هل ممكن ظلم قديم يظل يأثر فينا حتى بعد سنوات؟

بنات، ما أدري إذا فيه أحد مرّ بنفس الشعور، لكن الفترة الأخيرة صايرة تجيني مواقف قديمة من سنوات على بالي بشكل متكرر، لدرجة إني أحيانًا أفز من نومي وأجلس أفكر فيها.

اكتشفت إني يمكن فيه أشياء صارت لي وأنا أصغر، وقتها ما كنت مستوعبة حجمها ولا أعرف كيف أتعامل معها أو أدافع عن نفسي، لكن الحين بعد ما كبرت وتجاوزت الثلاثين صرت أرجع لها وأحللها وأستوعب قد إيش كنت مظلومة.

من أكثر المواقف اللي علقت في بالي تجربة تدريب مؤقت في إحدى الشركات. تعرضت فيها لمعاملة سيئة جدًا من بعض الموظفات، صراخ وإحراج قدام الناس وضغط وتحميل مسؤوليات، وفي النهاية حصلت على تقييم ما كان منصفًا أبدًا، رغم أن ظروف التدريب نفسها كانت صعبة وغير مهيأة بالشكل المطلوب.

حتى الجامعة، لما حاولت أوضح لهم المشاكل اللي أواجهها، ما لقيت التفهم المتوقع. تخيلوا كنت أُدخل بيانات وأسماء بالعربي، والكيبورد المتوفر لي إنجليزي! ولما اشتكيت للمشرفة الأكاديمية، كان ردها بكل بساطة: «حطي استيكر على الكيبورد».

وهنا تجي السالفة اللي إلى اليوم تقهرني! أنا وقتها كنت متدربة، مو موظفة عندي راتب وإمكانيات، وحتى ماديًا ما كنت قادرة أتحمل مصاريف إضافية. يعني من وين أجيب الاستيكر؟ ومن بيوديني المكتبة أشتريه؟ وهل الشركة أصلًا موفرة هالشيء؟ لا فيه استيكرات بالشركة ولا فيه أي تجهيز يساعدني!

بدل ما يسألون ليش المتدربة مضطرة تشتغل على كيبورد إنجليزي وهي مطالبة بإدخال بيانات عربية، صار الحل إني أنا أتحمل المشكلة وأدبر نفسي! وكأن الموضوع بهذه البساطة. كنت في بداية طريقي المهني وأحتاج أبسط مقومات العمل، مو أحد يزيد عليّ الصعوبات ويستخف بمشكلتي.

الموضوع مو بس موقف وانتهى. اللي صار إني اليوم قاعدة أفكر في تبعات هالتجربة على مستقبلي المهني. كل ما أحد سألني: ليش ما تتوظفين؟ ليش ما تجيك عروض أو قبول من الشركات؟ أرجع أفكر في التقييم ذاك. هل ممكن يكون له دور؟ هل ممكن جهة تشوف تقييمًا سيئًا وتكوّن عني انطباعًا من غير ما تعرف الظروف اللي مرّيت فيها؟

ما عندي دليل إن هذا فعلًا اللي صار، لكن الفكرة صارت تلاحقني، خصوصًا إني أحس إن فيه أشخاص كانوا سببًا في تشويه صورة تجربتي المهنية، بينما أنا اللي تحملت تبعاتها.

يمكن وقتها كنت صغيرة وما أعرف أطالب بحقي، لكن الحين لما أتذكر أحس بقهر كبير. والأصعب إن المواقف المشابهة تكررت معي بأشكال مختلفة، وصرت أتساءل كم مرة سكتّ عن حقي لأني ما كنت أعرف إنه من حقي أتكلم أصلًا.

حاليًا أحاول أفهم ليش كل هالمواقف رجعت تطلع في ذاكرتي، وليش صارت تأثر على نومي وراحتي. هل فعلًا الإنسان ممكن يستوعب حجم الظلم اللي تعرض له بعد سنوات، مو وقت حدوثه؟

ودي أسمع منكم، هل قد مريتوا بمرحلة رجعتوا فيها تستحضرون مواقف قديمة وتحسون بقهر كأنها صارت أمس؟

7 تعليق 177 مشاهدة

شاركي في النقاش

سجلي الدخول لإضافة تعليق.

التعليقات

7
  1. @lyn1_2

    أحياناً ما نستوعب حجم المواقف اللي انظلمنا فيها إلا بعد ما نصير نشوفها بوعي مختلف وقتها يمكن ما كنا نعرف ندافع عن أنفسنا أو حتى ندرك إن اللي يصير معنا مو طبيعي ولا من حق أحد يعاملنا بهالطريقةبس أبي أقول لك في زاوية ما أغلبنا عشنا هذا الظلم حتى وان اختلفت الاسباب والمواضع فلا تخلين تجربة قديمة وتقييم غير منصف يحددون نظرتك لنفسك وقتها كنتي في بداية طريقك فلا تلومين نفسك على سكوتك وقتها أنتي تصرفتي بالوعي والقدرة اللي كانت عندك في ذاك العمر واليوم صرتي تعرفين إن لك حقوق ما كان المفروض تتنازلين عنها وهذا الوعي جميل جداً للمستقبل اما عن تاخر الوظيفة وعدم القبول هو ان رزقك ما قد حان وان رزق الانسان محفوظ ولكل شيء وقت بخصوص استرجاعك للذكريات والنبش في الماضي مب من صالحك ارى ياعزيزتي اصبحت نفسيتك هشة وهنا لازم نأخذ موقف ووقفة ونركز على الحاضر فقط بختصار صحتك ونفسيتك ونفسك هم اولى بالتركيز كيف تحسنينهم أتمنى تركزين على هذا الجانب وتطردين خيوط التفكير السلبية

  2. لين🌷1
    أحياناً ما نستوعب حجم المواقف اللي انظلمنا فيها إلا بعد ما نصير نشوفها بوعي مختلف وقتها يمكن ما كنا نعرف ندافع عن أنفسنا أو حتى ندرك إن اللي يصير معنا مو طبيعي ولا من حق أحد يعاملنا بهالطريقةبس أبي أقول لك في زاوية ما أغلبنا عشنا هذا الظلم…

    كلام جميل وله أثر

  3. @zumurudah

    ن حقك تزعلين حتى بعد هالسنين لكن لا تخلين تجربة أشخاص ما أنصفوك تحدد نظرتك لنفسك أو لمستقبلك كملي ولا تحاسبين نفسك على ماضي راح خليه تجربه تعلمتي منها وتختصر عليك مواقف بوظايف ثانيه راح تعرفين تتصرفين فيها افضل من قبل بحكم تجربتك

  4. @mhb_1122

    ياشيخه انسي عشان صحتك

    انا فتره كنت زيك اتذكر المواقف السيئه وليش مارديت وكثيييييير لين اوجعني قلبي ورحت المستشفى قالو مافي شيء

    هنا وقفت وحاولت انسى كل موقف سيء وتحسنت كثييييير

تابعي تجارب أخرى من هذا القسم.