي الزواج
الاب المسكين وش بيصرف ويترك على كل هذول المراحل الى الحفل الختامي وعلى البنات صحيح اللي تتزوج وحده لكن عندها اخوات كثير بكل مناسبه من هذي المناسبات يبون لبس ومكياج وتضبيط شعر
وحتى بعض الامهات ما يقبلون التيسير يقولون بنتنا مو ناقصه عن غيرها
لو الدعوى مجرد حفل زواج ومهر ماكان احد اشتكى

عنود ترى المهر الي قلتيه مره كويس
وكمان يُقبل اقل منه
اهم شي الرجُل وسمعته وأخلاقه
والي مقتدر وأخلاقه حلوه كمان خير من الله وبركة😉👍🏻💚🤍

إنَّ في التزوُّجِ بركة عامة لمن طلبه لتحقيق العفاف
قال تعالى: ﴿وَأَنْكِحُوا الْأَيَامَى مِنْكُمْ وَالصَّالِحِينَ مِنْ عِبَادِكُمْ وَإِمَائِكُمْ إِنْ يَكُونُوا فُقَرَاءَ يُغْنِهِمُ اللهُ مِنْ فَضْلِهِ﴾
ياليت ياعنود تخافين الله
بدل ما تدخلين في نوايا الناس وتكذيبهم
الحمدلله نخاف الله ونهابه .
ولو أننا مقصرين في حقه
لاكن مانجي مثلك وندخل في نيات الناس ونتهمهم بالنفاق والكذب
الدنيا لازالت بخير حبيبتي
وفيه ناس تبغي الستر والعفة
من كثر ماشفتي احس صارت عندك عقدة أنه يكون فيه ناس تقبل
غيري تفكيرك خوفآ من الله
اتقي الله اختي العنود💚🤍

كلامك صحيح وسمعت مثل كذا
وياليت يفهمون البعض أنه مو ناقص بنتهم شي 😩
تصدقين أنه في شباب تجين تقولين له امتى بتتزوج يقولك الغيت الفكره من راسي
ليه بسبب ارتفاع المهر بشكل خرافي
الرجال هاذا الزمن تُشترى
اذا الوحده وجدت في شريك حياتها مواصفات حميده واخلاق سّويه تتوكل على الله وتتزوج وتبني معاه أسرة
الوحده بتكبر في السن والرجل يكبر في السن ومافي مثل أسرة يكونون لهم سند بعد الله💚🤍

كل شي يهون مع سالفة تحديد المهر!
بعض القبائل حددت البكر ٤٠ ألف
والمطلقه أو الأرمله ٢٠ ألف!
يعني مجرد الفرق بين السعرين
مقرف ومقزز
الجديده سعرها أغلى من المستعمله
هذا هو المعنى!

ما يجي التحديد إلا لما يجي المهر
لكن لو بغا يشتري سياره ما يهمه
يتسلف ويقسط لين ٢٠٠ ألف
ولو بغا يسافر ويستمتع صرف الي وراه وقدامه!
ولو بغا يتزوج الثانيه دفع وشال وحط!

ما أقول لازم مهر كثير
بس لاتحددونه
والبنت لازم تشترط الي تبي في
حدود المعقول.

الي دفعوا مهور قليله ما اغتنوا ولا وفروا ولا بنوا أبراج وقصور!

وأشوف إن المهر لازم يكون ع الأقل ع الأقللللل ٧٠ ألف ويحمد ربي عطيته بنتي.

والحفله لابد منها
وهي الي مهو لازم بذخ وصرف وغيره
بس لازممممم حفله وبوفيه ومفاطيح ومطربه.